Azərbaycanın İdman Gücü və Güləşçilərimizin Qitə Fəthi

Azərbaycan dünya miqyasında özünü dinamik inkişaf edən idman ölkəsi kimi təsdiqləmişdir. Bu uğurların təməlində dövlət səviyyəsində həyata keçirilən məqsədyönlü siyasət və idmançılara göstərilən ali diqqət dayanır. Aprel ayının sonunda Albaniyada keçirilən Avropa çempionatında güləşçilərimizin qazandığı tarixi zəfər və Prezident İlham Əliyevin çempionlarla görüşü bu inkişafın növbəti təzahürüdür.
Güləş Azərbaycan xalqı üçün sadəcə bir idman növü deyil, həm də qədim ənənələrə söykənən milli mədəniyyətin bir hissəsidir. Tiranada keçirilən Avropa çempionatında həm sərbəst, həm də yunan-Roma güləşi üzrə yığma komandalarımızın qazandığı komanda hesabı birinciliyi Azərbaycanın bu sahədəki liderliyini dünyaya nümayiş etdirdi. Bu, bir ölkənin eyni vaxtda hər iki növdə zirvədə qərarlaşması baxımından nadir və möhtəşəm nailiyyətdir.
Prezident İlham Əliyevin qələbə qazanan idmançıları qəbul etməsi, onlarla səmimi söhbət aparması idman ictimaiyyəti üçün ən böyük mükafatdır. Dövlət başçısı qeyd etmişdir ki, Azərbaycan idmançılarının beynəlxalq arenalarda əldə etdiyi hər bir uğur ölkənin nüfuzunu artırır və gənc nəslin vətənpərvərlik ruhunda böyüməsinə xidmət edir. Prezidentin çıxışında vurğulanan "ədalətsizliklərlə mübarizə və polad iradə" mesajı isə təkcə idmançılara deyil, bütün cəmiyyətə bir ruh yüksəkliyi aşılayır.
Müasir dövrdə idman sahəsində rəqabət getdikcə güclənir. Prezident cənab  İlham Əliyevin vurğuladığı kimi, Avropa çempionatlarında mübarizə daha gərgin xarakter alır və bəzi hallarda subyektiv amillər o cümlədən hakim səhvləri və qərəzli yanaşmalar müşahidə olunur. Bu reallıq Azərbaycan idmançıları üçün əlavə psixoloji və peşəkar hazırlıq tələb edir. Eyni zamanda, Azərbaycanın beynəlxalq idman tədbirlərinə ev sahibliyi etməsi ölkənin yumşaq güc alətlərindən biri kimi çıxış edir. Avropa Oyunları, İslam Həmrəyliyi Oyunları və digər mötəbər yarışlar ölkənin qlobal imicinə müsbət təsir göstərmişdir. Qadın güləşçilərin Avropa çempionatında medalçılar sırasında yer alması idmanın gender baxımından da inkişaf etdiyini göstərir. 
Bu, dövlət siyasətinin inklüziv xarakter daşıdığını və qadınların idmanda iştirakının təşviq edildiyini sübut edir. Gələcəkdə bu istiqamətdə daha böyük uğurların əldə olunacağı gözlənilir. Aparılan təhlil göstərir ki, Azərbaycanın idman sahəsində əldə etdiyi uğurlar təsadüfi deyil, sistemli və uzunmüddətli siyasətin nəticəsidir. Tarixi ənənələr, güclü siyasi iradə, inkişaf etmiş infrastruktur və peşəkar insan kapitalı bu uğurların əsasını təşkil edir. Avropa çempionatında qazanılan qələbə isə bu modelin effektivliyini bir daha təsdiqləyir. Mövcud tendensiyalar göstərir ki, Azərbaycan idmanı yaxın gələcəkdə də beynəlxalq arenada öz mövqeyini qoruyacaq və yeni nailiyyətlərə imza atacaq.
Gənclərimizin idman sahəsindəki uğurlarının digər mühüm əhəmiyyəti, bu uğurların gənclərin mənəvi baxımdan inkişafına da böyük təkan verməsi faktı ilə bağlıdır. Belə ki, idman arenasında əldə edilən hər qələbə uşaq və yeniyetmələrin idmana marağını artrmaqla yanaşı, ölkəmizdə idmanın kütləviləşməsinə, daha çox gəncin sağlam həyat tərzinə üstünlük verməklə zərərli vərdişlərdən uzaqda qalmasına xidmət edir. Bu baxımdan, Azərbaycan Güləş Federasiyasının fəaliyyəti də təqdirəlayiqdir. Prezident İlham Əliyev bildirib ki, federasiya xüsusilə bölgələrdə olan gənc idmançıları məşq, təlim toplanışlarına cəlb etmək üçün işini bundan sonra da təkmilləşdirəcək. Çünki bu gün hər bir bölgədə həm Olimpiya İdman kompleksləri var, eyni zamanda, güləş zalları. Ona görə bu seleksiya işi, əlbəttə ki, gələcək uğurlarımızın əsasını təşkil edəcək.
Azərbaycan güləşçilərinin Avropa zirvəsini fəth etməsi və ölkə rəhbərliyi tərəfindən yüksək səviyyədə qəbulu dövlət-idmançı birliyinin ən gözəl nümunəsidir. Bu qələbələr sübut edir ki, düzgün qurulan strategiya və milli ruh bir araya gəldikdə heç bir maneə Azərbaycan bayrağının yüksəklərdə dalğalanmasına mane ola bilməz.
 

Heydər Ağayev,
Salyan Uşaq Gənclər İdman Şahmat Məktəbinin məşqçi-müəllimi, Azərbaycan Respublikasının fəxri bədən tərbiyəsi və idman işçisi