Bu gün Azərbaycanda Gənclər Günü qeyd olunur.

Gənclər günü MDB məkanında və Şərqi Avropa ölkələri arasında ilk dəfə Azərbaycanda qeyd olunub.

Patrul.az deputatların gələcəyimiz olan gənclərə çağırış və tövsiyələrini öyrənib.

Milli Məclisin deputatı, Ana Vətən Partiyasının sədri Günay Ağamalı ilk növbədə, Azərbaycan Gəncləri Günü münasibətilə bütün Azərbaycan Gənclərini ürəkdən təbrik edib, hər birinə sağlamlıq, fəaliyyətlərində yeni-yeni zirvələr diləyib:

“Qoy hər bir Azərbaycan gəncinin yolu açıq və aydın olsun!

Azərbaycan gəncləri ölkəmizin gələcəyinə olan ümidin, inamın və böyük potensialın rəmzidir. Gənclər ölkəmizin inkişafının və davamlılığının əsas təminatıdır.

Azərbaycan gəncliyi hər zaman dövlətimizin diqqət mərkəzində olub. Azərbaycan gəncliyinə göstərilən diqqət və etimadın təməlində Ulu Öndər Heydər Əliyevin müəyyənləşdirdiyi uzaqgörən gənclər siyasəti dayanır. Ümummilli Lider gəncləri dövlətin gələcəyi kimi dəyərləndirir, onların milli-mənəvi dəyərlər ruhunda, savadlı və vətənpərvər nəsil kimi formalaşmasını əsas prioritet hesab edirdi. Bu siyasi xətt Möhtərəm Cənab Prezident İlham Əliyev tərəfindən müasir dövrün çağırışlarına uyğun şəkildə uğurla davam etdirilir. Gənclərin təhsil, innovasiya, sahibkarlıq, könüllülük və beynəlxalq proqramlarda iştirak imkanlarının genişləndirilməsi dövlətin gənclər siyasətinin əsas istiqamətlərindəndir. Birinci vitse-prezident Mehriban xanım Əliyevanın humanitar, sosial və təhsil sahəsində həyata keçirdiyi təşəbbüslər gənclərin intellektual və mənəvi inkişafına, sağlam, dəyərlərə bağlı nəslin formalaşmasına mühüm töhfə verir”.

Millət vəkilinin gənclərə əsas tövsiyəsi zamanın tələblərinə uyğun olaraq daim öyrənib, bilik və bacarıqlarını inkişaf etdirməkləridir:

“Müasir dünyada savadlı olmaqla yanaşı, məsuliyyətli və mövqeli vətəndaş olmaq xüsusi əhəmiyyət daşıyır.

Eyni zamanda gənclər milli kimliyinə, dilinə, tarixinə və dövlətçilik dəyərlərinə hər zaman sahib çıxmalıdırlar. Müasirlik heç də milli köklərdən uzaqlaşmaq deyil, əksinə, öz kimliyini qoruyaraq inkişaf etməkdir. Məhz belə gənclik daha güclü və daha inamlı olur”.

“Bu gün dövlət gənclərə inanır və onlara böyük etimad göstərir. Sözügedən etimadı doğrultmaq, cəmiyyətə faydalı olmaq, ictimai həyatda fəal mövqe tutmaq hər bir gəncin məsuliyyətidir. Əminəm ki, Azərbaycan gəncliyi bundan sonra da vətənpərvər mövqeyi, intellektual potensialı və sağlam düşüncəsi ilə ölkəmizin inkişafına layiqli töhfələr verəcək”,- deyə o əlavə edib.

Millət vəkili Ceyhun Məmmədov vurğulayıb ki, bu günün gəncləri bizim gələcəyimizdir:

“Gənclərimiz müxtəlif sahələrdə peşəkarlaşaraq dövlətçiliyimizin inkişafına töhfə verəcək. Ulu Öndərin əsasını qoyduğu siyasət bugünkü gündə Prezident İlham Əliyev tərəfindən davam etdirilir.

Dövlətimiz gənclərə yüksək diqqət və qayğı göstərir və biz bütün sahələrdə bunun şahidi oluruq”.

C.Məmmədov gənclərə tövsiyələrini də ifadə edib:

“Gənclərimiz vətənpərvər, savadlı və öz üzərlərində daim işləyən olmalı, bu prinsipləri hər zaman əsas götürməlidirlər”.