“Şəhərsalma və Memarlıq İli” çərçivəsində “Heydər Əliyev – müasir Azərbaycanın memarıdır” mövzusunda tədbir keçirilib  

 
15 aprel 2026-cı il tarixində Salyan şəhər 7 saylı texniki fənlər təmayüllü məktəb-liseydə “Şəhərsalma və Memarlıq İli” çərçivəsində “Heydər Əliyev – müasir Azərbaycanın memarıdır” adlı tədbir keçirilib. Tədbirdə Salyan Rayon İcra Hakimiyyətinin və YAP Salyan rayon təşkilatının rəhbərliyi, ziyalılar, QHT nümayəndələri, partiya fəalları, 7 saylı məktəb-liseyin müəllim və şagirdləri iştirak ediblər. 
Öncə Ümummilli Lider Heydər Əliyevin və torpaqlarımızın azadlığı uğrunda canlarından keçmiş şəhidlərin əziz xatirəsi bir dəqiqəlik sükutla yad olunub. Sonra “Şəhərsalma və Memarlıq İli”nə həsr olunmuş videoçarx nümayiş etdirilib.
Tədbirdə çıxış edənlər, Salyan Rayon İcra hakimiyyəti başçısı aparatının Ərazi- təşkilat və ictimai-siyasi məsələlər şöbəsinin ictimai- siyasi və humanitar məsələlər sektorunun müdiri Məhərrəm Məmmədov, YAP Salyan rayon təşkilatının sədr müavini Aqşin Babayev, “Əməkdar müəllim”lər, rayon Ziyalılar Cəmiyyətinin sədri Allahverdi Piriyev, şəhər 7 saylı məktəb-liseyin direktor müavini Fərqanə Cəbrayılova və müəllimi Şəhla Rəhimova qeyd ediblər ki, Ümummilli Lider Heydər Əliyev müasir Azərbaycan dövlətinin qurucusu olmaqla yanaşı, ölkəmizin şəhərsalma və memarlıq siyasətinin əsasını qoyan böyük şəxsiyyətdir. Onun rəhbərliyi dövründə respublikamızda həyata keçirilən genişmiqyaslı quruculuq işləri, yeni yaşayış massivlərinin salınması, infrastruktur layihələrinin icrası Azərbaycanın gələcək inkişafı üçün möhkəm təməl yaradıb. Bildirilib ki, Heydər Əliyevin müəyyən etdiyi inkişaf strategiyası bu gün də uğurla davam etdirilir, ölkəmizin hər bir guşəsində aparılan abadlıq və quruculuq işləri Azərbaycanın sürətli inkişafının bariz nümunəsidir. Xüsusilə işğaldan azad olunmuş ərazilərdə həyata keçirilən bərpa və yenidənqurma layihələri müasir şəhərsalma prinsiplərinə əsaslanaraq həyata keçirilir və bu ərazilər yeni inkişaf mərhələsinə qədəm qoyur.
Çıxışlarda vurğulanıb ki, “Şəhərsalma və Memarlıq İli” çərçivəsində keçirilən bu cür tədbirlər gənc nəslin milli-mənəvi dəyərlərə bağlı ruhda tərbiyə olunmasında, onların dövlətçilik ənənələrinə hörmət ruhunda formalaşmasında mühüm rol oynayır. Eyni zamanda, bu tədbirlər gənclərdə memarlıq və şəhərsalma sahəsinə marağın artırılmasına, onların bu istiqamətdə biliklərinin zənginləşdirilməsinə xidmət edir. 
Natiqlər məktəblilərə öz tövsiyələrini verərək bildiriblər ki, hər bir gənc müasir Azərbaycanın inkişafında fəal iştirak etməli, Ulu Öndərin ideyalarına sadiq qalaraq ölkəmizin gələcək tərəqqisinə öz töhfəsini verməlidir.