Şuşa Rayon İcra Hakimiyyətinin və Qərbi Azərbaycan İcmasının təşkilatçılığı ilə “Qərbi Azərbaycan İrsi” kitabının I cildinin təqdimat mərasimi keçirildi.
Bu nəşr Qərbi Azərbaycanada soydaşlarımıza məxsus qəbiristanlıqların sistemli şəkildə dağıdılmasını sənədləşdirən və beynəlxalq hüquqi məsuliyyəti gündəmə gətirən mühüm tədqiqat toplusudur. Tədbirdə Şuşa Rayon İcra Hakimiyyətinin başçısı Bayram Səfərov, Milli Məclisin deputatı və Qərbi Azərbaycan İcmasının Qadınlar Şurasının üzvü Günay Ağamalı, Qərbi Azərbaycan İcmasının İdarə Heyətinin üzvü, Hüquq Komissiyası və Böyük Qarakilsə rayon icmasının sədri Zahid Cəfərov, RİH başçısı Aparatının məsul əməkdaşları, idarə, müəssisə və təşkilatların və Qərbi Azərbaycan İcmasının nümayəndələri, Qərbi Azərbaycan və Şuşa rayonundan olan ziyalılar iştirak etdilər.
Millət vəkili və Qərbi Azərbaycan İcmasının Qadınlar Şurasının üzvü Günay Ağamalı çıxışında bildirib ki, Müzəffər Ali Baş Komandan, Möhtərəm Prezidentimiz cənab İlham Əliyevin rəhbərliyi ilə Vətən müharibəsində qazandığımız Zəfərdən sonra qarşımızda yeni perspektivlər açılıb. Qazandığımız Zəfər işğaldan azad olunan ərazilərə məcburi köçkünlərimizin qayıdışını təmin etməklə yanaşı həm də soydaşlarımızın əzəli Qərbi Azərbaycan torpaqlarına qayıdışının da təməlini qoyub. Dövlət başçısının bu yol xəritəsini sonadək reallaşdırmaqla bağlı güclü siyasi iradəsi ortadadır və hamımız bunun şahidiyik. Həmçinin, deputat Günay Ağamalı bildirib ki, qəbiristanlıqlar bir xalqın keçmişi, inancı və yaddaşıdır. Ona görə də qəbiristanlıqları dağıtmaq həmin xalqın izlərini coğrafiyadan silmək cəhdi, vandalizmdir. Bu, həm də beynəlxalq humanitar hüququn və insan haqlarının ciddi şəkildə pozulmasıdır.
Bu cür nəşrlər bir daha sübut edir ki, Azərbaycan xalqı öz tarixi irsinə sahib çıxır, dağıdılmış abidələrinin, məhv edilmiş qəbiristanlıqlarının izini itirmir və beynəlxalq aləmdə haqq səsini ucaldır.
#QərbiAzərbaycanİrsi #TarixiƏdalət #Milliİrs #Qayıdışhüququ #AzərbaycanHəqiqətləri
