TƏBİB robotik cərrahiyyə xidmətlərinin tətbiqinə hazırlaşır 

Tibb müəssisələrində səhiyyə xidmətlərinin keyfiyyətinin yüksəldilməsi, innovativ tibbi həllərin tətbiqi, ən son tibbi texnologiyaların və cərrahi xidmətlərin ölkə səhiyyəsinə qazandırılması istiqamətində çoxsaylı tədbirlər həyata keçirilir.

Yeni dövr səhiyyəsində daha bir uğurlu prosesə başlanılıb. Qarşıya qoyulan strateji hədəflərə uyğun olaraq TƏBİB tabeli tibb müəssisələrində robotik cərrahiyyə xidmətlərinin tətbiqinə hazırlıq məqsədilə yerli mütəxəssislərin beynəlxalq təcrübəsindən yararlanacaq.

Bu məqsədlə Yeni Klinikanın direktor müavini, Cərrahiyyə və transplantasiya mərkəzinin rəhbəri, cərrah-transplantoloq Eldar Əhmədov, Ümumi cərrahiyyə şöbəsinin müdiri Elşən Qədimov, ümumi cərrahlar Möhsüm Əsgərov və Elvin Tanrıverdi Türkiyənin Acıbadem Universitetinin robotik tədris mərkəzində təşkil olunan robotik cərrahiyyə üzrə ixtisaslaşdırılmış kurslarda iştirak ediblər. Bu kurslarda iştirakçılara robotik cərrahiyyənin nəzəri əsasları, texniki imkanları və klinik tətbiq sahələri üzrə ətraflı məlumat verilib.

“TOUMAI® Endoskopik cərrahi sistem üzrə Console Surgeon (Konsol Cərrahı)” kursunu tamamlayan Eldar Əhmədov və Elşən Qədimov robotun qolları və cərrahi alətlərin yüksək dəqiqliklə idarə olunması, 3D böyüdülmüş görüntü vasitəsilə əməliyyat sahəsinin real vaxtda izlənilməsi, kəsik, tikiş, disseksiya kimi əsas cərrahi manevrlərin icrası üzrə praktiki bacarıqlar əldə edib. Kurs çərçivəsində robotik sistemlərin klinik üstünlükləri, minimal invaziv yanaşmaların effektivliyi və pasiyent təhlükəsizliyinin artırılması istiqamətində beynəlxalq təcrübə qazanılıb. 

Eyni sistem üzrə “Patient Side Assistant (Xəstə Tərəfi Assistent)” kursunu bitirən Möhsüm Əsgərov və Elvin Tanrıverdi isə əməliyyat zamanı xəstənin yanında fəaliyyət göstərərək robotik alətlərin düzgün yerləşdirilməsi və dəyişdirilməsi, texniki proseslərin fasiləsizliyinin təmin olunması, təhlükəsizlik protokollarına riayət edilməsi və cərrahi komanda ilə koordinasiyanın gücləndirilməsi üzrə ixtisaslaşıb. Onlar, həmçinin mümkün texniki risklərin vaxtında qarşısının alınması və əməliyyatın optimal gedişinin təmin edilməsi sahəsində praktiki biliklər qazanıb.

Təlimlər zamanı minimal invaziv yanaşmalar əsasında icra olunan cərrahi əməliyyatların üstünlükləri, o cümlədən daha yüksək dəqiqlik, əməliyyat zamanı və sonrasında risklərin minimuma endirilməsi, fəsadların azalması, pasiyentlərin daha qısa müddətdə bərpası kimi mühüm məqamlar praktiki nümunələrlə izah olunub. 

Təlimlər beynəlxalq sertifikatlı mütəxəssislər tərəfindən aparılıb və müasir tibbi protokollara əsaslanıb. 

Qeyd edək ki, robotik cərrahiyyə ənənəvi açıq və laparoskopik üsullarla müqayisədə cərraha daha geniş görüntü imkanları, yüksək manevr qabiliyyəti və dəqiqlik təqdim etməklə yanaşı, pasiyent məmnunluğunun artmasına və müalicə nəticələrinin yaxşılaşmasına mühüm töhfə verir. 

TƏBİB tərəfindən həyata keçirilən bu cür beynəlxalq təlim və təcrübə proqramları gələcəkdə ölkəmizdə robotik cərrahiyyə xidmətlərinin geniş tətbiqini, tibbi kadrların bilik və bacarıqlarının sistemli şəkildə artırılmasını, qabaqcıl texnologiyaların klinik praktikaya inteqrasiyasını, eləcə də vətəndaşlara daha təhlükəsiz, effektiv və müasir səhiyyə xidmətlərinin göstərilməsini hədəf alır.