BIZIM INDI ÇOX FƏAL SIYASI DIALOQUMUZ VAR

Bu gün Çex Respublikası adı ilə bildiyimiz Çexoslovakiya Respublikası Azərbaycan Respublikasının müstəqilliyini 8 yanvar 1992-ci ildə tanımışdır və ilk diplomatik münasibətlər 27 yanvar 1993-cü ildə qurulmuşdur. Keçən dövr ərzində iki ölkə arasında ən yüksək səviyyədə işgüzar səfərlər edilmiş, istər xarici işlər nazirliyi, istərsə də parlamentlər arasında əlaqələr gün keçdikcə inkişaf etdirilmişdir.
Ölkəmizin beynəlxalq əlaqələrə verdiyi əhəmiyyət müxtəlif dövlətlərlə əlaqələrin çoxşaxəli olmasında açıqca görülməkdədir. Xüsusilə beynəlxalq hüquqa hörmətlə yanaşan dövlətlərlə inkişaf edirilən bu əlaqələr qarşılıqlı maraqların təmin edilməsinə əsaslanır. Cənab prezident İlham Əliyevin siyasi peşəkarlığı sayəsində ölkəmizin iqtisadi və coğrafi imkanları siyasi maraqlarımıza tam mənası ilə xidmət etməklə, ölkəmizin gələcəyinin daha da parlaq olmasına təminat yaradır. 
Bütün dünyada olduğu kimi, Avropa Birliyi ölkələrində də fəaliyyət göstərən  bəzi siyasi mərkəzlərin qərəzli, prinsipsiz və beynəlxalq hüquq və ədalət anlayışına tərs olan davranışlarının fonunda, “qoca qitə” -də hələ də mövcudluğunu qoruyan sağlam təfəkkürlü tərəfdaşlarla əlaqələrin qurulması Azərbaycan Respublikasının əsas siyasi inkişaf istiqamətlərindəndir. 
Çexiya Respublikası da məhz belə adekvat siyasət mərkəzlərindən birisi sayılır və əlbəttə bu ölkə ilə əlaqələrin inkişafı ölkəmiz üçün məqbul sayılmaqdadır. Çexiya Respublikası ilə iqtisadi əlaqələrə diqqət edərsək, 2023-cü ildə Çexiya Avropada Azərbaycanın 6-cı ən böyük ticarət tərəfdaşı və 5-ci ən böyük ixrac məntəqəsidir. Bu iqtisadi əlaqələr əsasən energetika sektoruna aid olsa da, məhz bu əlaqələrin sayəsində bu gün iki ölkə arasında müdafiə sənayəsi sahəsində də ortaq lahiyələrə start verilmiş, artıq məhsuldar nəticələr əldə edilmişdir. İki ölkə arasında bütün bu əlaqələrin hüquqi bazasını təşkil edən 30-dan çox sənəd imzalanmış, qarşılıqlı əlaqələrin inkişafı üçün münbit şərait yaradılmışdır. 
26 aprel 2026-cı il tarixdə Çex Respublikasının Baş naziri Andrey Babişin ölkəmizə səfəri də məhz bu əlaqələrin genişləndirilməsi və inkişafına xidmət etməkdədir. İki liderin görüşləri əsnasında iqtisadi sahədə verilən mesajlar isə xüsusilə praktik əhəmiyyət daşıyır. Müsbət göstəricili ticarət dövriyyəsinin gün keçdikcə artması fəxr edici hal olsa da, onun strukturunun təkmilləşdirilməsi ilə bağlı irəli sürülən yanaşma gələcək əməkdaşlığın daha dayanıqlı əsaslar üzərində qurulmasına xidmət edəcək. Çex iş adamlarının geniş tərkibdə səfərdə iştirakı və biznes forumun təşkili göstərir ki, tərəflər konkret layihələrə keçid etmək niyyətindədir. Bu isə sənaye, texnologiya və investisiya sahələrində ölkəmiz üçün də yeni imkanlar yarada bilər.
Bu gün bir çox Avropa ölkələrinin Azərbaycana marağı artmaqdadır. Bunun ilkin səbəbi, əlbəttə, Cənab prezidentin apardığı, ölkəmizin tərəqqisinə hesablanmış, düşünülmüş və planlaşdırılmış rasional siyasətdir. Xüsusilə beynəlxalq hüququn ayaqlar altına alındığı günümüzdə, ölkəmizdə mövcud olan sabitlik, iqtisadi potensial, etibarlı tərəfdaşlıq prinsipinə sadiqlik, həmçinin sülh siyasətinin prioitet təşkil etməsi bir çox dövlətləri ölkəmizlə əlaqələrə təşviq etməklə yanaşı, Azərbaycanı da dünyada qeydsiz, şərtsiz qəbul görən iqtisadi, siyasi və mədəni mərkəzə çevirməkdədir. 

YAP Qax rayon təşkilatının sədr müavini:                    İlkin Abbasov