22 may 2026-cı il tarixdə Bakı şəhərinin Xətai rayonunda III Kəlağayı Festivalı keçirilib.

Festival Bakı şəhər Mədəniyyət Baş İdarəsi, Xətai Rayon İcra Hakimiyyəti, Qərbi Azərbaycan İcmasının Bakı şəhəri Xətai rayonu üzrə Nümayəndəliyi, Azərbaycan Respublikasının İnsan Hüquqları üzrə Müvəkkili ( Omudsman) Aparatı, Kəlağayı ev Muzeyi və Mirvarid Dilbazi Poeziya Məclisi İctimai Birliyinin birgə təşkilatçılığı ilə baş tutub.

 Festival çərçivəsində əvvəlcə sərgiyə baxış keçirilib. Sərgidə Azərbaycanın qədim milli-mədəni irs nümunələrindən olan kəlağayı sənətini əks etdirən müxtəlif eksponatlar nümayiş olunub. Xüsusilə, Azərbaycan Respublikasının Ombudsman Aparatının “Susmayan həqiqətlər: depportasiya, soyqırımı, etnik təmizləmə”   mövzusunda   sərgisində Qərbi Azərbaycanda kəlağayı ənənəsini əks etdirən tarixi fotolar, arxiv sənədləri və məişət nümunələri iştirakçıların  marağına səbəb olub. 

Qərbi Azərbaycan guşəsində xalçalar, qədim kəlağayı nümunələri və milli şirniyyatlar təqdim edilərək xalqımızın zəngin mədəni irsi nümayiş etdirilib. 

Festivalın rəsmi hissəsində əvvəlcə Ulu Öndər Heydər Əliyevin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad olunub, daha sonra Azərbaycan Respublikasının Dövlət Himni səsləndirilib.

Bakı şəhəri Xətai Rayon İcra Hakimiyyətinin başçısı Rafiq Quliyev açılış nitqi ilə çıxış edərək qonaqları və rayon sakinlərini salamlayıb, festivalın milli irsimizin yaşadılması istiqamətində mühüm rol oynadığını bildirib. O, həmçinin tədbirin təşkilinə və keçirilməsinə göstərilən dəstəyə görə Qərbi Azərbaycan İcmasının rəhbərliyinə təşəkkür edib.

Sonra söz Qərbi Azərbaycan İcmasının İdarə Heyətinin sədri, millət vəkili Əziz Ələkbərliyə verilib. O, çıxışında Qərbi Azərbaycan qadınlarının sevimli örtüyü olan kəlağayının tarixindən, milli-mənəvi dəyərindən və xalqımızın mədəni kimliyindəki yerindən bəhs edib. Bildirib ki, əsrlər boyu Azərbaycan qadınının zərifliyini, mənəviyyatını və milli kimliyini yaşadan mühüm atributlarından biri olan kəlağayı Qərbi Azərbaycan mədəni irsinin də tərkib hissəsidir. İcma sədri qeyd edib ki, bu kimi tədbirlərin bayrama çevrilməsi Ulu Öndər Heydər Əliyev tərəfindən təməli qoyulmuş milli ideologiya  və  ölkə başçısı İlham Əliyevin qətiyyətli siyasətinin təzahürüdür. O çıxışının sonunda Xətai Rayon İcra Hakimiyyətinin rəhbərliyi başda olmaqla, bütün təşkilatçılara təşəkkür edib. 

Daha sonra "İki sahil" qəzetinin baş redaktoru, millət vəkili Vüqar Rəhimzadə çıxış edərək milli-mədəni irsimizin qorunmasının vacibliyini diqqətə çatdırıb, bu kimi tədbirlərin gənc nəslin milli dəyərlərə bağlı ruhda yetişməsində mühüm rol oynadığını qeyd edib.

Tədbirdə çıxış edən YAP Xətai rayon təşkilatının sədri Ramil Mirzəyev  isə festivalın milli həmrəyliyin və mədəni yaddaşın qorunmasına xidmət etdiyini bildirib, Qərbi Azərbaycan irsinin yaşadılması istiqamətində görülən işlərin əhəmiyyətini vurğulayıb.

Festival incəsənət nümayəndələrinin iştirakı ilə təşkil olunan konsert proqramı ilə davam edib. Təqdim olunan musiqi və bədii nömrələr tədbir iştirakçıları tərəfindən maraq və alqışlarla qarşılanıb.