Salyan Su Meliorasiya Sistemlərinin İstismarı İdarəsində “Şəhərsalma və Memarlıq ili” çərçivəsində tədbir keçirilmişdir.

Salyan Su Meliorasiya Sistemlərinin İstismarı İdarəsində “Şəhərsalma və Memarlıq ili” çərçivəsində tədbir keçirilmişdir. Tədbirdə idarənin rəisi İlkin Əzizov, YAP Salyan rayon təşkilatının sədri Elmar Əhmədov, Rayon İcra Hakimiyyəti Başçısı aparatının İctimai-siyasi və humanitar məsələlər sektorunun müdiri Məhərrəm Məmmədov, həmçinin icra hakimiyyətinin, YAP Salyan rayon təşkilatının nümayəndələri və idarənin əməkdaşları iştirak etmişlər.
Azərbaycan Respublikasında 2026-cı ilin “Şəhərsalma və Memarlıq İli” elan edilməsi ölkənin uzunmüddətli inkişaf strategiyasında şəhər mühitinin formalaşdırılmasına, memarlıq irsinin qorunmasına və müasir urbanizasiya proseslərinin elmi əsaslarla tənzimlənməsinə verilən xüsusi önəmin bariz ifadəsidir. Memarlıq və şəhərsalma hər bir xalqın mədəni irsinin, estetik zövqünün və inkişaf səviyyəsinin ən mühüm göstəricilərindən biridir. Şəhərsalma və memarlıq yalnız tikinti fəaliyyəti ilə məhdudlaşmır. Bu sahə insanların gündəlik həyat keyfiyyətini, sosial münasibətlərini, mədəni mühitini və estetik zövqünü formalaşdıran mühüm amildir. Şəhər məkanlarının planlı şəkildə qurulması, yaşayış və ictimai sahələrin düzgün təşkili, nəqliyyat və mühəndis infrastrukturlarının səmərəli əlaqələndirilməsi cəmiyyətin dayanıqlı inkişafının əsas şərtlərindən biridir. Azərbaycanda memarlıq və şəhərsalma sahəsinin sistemli və məqsədyönlü inkişafı ümummilli lider Heydər Əliyevin adı ilə sıx bağlıdır. Onun təşəbbüsü ilə inşa olunan inzibati binalar, yaşayış kompleksləri, mədəniyyət və ictimai obyektlər bu gün də öz memarlıq dəyərini qoruyub saxlayır və ölkəmizin simasını müəyyən edən əsas elementlərdən biri kimi çıxış edir.
Bu siyasət bu gün də Ulu öndərin layiqli davamçısı, Azərbaycan Respublikasının Prezidenti İlham Əliyevin rəhbərliyi ilə davam etdirilir. Paytaxt Bakının siması əsaslı şəkildə yenilənmiş, müasir memarlıq nümunələri ilə zənginləşdirilmiş, eyni zamanda tarixi irsin qorunması və bərpası istiqamətində genişmiqyaslı layihələr həyata keçirilmişdir.
Müasir dövrdə şəhərsalma anlayışı yeni məzmun kəsb etmişdir. Qlobal urbanizasiya prosesləri, əhalinin şəhərlərə axını, iqlim dəyişiklikləri və ekoloji problemlər şəhər mühitinin yenidən düşünülməsini zəruri edir. Bu şəraitdə dayanıqlı şəhərsalma prinsipləri-ekoloji tarazlığın qorunması, yaşıl zonaların artırılması, enerjiyə qənaət edən texnologiyaların tətbiqi, əlçatan və təhlükəsiz şəhər mühitinin yaradılması əsas prioritetlər kimi ön plana çıxır.
Cənab İlham Əliyevin təşəbbüsü ilə regionların sosial-iqtisadi inkişafı proqramları çərçivəsində ölkənin bütün şəhər və rayonlarında geniş abadlıq-quruculuq işləri aparılmış, yeni yaşayış kompleksləri, yollar, parklar və ictimai obyektlər istifadəyə verilmişdir. Xüsusilə işğaldan azad olunmuş ərazilərdə həyata keçirilən bərpa və yenidənqurma layihələri müasir şəhərsalma prinsiplərinə əsaslanaraq “ağıllı şəhər” və “ağıllı kənd” konsepsiyaları üzrə qurulur və bu da Azərbaycanın gələcəyə yönəlmiş inkişaf strategiyasını aydın şəkildə nümayiş etdirir.
Əminik ki, həyata keçirilən məqsədyönlü siyasət nəticəsində memarlıq, şəhərsalma bundan sonra da inkişaf edəcək, ölkəmizin hərtərəfli tərəqqisinə və vətəndaşlarımızın rifahının yüksəlməsində mühüm rol oynayacaqdır.