Azərbaycanın dövlət müstəqilliyinin bərpası xalqımızın milli iradəsinin və dövlətçilik ənənələrinə sədaqətinin təntənəsidir. Müstəqillik illərində ölkəmizin güclənməsi, ərazi bütövlüyümüzün bərpası və işğaldan azad edilmiş torpaqlarımızda genişmiqyaslı quruculuq işlərinin həyata keçirilməsi Azərbaycanın inkişaf yolunun mühüm mərhələləridir.

Bu fikirləri “Aktual Xəbər”ə açıqlamasında Milli Məclisin deputatı, Ana Vətən Partiyasının sədri Günay Ağamalı bildirib.

Deputat qeyd edib ki, 1991-ci il oktyabrın 18-də qəbul edilmiş Dövlət Müstəqilliyi haqqında Konstitusiya Aktı Azərbaycan xalqının azadlıq iradəsinin hüquqi ifadəsi olmaqla yanaşı, müasir dövlətçiliyimizin təməl sənədlərindən biridir. Müstəqillik ölkəmizə milli maraqlarını müstəqil şəkildə müəyyənləşdirmək, dövlətin siyasi, iqtisadi və hərbi qüdrətini möhkəmləndirmək imkanı verib.

Günay Ağamalının sözlərinə görə, 2020-ci ildə 44 günlük Vətən müharibəsində qazanılan tarixi Zəfər müstəqil Azərbaycanın gücünü, xalqımızın birliyini və Ordumuzun qəhrəmanlığını bütün dünyaya nümayiş etdirib.

Deputat vurğulayıb ki, dünən qeyd olunan Füzuli Şəhəri Günü bu Zəfərin mühüm rəmzlərindəndir. 2020-ci il oktyabrın 17-də Füzuli şəhərinin işğaldan azad edilməsi Vətən müharibəsinin gedişində əhəmiyyətli hərbi-strateji nailiyyət olub və sonrakı əməliyyatların uğurla davam etdirilməsinə əlverişli şərait yaradıb.

O bildirib ki, oktyabrın 19-da isə Cəbrayıl rayonunun Soltanlı, Əmirvarlı, Maşanlı, Həsənli, Əliyarlı, Qumlaq, Hacılı, Göyərçinveysəlli, Niyazqulular, Keçəl Məmmədli, Şahvəlli, Hacı İsmayıllı və İsaqlı kəndlərinin işğaldan azad edilməsi Azərbaycan Ordusunun ardıcıl uğurlarının növbəti təzahürü olub.

Günay Ağamalı qeyd edib ki, bu tarixi hadisələr müstəqilliyimizin, milli birliyimizin və dövlətimizin hərbi qüdrətinin bir-birini tamamladığını göstərir. Şəhidlərimizin canı, qazilərimizin fədakarlığı bahasına qazanılan Zəfər doğma torpaqlarımıza qayıdışın və yeni inkişaf mərhələsinin əsasını qoyub.

Deputatın sözlərinə görə, hazırda işğaldan azad edilmiş ərazilərdə həyata keçirilən bərpa və quruculuq işləri tarixi Qələbənin nəticələrini real həyata çevirir. Füzulidə müasir infrastrukturun yaradılması, yaşayış evlərinin, məktəblərin və digər sosial obyektlərin tikintisi, nəqliyyat imkanlarının genişləndirilməsi şəhərin inkişafına və əhalinin doğma yurda qayıdışına xidmət edir.

O vurğulayıb ki, Böyük Qayıdış yalnız insanların doğma torpaqlarına köçürülməsi deyil, həm də həmin ərazilərdə təhlükəsiz yaşayışın, məşğulluğun və sosial rifahın təmin olunması deməkdir. Qarabağın bərpasında qardaş ölkələrin iştirakı da regional həmrəyliyin və dostluq münasibətlərinin bariz nümunəsidir.

Günay Ağamalı bildirib ki, 18 oktyabr Müstəqilliyin Bərpası Günü, 17 oktyabr Füzuli Şəhəri Günü və 19 oktyabr Cəbrayıl rayonunun 13 kəndinin azad edildiyi tarix xalqımızın yaddaşında azadlıq, Zəfər və quruculuq salnaməsinin mühüm səhifələri kimi yaşayır.

Deputat əlavə edib ki, Prezident, Müzəffər Ali Baş Komandan İlham Əliyevin rəhbərliyi ilə həyata keçirilən siyasət nəticəsində azad edilmiş ərazilərdə bərpa işləri davam edir, Böyük Qayıdış genişlənir və Azərbaycan öz tarixi torpaqlarında yeni həyat qurur.