Salyanda “Konstitusiya və Suverenlik İli” çərçivəsində cüdo idman növü üzrə açıq rayon birinciliyi keçirilib

 24 may 2025-ci il tarixində Salyan Rayon İcra Hakimiyyətinin, Yeni Azərbaycan Partiyası Salyan rayon təşkilatının, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun, Azərbaycan Cüdo Federasiyasının və Salyan Olimpiya İdman Kompleksinin birgə təşkilatçılığı ilə “Konstitusiya və Suverenlik İli” çərçivəsində “28 May-Müstəqillik Günü”nə həsr edilmiş kadetlər arasında cüdo idman növü üzrə açıq rayon birinciliyi keçirilib. Salyan Olimpiya İdman Kompleksində keçirilən birincilikdə Salyan, Sabirabad, Cəlilabad, Biləsuvar, Bərdə, Lənkəran, Masallı, Neftçala rayon, Bakı və Şirvan şəhər komandalarından olan idmançılar və məşqçi-müəllimlər iştirak edib.
Tədbirdə öncə Azərbaycan Respublikasının Dövlət Himni səsləndirilib, Ümummilli Lider Heydər Əliyevin və torpaqlarımızın bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib. 
Tədbirdə çıxış edənlər, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun müdiri Elmar Əbilov, Salyan Rayon İcra Hakimiyyətinin ictimai-siyasi və humanitar məsələlər şöbəsinin müdir müavini Məhərrəm Məmmədov, Yeni Azərbaycan Partiyası Salyan rayon təşkilatının sədr müavini Aqşin Babayev, Azərbaycan Cüdo Federasiyasının cənub bölgəsi üzrə kuratoru, əməkdar məşqçi Xanağa Quliyev və başqaları qeyd ediblər ki, 28 May – Müstəqillik Günü xalqımızın azadlıq və dövlətçilik iradəsinin rəmzidir. Bildirilib ki, müstəqilliyimizin möhkəmlənməsində Ulu Öndər Heydər Əliyevin müstəsna xidmətləri olmuş, onun rəhbərliyi ilə əsası qoyulan siyasi kurs bu gün Prezident İlham Əliyev tərəfindən uğurla davam etdirilir. Vurğulanıb ki, Prezident İlham Əliyevin rəhbərliyi ilə Azərbaycan həm regionda, həm də beynəlxalq aləmdə güclü, müstəqil və nüfuzlu dövlətə çevrilib, ərazi bütövlüyümüz təmin olunub və ölkəmiz sürətli inkişaf yolundadır.
Çıxış edənlər cüdo kimi idman növlərinin gənclərin fiziki və mənəvi inkişafında mühüm rol oynadığını qeyd edərək, bu cür yarışların onların sağlam həyat tərzinə, nizam-intizama və vətənpərvərlik ruhuna yiyələnməsində əhəmiyyətini vurğulayıblar. Sonda çıxış edənlər yarış iştirakçılarına uğurlar arzulayıb, onların gələcəkdə Azərbaycanın bayrağını beynəlxalq arenalarda dalğalandıracaq idmançılar kimi yetişəcəklərinə inandıqlarını bildiriblər.
Maraqlı idman mübarizəsi şəraitində keçən açıq rayon birinciliyinin yekununda I, II, III yeri tutmuş idmançılar diplomlar və medallarla təltif olunublar.