Salyanda “20 Sentyabr – Dövlət Suverenliyi Günü”nə həsr olunmuş tədbir keçirilib

17 sentyabr 2025-ci il tarixində “Konstitusiya və Suverenlik İli” çərçivəsində Salyan Rayon İcra Hakimiyyətinin, YAP Salyan rayon təşkilatının, rayon Heydər Əliyev Mərkəzinin, Salyan 1 saylı Mediasiya təşkilatının və Şirvan-Salyan Regional Gənclər və İdman İdarəsinin Salyan rayonu üzrə Gənclər və İdman Sektorunun birgə təşkilatçılığı ilə “20 Sentyabr – Dövlət Suverenliyi Günü”nə həsr olunmuş "Dövlətçilik tariximizin ən parlaq səhifəsi" mövzusunda tədbir keçirilib. Salyan Rayon Heydər Əliyev Mərkəzində keçirilən tədbirdə Ümummilli Lider Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib, “20 Sentyabr – Dövlət Suverenliyi Günü”nə həsr olunmuş videoçarx nümayiş olunub. 
Tədbirdə Salyan Rayon İcra Hakimiyyəti başçısının müavini Rəşad Cəbrayılov, YAP Salyan rayon təşkilatının sədr müavini Aqşin Babayev, Salyan Rayon Heydər Əliyev Mərkəzinin direktoru Nübar Bayramova, Salyan 1 saylı Mediasiya təşkilatının sədri, vəkil Elman Hənifəli, XTQ-in zabiti, antiterror tədbirlərinin iştirakçısı, Qazi Rəsul Ağayev, Salyan şəhər 6 saylı tam orta məktəbin tarix müəllimi İradə Mütəllimova, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun baş məsləhətçisi Əlişir Əliyev və başqaları çıxış edərək qeyd ediblər ki, 2023-cü ilin 19–20 sentyabr tarixlərində həyata keçirilmiş antiterror tədbirləri nəticəsində Azərbaycanın dövlət suverenliyi tam şəkildə bərpa olunub. Bu tarixi hadisə yalnız ölkəmizin deyil, bütövlükdə regionun siyasi mənzərəsini dəyişib, xalqımızın müstəqillik iradəsini və ərazi bütövlüyünü təmin etmək əzmində olduğunu bir daha sübut edib.
Çıxışlarda vurğulanıb ki, 20 Sentyabr – Dövlət Suverenliyi Günü Prezident İlham Əliyevin 2024-cü il sentyabr tarixli Sərəncamı ilə təsis olunaraq Azərbaycan dövlətçiliyinin ən şərəfli səhifələrindən birinə çevrilib. Bu günün təsis olunması həm 2023-cü ilin qələbəsinin əbədiləşdirilməsi, həm də müstəqil Azərbaycanın qüdrət və gücünün təsdiqi kimi dəyərləndirilib. Bildirilib ki, 30 ildən artıq davam edən Ermənistan-Azərbaycan münaqişəsinə son qoyulması, ölkəmizin bütün ərazilərində konstitusiya quruluşunun tam bərpası xalqımızın tarixində yeni dövr açıb. Bu, həm də ümummilli həmrəyliyin, dövlət-xalq birliyinin və ordumuzun peşəkarlığının parlaq nəticəsi kimi qiymətləndirilib.
Natiqlər xüsusilə vurğulayıblar ki, suverenliyin qorunması və möhkəmləndirilməsi hər bir vətəndaşın müqəddəs borcudur. Bu gün Prezident İlham Əliyevin rəhbərliyi ilə aparılan siyasət Azərbaycanı daha güclü, müasir və dayanıqlı dövlətə çevirib, yeni reallıqlar isə ölkəmizin gələcək inkişafı üçün möhkəm zəmin yaradıb.