Ermənistan hədəfə çıxarılır? – Paşinyanın başı DƏRDDƏ

Xəbər verdiyimiz kimi, Fransa prezidenti Emmanuel Makron Ermənistanın paytaxtında keçirilən Avropa Siyasi Birliyinin sammitində çıxışı zamanı Baş nazir Nikol Paşinyana bir sıra reveranslar edib. O, son illər ölkədə baş verən “əhəmiyyətli siyasi dəyişiklikləri” qeyd edib.

“Düzünü desək, səkkiz il əvvəl bura heç kim gəlməzdi. Səkkiz il əvvəl bu ölkə danışıqlar masasında faktiki olaraq Rusiyanın peyki hesab olunurdu. Bu gün ölkənizə bu qədər çox ilk səfərlər görməyimiz çox şeydən xəbər verir”, - Makron bildirib.

Fransa lideri vurğulayıb ki, Ermənistan əvvəllər bir çoxları tərəfindən Rusiyanın faktiki müttəfiqi kimi qəbul edilirdi, lakin "məxməri inqilab"dan sonra ölkənin kursu dəyişib. O, Baş nazir Nikol Paşinyanın rolunu qeyd edib. Deyib ki, o, ölkəni yenidən istiqamətləndirib, sülhə və Avropaya inteqrasiyaya üstünlük verib. “Ermənistanın təhlükəsizliyini və müdafiəsini gücləndirən Avropadır. Ermənistan artıq Rusiyanın himayəsi altında deyil” – Bunu da Makron iddia edib.

Bundan əlavə, Ermənistanla AB arasında imzalanan 44 maddəlik bəyannamənin 8-ci bəndi birbaşa Ukrayna ilə bağlıdır. Orada deyilir: “Biz BMT Nizamnaməsinin və beynəlxalq hüququn prinsiplərinə əsaslanan Ukraynada hərtərəfli, ədalətli və davamlı sülhə nail olmaq üçün bütün səyləri dəstəkləyirik. AB Rusiyanın Ukraynaya qarşı təcavüzkar müharibəsi ilə bağlı prinsipial mövqeyini və Ukraynanın beynəlxalq səviyyədə tanınmış sərhədləri daxilində müstəqilliyinə, suverenliyinə və ərazi bütövlüyünə dəstəyini bir daha təsdiqlədi”.

Siyasi müşahidəçilər bu bəndin Ermənistanın Rusiyaya qarşı cəbhədə yer alması anlamına gəldiyini deyirlər...

Bu qəbil açıqlama və bəyannamə Paşinyanı təzədən Kremlin hədəfinə çıxara, Putinin qəzəbini artıra bilərmi?

Milli Məclisin üzvü, Ana Vətən Partiyasının sədri Günay Ağamalı Musavat.com-a söylədi ki, Ermənistanın xarici siyasətində baş verən kəskin dönüş və Fransa prezidenti Emmanuel Makronun İrəvandakı son bəyanatları, Cənubi Qafqazın geosiyasi mənzərəsini ciddi şəkildə dəyişir:

“Makronun Ermənistanı açıq şəkildə Rusiyanın "peyk" dövləti statusundan çıxmış bir ölkə kimi təqdim etməsi və Qərbin təhlükəsizlik çətirini ön plana çəkməsi, əslində, Nikol Paşinyan administrasiyası üçün həm diplomatik uğur, həm də çox riskli bir "mina sahəsi" mənasına gəlir.

Xüsusilə Avropa İttifaqı ilə imzalanan bəyannamənin Ukrayna bəndi, Ermənistanın indiyə qədər balanslaşdırmağa çalışdığı Rusiya-Qərb qarşıdurmasında artıq tərəf seçdiyini rəsmiləşdirir. Mövcud mənzərə Kremlin gözündə müttəfiq itkisindən daha ağır məna daşıyaraq, Rusiyanın öz nüfuz dairəsi saydığı bölgədə ona qarşı açıq bir müqavimət xarakteri alır. Paşinyanın "məxməri inqilab"dan bəri davam edən məsafəli siyasəti indi açıq demarşa çevrilib.

Ermənistanın Ukraynanın ərazi bütövlüyünü dəstəkləyən sənədə imza atması, Moskvanın ən həssas nöqtəsinə toxunmaqdır. Putin administrasiyası Ermənistanın addımlarını KTMT və Avrasiya İqtisadi İttifaqı çərçivəsindəki öhdəliklərə xəyanət kimi qiymətləndirir. Diplomatik notlardan daha çox, Rusiyanın Ermənistanın daxili strukturuna nüfuz edən iqtisadi, enerji və hərbi rıçaqları Paşinyan hakimiyyəti üçün başlıca təhdid mənbəyi hesab olunur. Qərbin vədləri və Makronun reveransları Ermənistanın təhlükəsizlik ehtiyaclarını qısa müddətdə tam qarşılamaq gücündə deyil.

Rusiya isə "peyk" hesab etdiyi bir ölkənin Qərb cəbhəsinə keçməsini cəzasız qoymamaq üçün hibrid təzyiq vasitələrini işə sala bilər. Bura həm daxili siyasi gərginliyin artırılması, həm də sərhəddəki hərbi status-kvonun Ermənistanın əleyhinə dəyişməsinə “yaşıl işıq” yandırılması daxildir. Makronun tərifləri Paşinyanı beynəlxalq arenada "demokratiya carçısı" kimi ucaltsa da, onu Kremlin birbaşa hədəfinə çevirir və regionda "Ukraynalaşma" riskini, yəni, iki böyük gücün toqquşma poliqonuna çevrilmə ehtimalını artırır”.