“Vətəndaşların sosial rifahının yüksəldilməsi, insan kapitalının inkişafı və müxtəlif peşə sahiblərinin əməyinin layiqincə qiymətləndirilməsi Möhtərəm Cənab Prezident İlham Əliyevin rəhbərliyi ilə həyata keçirilən dövlət siyasətinin əsas prioritetlərindəndir.”

Bu sözləri Yenicag.az-a açıqlamasında Milli Məclisin deputatı, Ana Vətən Partiyasının sədri Günay Ağamalı bildirib.

Partiya sədri Birinci vitse-prezident Mehriban xanım Əliyevanın TƏBİB sistemində çalışan tibb işçilərinin əməkhaqlarının artırılması barədə qərarından danışıb.

G. Ağamalı qeyd edib ki, bu qərar şəffaf səhiyyə sisteminin formalaşması üçün atılan ən ciddi addımlardan biridir və Mehriban Əliyevanın səhiyyəmizə olan qayğısının açıq göstəricisidir:

“Sentyabrın 1-dən etibarən TƏBİB-in tabeliyində fəaliyyət göstərən tibb müəssisələrində çalışan işçilərin əməkhaqlarının artırılması dövlətimizin insan amilinə, sosial rifahın yüksəldilməsinə və səhiyyə sisteminin davamlı inkişafına verdiyi önəmin növbəti bariz nümunəsidir.”

G. Ağamalı bildirib ki, bu qərar tibb işçilərinin rifahının yaxşılaşdırılması ilə yanaşı, səhiyyə sistemində insan kapitalını da artıracaq:
“Birinci vitse-prezident Mehriban xanım Əliyevanın tibb işçilərinin maddi rifahının yaxşılaşdırılması, əməyinin layiqincə qiymətləndirilməsi və səhiyyə sistemində insan kapitalının gücləndirilməsi məqsədilə irəli sürdüyü bu mühüm təşəbbüs yüksək humanist dəyərlərə söykənən sosial siyasətin mahiyyətini bir daha nümayiş etdirir.

Möhtərəm Cənab Prezident İlham Əliyevin Birinci vitse-prezident Mehriban xanım Əliyevanın təşəbbüsünü müsbət qarşılayaraq onun icrası ilə bağlı müvafiq tapşırıq verməsi səhiyyə işçilərinin sosial müdafiəsinin gücləndirilməsinə dövlət səviyyəsində göstərilən xüsusi diqqətin ifadəsidir.”

Partiya sədri bu qərarın miqyasının ölkə daxilində 70 mindən çox səhiyyə işçisini əhatə edəcəyini xüsusi diqqətə çatdırıb:
“Əməkhaqqı artımının TƏBİB-in tabeliyində çalışan 72 212 tibb işçisini əhatə etməsi və sistem üzrə illik əməkhaqqı fondunun 189 milyon manat artırılması həyata keçirilən sosial tədbirin əhatə dairəsini aydın şəkildə göstərir. İnsan sağlamlığının keşiyində dayanan, böyük məsuliyyət və fədakarlıqla çalışan tibb işçilərinin əməyinin yüksək qiymətləndirilməsi onların sosial rifahının yaxşılaşdırılması ilə yanaşı, səhiyyə xidmətlərinin keyfiyyətinin yüksəldilməsi baxımından mühüm əhəmiyyət daşıyır. Sözügedən qərar bir daha təsdiq edir ki, vətəndaşların sosial rifahının yüksəldilməsi, insan kapitalının inkişafı və müxtəlif peşə sahiblərinin əməyinin layiqincə qiymətləndirilməsi Möhtərəm Cənab Prezident İlham Əliyevin rəhbərliyi ilə həyata keçirilən dövlət siyasətinin əsas prioritetlərindəndir.

Tibb işçilərimizə insan sağlamlığının qorunması kimi şərəfli və məsuliyyətli fəaliyyətlərində uğurlar diləyirəm.”