Yeni Azərbaycan Partiyasının yaranması müstəqil dövlətçiliyimizin möhkəmlənməsində tarixi mərhələdir

Azərbaycanın müstəqilliyinin ilk illəri dövlətçilik tariximizin ən mürəkkəb və məsuliyyətli dövrlərindən biri kimi yadda qalıb. Ölkədə hökm sürən siyasi qeyri-sabitlik, idarəçilik böhranı, iqtisadi tənəzzül və Ermənistanın hərbi təcavüzü qarşısında yaranmış ağır vəziyyət müstəqil dövlətçiliyin gələcəyini ciddi təhlükə altına almışdı. Belə bir şəraitdə Azərbaycanın milli maraqlarını qoruya biləcək, xalqı vahid məqsəd ətrafında birləşdirərək ölkəni böhrandan çıxarmağa qadir siyasi qüvvəyə ehtiyac duyulurdu. Məhz bu tarixi zərurət Yeni Azərbaycan Partiyasının yaranmasını şərtləndirdi. Ulu Öndər Heydər Əliyevin rəhbərliyi ilə formalaşan partiya müstəqil Azərbaycanın siyasi həyatında yeni mərhələnin başlanğıcını qoydu. 
Prezident İlham Əliyev Yeni Azərbaycan Partiyasının VIII Qurultayındakı nitqində məhz partiyanın yaranmasının tarixi şəraitinə toxunaraq, 1992-ci il noyabrın 21-də Naxçıvanda keçirilən təsis konfransının ölkəmizin gələcək uğurlarına aparan yolun başlanğıcı olduğunu vurğulayıb. Həmin dövrdə Azərbaycanın gələcəyini düşünən ziyalılar, ictimai-siyasi xadimlər və cəmiyyətin müxtəlif təbəqələrini təmsil edən insanlar Heydər Əliyevin ətrafında birləşərək ölkənin düşdüyü ağır vəziyyətdən çıxarılması üçün siyasi iradə nümayiş etdirirdilər. Yeni Azərbaycan Partiyasının yaradılması xalqın sabitlik, güclü dövlətçilik və müstəqilliyin qorunması ilə bağlı gözləntilərinin ifadəsi idi. 
Həmin illərdə Azərbaycanın üzləşdiyi çətinliklər dövlət müstəqilliyinin qorunmasını və ərazi bütövlüyünün təmin edilməsini əsas vəzifələrə çevirmişdi. Şuşa və Laçının 1992-ci ildə, Kəlbəcərin isə 1993-cü ildə işğalı ölkədəki hərbi-siyasi vəziyyətin ağırlığını daha da artırmışdı. Siyasi qeyri-sabitlik, idarəçilikdəki böhran və iqtisadi tənəzzül əhalinin sosial vəziyyətinə ciddi təsir göstərirdi. Prezident İlham Əliyev qurultaydakı çıxışında bu tarixi hadisələri xatırladaraq, həmin dövrdə baş verənlərin unudulmamasının və gənc nəslə düzgün çatdırılmasının vacibliyini qeyd edib. Bu tarixi təcrübə müstəqilliyin qorunmasının, siyasi sabitliyin və dövlət idarəçiliyində məsuliyyətin əhəmiyyətini aydın şəkildə göstərir.
1993-cü ildə Ulu Öndər Heydər Əliyevin Azərbaycanda siyasi rəhbərliyə qayıdışı dövlətçiliyin qorunması və ölkədə sabitliyin bərqərar edilməsi baxımından yeni mərhələnin başlanğıcı oldu. Həmin vaxt Azərbaycan vətəndaş qarşıdurması təhlükəsi, dərin iqtisadi böhran, qaçqın və məcburi köçkünlərin ağır vəziyyəti, eləcə də ərazi bütövlüyünün pozulması kimi ciddi problemlərlə üzləşmişdi. Dövlət idarəçiliyinin möhkəmləndirilməsi, ölkənin parçalanma təhlükəsinin aradan qaldırılması və iqtisadi həyatın dirçəldilməsi təxirəsalınmaz vəzifələr idi. Heydər Əliyevin həyata keçirdiyi siyasət dövlət institutlarının möhkəmləndirilməsinə, siyasi sabitliyin təmin olunmasına və Azərbaycanın gələcək inkişaf strategiyasının formalaşdırılmasına yönəldi. Prezident İlham Əliyev VIII Qurultaydakı nitqində Ulu Öndərin bu mürəkkəb şəraitdə dövlətçiliyin qorunmasında və Azərbaycanın gələcək inkişaf yolunun müəyyənləşdirilməsində rolunu xüsusi vurğulayıb. 
Ölkənin iqtisadi potensialının bərpası və beynəlxalq əlaqələrinin genişləndirilməsi də həmin dövrün əsas prioritetləri sırasında idi. 1994-cü il sentyabrın 20-də imzalanan “Əsrin müqaviləsi” Azərbaycanın enerji strategiyasının formalaşmasında, xarici sərmayələrin cəlb edilməsində və beynəlxalq iqtisadi əməkdaşlığın genişləndirilməsində mühüm mərhələ oldu. Bu müqavilə ölkənin iqtisadi imkanlarının inkişafı üçün yeni perspektivlər açdı. Paralel olaraq, Azərbaycanın beynəlxalq mövqeyinin gücləndirilməsi, milli maraqlarının müdafiəsi və dövlət müstəqilliyinin möhkəmləndirilməsi istiqamətində ardıcıl addımlar atıldı. Beləliklə, ölkənin gələcək inkişafına xidmət edən iqtisadi və siyasi təməllər formalaşdırıldı.
Prezident İlham Əliyevin qurultaydakı çıxışında diqqətə çatdırdığı əsas məqamlardan biri də Ulu Öndərin müəyyənləşdirdiyi siyasi xəttin dəyişməzliyidir. Zaman keçdikcə qarşıya qoyulan vəzifələr və inkişafın konkret istiqamətləri yenilənsə də, dövlət müstəqilliyinin qorunması, iqtisadi müstəqilliyin gücləndirilməsi, güclü hərbi potensialın formalaşdırılması və milli maraqlara əsaslanan siyasətin davam etdirilməsi əsas prioritetlər olaraq qalır. Bu prinsiplər Azərbaycanın sonrakı inkişaf mərhələlərində də dövlət siyasətinin əsas istiqamətlərini müəyyən edib.
2003-cü ildən etibarən Prezident İlham Əliyevin rəhbərliyi ilə həyata keçirilən siyasət nəticəsində ölkənin iqtisadi potensialının artırılması, müdafiə qabiliyyətinin gücləndirilməsi və beynəlxalq mövqeyinin möhkəmləndirilməsi istiqamətində ardıcıl addımlar atılıb. Azərbaycanın qarşısında duran əsas tarixi vəzifələrdən biri olan ərazi bütövlüyünün və dövlət suverenliyinin bərpası da həyata keçirilib. Bu nəticə uzun illər ərzində aparılan siyasi, iqtisadi və hərbi hazırlığın, dövlətin imkanlarının gücləndirilməsinin və milli məqsədlər ətrafında birliyin əhəmiyyətini nümayiş etdirir. Bu gün Azərbaycanın beynəlxalq münasibətlər sistemində mövqeyinin möhkəmlənməsi və müstəqil qərarlar qəbul etmək imkanlarının genişlənməsi ölkənin keçdiyi inkişaf yolunun mühüm nəticələrindəndir.
Yeni Azərbaycan Partiyasının VIII Qurultayında səsləndirilən fikirlər partiyanın yaranma tarixinin və Azərbaycanın keçdiyi mürəkkəb inkişaf yolunun müasir dövrdə də əhəmiyyətini qoruduğunu göstərir. Ulu Öndər Heydər Əliyevin dövlətçilik irsinin öyrənilməsi, Prezident İlham Əliyevin rəhbərliyi ilə həyata keçirilən siyasətin əsas istiqamətlərinin dərk olunması və tarixi həqiqətlərin gələcək nəsillərə çatdırılması mühüm vəzifələrdəndir. Azərbaycanın qazandığı nailiyyətlər ölkənin gələcək inkişafı üçün yeni imkanlar yaratmaqla yanaşı, müstəqilliyin qorunması, milli birliyin möhkəmləndirilməsi və güclü dövlət quruculuğunun davam etdirilməsi məsuliyyətini də önə çıxarır.

Qurban Rzayev, 
YAP Salyan rayon təşkilatının ərazi partiya təşkilatı sədri