Salyanda mediasiya və marketinq üzrə maarifləndirmə tədbiri keçirilib

2 noyabr 2024-cü il tarixində  rayonunun Aşağı Kürkənd kəndində yerləşən “Gölüstü” İstirahət Mərkəzində Salyan 1 saylı Mediasiya Təşkilatının təşəbbüsü ilə "Mediasiya xidmətlərinin marketinqi və barışıq sazişlərinin işlək olması üçün maarifləndirmə tədbirləri" mövzusunda regional inkişaf və maarifləndirmə tədbiri keçirilb. 
Tədbirdə Mediasiya Şurası İdarə Heyətinin sədri Nadir Adilov,  VII Çağırış Milli Məclisin deputatı, Təbii Ehtiyatlar, Energetika və Ekologiya komitəsinin sədri Sadiq Qurbanov, YAP Salyan Rayon Təşkilatının sədri Elmar Əhmədov, Mediasiya Şurası İntizam Komissiyasının sədri Mayıl Əhməd, Mediasiya Şurası Etika Komitəsinin sədri Aqil Əsgərov, "Femida" Vəkil bürosunun direktoru Pənah Məmmədov, Salyan Rayon İcra Hakimiyyəti aparatının hüquq şöbəsinin hüquqşünası Rəhim Rəhimov, Salyan Rayon “Qələbə” ictimai- siyası qəzetinin baş redaktoru, ”Ana Kür”  ictimai birliyinin sədri Rüstəm Məlikov və region mediasiya təşkilatlarının rəhbərləri və mediatorlar iştirak etdilər.
Tədbiri Mediasiya Şurası İdarə Heyətinin sədri Nadir Adilov açaraq Azərbaycan Respublikası Prezidenti İlham Əliyev tərəfindən imzalanmış “Mediasiya haqqında” qanundan irəli gələn məsələlərin icrasında əldə olunmuş müsbət təcrübədən və görüləcək işlərdən ətraflı danışmışdır.
Regional  inkişaf və maarifləndirmə tədbirində  Vll çağırış Milli Məclisin deputatı, Təbii Ehtiyatlar, Energetika və Ekologiya Komitəsinin sədri Sadiq Qurbanov  mediasiya əməkdaşlarını  və qonaqları salamlayaraq Azərbaycanda mediasiya missiyasının çox qədim ənənələri olduğunu vurğulamış və  bu xeyirxah, humanist  xidməti göstərən hər kəsə azərbaycanlı ailəsinin qorunması, uşaqların atalı-analı tərbiyə olunması üçün daha səylə çalışmağı arzulamışdır.
YAP Salyan Rayon Təşkilatının sədri Elmar Əhmədov çıxış edərək qonaqları qədim milli ənənələri olan Salyanda salamlamış və mediasiya xidmətinin qloballaşma dövründə çox böyük əhəmiyyət daşıdığını vurğulayaraq tədbirə uğurlar arzu etmişdir.
Tədbirin ilk panelində "Mediasiyada marketinqin regionlarda təbliği və maarifləndirilməsi" mövzusu müzakirə edilib. Moderator rolunda çıxış edən Elman Hənifəli, mediasiyada marketinqin uğur hekayələrindən, çıxış edən digər nümayəndələr isə mediasiya xidmətlərinin marketinq fəaliyyətinin vacibliyi, barışıq sazişlərinin effektiv şəkildə həyata keçirilməsi üçün görüləcək tədbirlər və maarifləndirmə fəaliyyətlərinin əhəmiyyəti barədə danışıb.
İkinci paneldə isə "Sosial Şəbəkələrdə Mediasiya Marketinqi və Maarifləndirmə Strategiyaları" mövzusunda çıxışlar olunub. Burada sosial mediada maarifləndirmə kampaniyalarının təşkili, gənclərin və ictimaiyyətin prosesə daxil olunması və mediasiya xidmətlərinin düzgün marketinqi məsələləri müzakirə olunub. Bu mövzuda çıxış edən Bakı 12 saylı Mediasiya Təşkilatının üzvü mediator Zaur Quliyev, mediasiya xidmətlərinin sosial şəbəkələrdə düzgün təqdim olunmasının önəmini vurğulayıb.
Tədbirdə Bakı 12 saylı Mediasiya Təşkilatının, Lənkəran və Sabirabad Mediasiya Təşkilatlarının mediatorları, həmçinin Femida Vəkil Bürosunun vəkili Anar Ramazanov təşəkkürnamə ilə təltif edilib. Bundan əlavə, Femida vəkil bürosu ilə Salyan 1 saylı Mediasiya Təşkilatı arasında birgə əməkdaşlıq barədə memorandum da imzalanıb. Qeyd edilib ki, bu memorandum gələcəkdə hüquqi yardım və mediasiya xidmətlərinin inkişafı sahəsində daha səmərəli əməkdaşlığın qurulmasını təmin edəcək.
Tədbirin sonunda regional mediasiya xidmətlərinin genişləndirilməsi planları, maarifləndirmə kampaniyalarının gələcək inkişaf istiqamətləri müzakirə olunub, Salyan Uşaq Gənclər İdman və Şahmat Məktəbinin futbol komandası üçün hazırlanmış formalar təqdim edilib.