Meloni Bakıda balansları dəyişir - İtaliya Azərbaycan qazına daha çox bağlanır

Xəbər verdiyimiz kimi, İtaliyanın baş naziri Corciya Meloni Azərbaycana səfərə gəlib. Bu səfər ətrafında ən müxtəlif müzakirələr açılıb.

Heç şübhəsiz ki, xanım baş nazirin bu səfəri təsadüfi diplomatik jest deyil. Həm enerji, həm də geosiyasi baxımdan strateji əhəmiyyət daşıyan bir addımdır.

Hər kəsə məlumdur ki, İtaliya Avropada Azərbaycan qazının əsas alıcılarından biridir. Ukrayna müharibəsindən sonra isə, Avropa Rusiyadan enerji asılılığını azaltmağa çalışır. Bu kontekstdə Azərbaycan İtaliya üçün daha da önəmli tərəfdaşdır.

Avropa İttifaqı ilə münasibətlərdə Azərbaycan üçün də İtaliya körpü rolunu oynaya bilər. Hazırda bu münasibətlərin elə də ürəkaçan olmadığını nəzərə alsaq, Meloninin səfərinin əhəmiyyəti daha da artır.
Ümumiləşdirsək, bu, sadəcə protokol səfəri deyil, strateji tərəfdaşlığın möhkəmləndirilməsi üçün atılan addımlardan biridir.

Ana Vətən Partiyasının sədri, Azərbaycan-İtaliya parlamentlərarası əlaqələr üzrə işçi qrupunin üzvü Günay Ağamalı Musavat.com-da səfəri bu cür şərh etdi: "İtaliyanın Baş naziri Corcia Meloninin Azərbaycana səfəri enerji və geosiyasi baxımdan strateji əhəmiyyət kəsb edir. Xanım Baş nazirin Bakıdakı görüşləri Avropanın yeni dövr iqtisadi və siyasi reallıqlarına əsaslandığını təsdiqləyir.
Hazırda İtaliya Avropada Azərbaycan qazının əsas alıcıları sırasında yer alır və Ukrayna müharibəsindən sonra qitənin Rusiyadan enerji asılılığını minimuma endirmək cəhdləri Azərbaycanı Roma üçün əvəzolunmaz tərəfdaşa çevirib. 

TAP layihəsi vasitəsilə qurulan enerji körpüsü nəinki İtaliyanın daxili tələbatını ödəyir, həmçinin ölkəni Avropanın mühüm enerji qovşağına çevirmək potensialına malikdir.

Eyni zamanda, sözügedən görüşlərin siyasi çəkisi iqtisadi amillərdən az əhəmiyyətli hesab edilə bilməz. Azərbaycanın bəzi Avropa paytaxtları ilə dialoqun arzuolunan səviyyədə olmadığı bir dövrdə, İtaliya Bakı üçün mühüm körpü rolunu üzərinə götürür. Meloninin praqmatik yanaşması və Azərbaycanın regiondakı strateji çəkisini düzgün qiymətləndirməsi, İtaliyanı Avropa İttifaqı daxilində Azərbaycanın haqlı mövqeyini müdafiə edə biləcək ən güclü səslərdən birinə çevirilib".

Deputatın sözlərinə görə, reallaşan təmaslar iki ölkə arasındakı mövcud tərəfdaşlığın və regional sabitliyin qorunmasında münasibətləri möhkəmləndirmək məqsədi daşıyır. İtaliya şirkətlərinin Azərbaycanın işğaldan azad edilmiş ərazilərindəki bərpa işlərində aktiv iştirakı da yaxınlaşmanın enerji ilə məhdudlaşmadığını, genişmiqyaslı iqtisadi və siyasi platformaya söykəndiyini göstərir.
Corcia Meloninin Bakı səfəri Avropa və Cənubi Qafqaz arasındakı münasibətlərdə yeni və daha balanslı bir səhifənin açılmasına xidmət edir.

Möhtərəm cənab Prezident İlham Əliyev İtaliya ilə münasibətləri strateji tərəfdaşlığın ən yüksək nümunəsi kimi dəyərləndirir. Dövlət başçısı tərəfindən hər zaman vurğulanıb ki, iki ölkə arasındakı dialoq səmimiyyət və qarşılıqlı etimad üzərində qurulub. Reallaşan təmaslar həmin etimadın əsas göstəricilərindəndir".