Regionda sülh və əməkdaşlığın yeni mərhələsi
2026-cı il 4 may tarixində Azərbaycan Respublikasının Prezidenti İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxış edərək regionda formalaşan yeni siyasi reallıqlar, Azərbaycan-Ermənistan münasibətlərində əldə olunan irəliləyişlər və sülh prosesinin perspektivləri ilə bağlı mühüm mesajlar səsləndirib. Dövlət başçısı çıxışında Azərbaycanın beynəlxalq əməkdaşlığa, regional təhlükəsizliyə və qarşılıqlı etimada əsaslanan siyasət həyata keçirdiyini vurğulayaraq, postmünaqişə dövründə bölgədə dayanıqlı sülhün təmin olunması istiqamətində atılan addımların artıq real nəticələr verdiyini diqqətə çatdırıb. Prezident İlham Əliyev xüsusilə qeyd edib ki, Azərbaycan sülh gündəliyinə sadiq qalaraq həm regional əməkdaşlığın genişlənməsinə, həm də Avropa məkanında qarşılıqlı siyasi dialoqun möhkəmlənməsinə töhfə verməyə davam edir.
Dövlət başçısı çıxışı zamanı bildirib ki, Ermənistan “Avropa Siyasi Birliyi”nin Zirvə görüşünün 2028-ci ildə Azərbaycanda keçirilməsini dəstəkləyib. Prezident İlham Əliyev qeyd edib ki, Antonio Koşta ilə iki ay əvvəl Azərbaycanda keçirilən görüş zamanı bu məsələ geniş müzakirə olunub və onun Zirvə toplantısına videobağlantı vasitəsilə qatılması barədə razılıq əldə edilib. Prezident İlham Əliyev xatırladıb ki, ötən il Tiranada keçirilən görüş zamanı Prezident Antonio Koşta və Ursula fon der Lyayen tərəfindən 2026-cı ilin may ayında Zirvə görüşünün Ermənistanda keçirilməsi ilə bağlı onun rəyi soruşulub və Azərbaycan tərəfi bu təşəbbüsü dəstəkləyib. Bunun qarşılığında isə balanslı yanaşmanın təmin olunması məqsədilə növbəti Zirvə toplantılarından birinin Azərbaycanda keçirilməsi təklifi irəli sürülüb və bu təklif qəbul edilib.
Prezident İlham Əliyev çıxışında vurğulayıb ki, Ermənistanın Azərbaycanın namizədliyini dəstəkləməsi iki ölkə arasında sülhün real xarakter aldığını göstərən mühüm siyasi göstəricidir. Dövlət başçısı bildirib ki, Azərbaycan və Ermənistan cəmi doqquz aydır sülh şəraitində yaşayır və tərəflər artıq yeni münasibətlər sisteminə uyğunlaşmağa çalışırlar. Bu məqam regionda qarşıdurma mərhələsinin arxada qaldığını, əməkdaşlıq və qarşılıqlı anlaşma mühitinin formalaşdığını nümayiş etdirir.
Prezident İlham Əliyev diqqətə çatdırıb ki, əldə olunan sülh nəticəsində Azərbaycan tərəfindən Ermənistana münasibətdə uzun illər qüvvədə olan tranzit məhdudiyyətləri birtərəfli qaydada aradan qaldırılıb. Dövlət başçısının sözlərinə görə, artıq Azərbaycan ərazisi vasitəsilə Ermənistana 28 min ton yük çatdırılıb. Bu fakt regionda kommunikasiya əlaqələrinin bərpası, iqtisadi münasibətlərin inkişafı və qarşılıqlı etimadın möhkəmləndirilməsi baxımından mühüm əhəmiyyət daşıyır.
Çıxış zamanı Prezident İlham Əliyev qeyd edib ki, ötən ilin avqust ayında Vaşinqtonda, Ağ Evdə Azərbaycan və Ermənistan liderləri Birgə Bəyannamə imzalayıblar. ABŞ Prezidenti Donald Tramp da həmin sənədə şahid qismində imza atıb. Eyni zamanda, hər iki ölkənin xarici işlər nazirləri sülh sazişinin mətnini paraflayıblar. Prezident İlham Əliyev bildirib ki, artıq həm Azərbaycan, həm də Ermənistan üçün sülh reallığa çevrilib və tərəflər münasibətlərin normallaşdırılması istiqamətində əməli addımlar atırlar.
Dövlət başçısı vurğulayıb ki, Azərbaycan yalnız tranzit imkanlarını açmaqla kifayətlənməyib, eyni zamanda ilk dəfə olaraq Ermənistana benzin və dizel yanacağı ixracına başlayıb. Bu günədək Azərbaycandan Ermənistana 12 min ton neft məhsulu ixrac edilib. Prezident İlham Əliyev bu faktı iki ölkə arasında iqtisadi və ticarət münasibətlərinin formalaşmasının başlanğıcı kimi qiymətləndirib. Dövlət başçısının səsləndirdiyi fikirlər bir daha göstərir ki, Azərbaycan regionda davamlı sülhün, iqtisadi inteqrasiyanın və qarşılıqlı faydalı əməkdaşlığın təmin olunması istiqamətində ardıcıl və praqmatik siyasət həyata keçirir.
Tahir Gülnəzərov,
Salyan rayon Qarabağlı-1 kənd tam orta ümumtəhsil məktəbinin direktoru, YAP fəalı
