Milli qürurun təntənəsi: Güləşçilərimizin Avropa zəfəri

Azərbaycan Respublikasında idmanın inkişafı dövlət siyasətinin əsas prioritet istiqamətlərindən biri kimi daim diqqət mərkəzində saxlanılır. Ümummilli lider Heydər Əliyev tərəfindən əsası qoyulan və milli maraqlara söykənən idman siyasəti bu gün Prezident cənab İlham Əliyev tərəfindən müasir dövrün tələblərinə uyğun şəkildə uğurla davam etdirilir. Son illər ərzində ölkəmizdə idman infrastrukturunun genişləndirilməsi, regionlarda müasir Olimpiya İdman komplekslərinin tikilib istifadəyə verilməsi, uşaq və gənclərin idmana cəlb olunması, peşəkar idmançıların hazırlanması istiqamətində həyata keçirilən ardıcıl tədbirlər Azərbaycanı beynəlxalq idman ailəsində layiqli mövqeyə yüksəldib. Bu siyasətin nəticəsidir ki, Azərbaycan idmançıları dünyanın ən mötəbər yarışlarında, o cümlədən Olimpiya Oyunlarında, dünya və Avropa çempionatlarında yüksək nəticələr göstərərək dövlətimizin bayrağını zirvələrə qaldırırlar.
İdman sahəsinə göstərilən bu diqqət və qayğı, eyni zamanda, idmançıların sosial rifahının yaxşılaşdırılması, onların məşq və hazırlıq şəraitinin ən yüksək səviyyədə təmin olunması ilə müşayiət olunur. Dövlət başçısının idmançılarla mütəmadi görüşləri, onların uğurlarını yüksək qiymətləndirməsi və yeni qələbələrə ruhlandırması idman ictimaiyyəti tərəfindən böyük rəğbətlə qarşılanır. Məhz bu diqqət və dəstək Azərbaycan idmanının davamlı inkişafını təmin edən əsas amillərdən biri kimi çıxış edir.
Bu baxımdan, Prezident İlham Əliyev tərəfindən Avropa çempionatında komanda hesabında çempion olan Azərbaycan güləşçilərinin qəbul edilməsi mühüm hadisə kimi yadda qalıb. Dövlət başçısı görüş zamanı milli komandamızı Albaniyanın paytaxtı Tirana şəhərində keçirilmiş Avropa çempionatında qazandığı möhtəşəm qələbə münasibətilə səmimi-qəlbdən təbrik edib. Qeyd olunub ki, bu qələbə yalnız idman uğuru deyil, eyni zamanda bütün Azərbaycan xalqının qürur mənbəyidir. Prezident vurğulayıb ki, milli komandamızın əldə etdiyi bu nailiyyət hər bir azərbaycanlını sevindirir və ölkəmizin idman sahəsindəki gücünü bir daha təsdiqləyir.
Dövlət başçısı çıxışında bildirib ki, Azərbaycan güləşçiləri bir daha sübut etdilər ki, onlar Avropanın ən güclüləri sırasındadırlar. Avropa çempionatında komanda hesabında birinci olmaq böyük nailiyyətdir və bu uğur heç də təsadüfi deyil. Xüsusilə qeyd edilib ki, hazırda dünyada və Avropada güləş üzrə rəqabət xeyli güclənib, bir çox ölkələrdən olan tanınmış və təcrübəli idmançılar yüksək nəticələr nümayiş etdirirlər. Belə bir şəraitdə qazanılan qələbə Azərbaycan güləş məktəbinin gücünü, idmançılarımızın peşəkarlığını və əzmkarlığını açıq şəkildə nümayiş etdirir. Prezident bəzi yarışları şəxsən izlədiyini qeyd edərək vurğulayıb ki, güləşçilərimiz hər bir görüşdə böyük iradə və ustalıq nümayiş etdirərək rəqiblərini ədalətli mübarizədə məğlub ediblər.
Çıxış zamanı xüsusi olaraq vurğulanıb ki, bu uğur Azərbaycan güləşinin davamlı inkişafının məntiqi nəticəsidir. Ölkəmizdə güləş idman növü qədim və zəngin ənənələrə malikdir və bu ənənələr bu gün də uğurla yaşadılır. Sevindirici haldır ki, bu sahədə nəsillər arasında uğurlu varislik təmin olunub. Tanınmış, təcrübəli idmançılarla yanaşı, gənc güləşçilər də beynəlxalq arenada böyük uğurlara imza atırlar. Bu isə ölkədə məşq prosesinin və seleksiya işinin yüksək səviyyədə qurulduğunu göstərir. Dövlət başçısı bu münasibətlə federasiya rəhbərliyini, məşqçiləri və bütün idmançıları təbrik edərək onların əməyini yüksək qiymətləndirib.
Prezident həmçinin qeyd edib ki, beynəlxalq arenalarda Azərbaycan bayrağının ucaldılması, Dövlət himninin səsləndirilməsi hər bir vətəndaş üçün böyük qürur mənbəyidir. İdmançılarımızın qazandığı qələbələr xalqımıza sevinc bəxş etməklə yanaşı, gənc nəslin vətənpərvərlik ruhunda formalaşmasında mühüm rol oynayır. İdmanın cəmiyyət həyatında mühüm yer tutduğu qeyd olunaraq bildirilib ki, son illər bu sahədə əldə olunan uğurlar Azərbaycanın ümumi inkişafının tərkib hissəsidir.
Görüş zamanı federasiyanın fəaliyyəti də xüsusi qeyd olunub. Bildirilib ki, bu gün Azərbaycan güləş federasiyasında tanınmış idmançılar, Olimpiya çempionları rəhbər vəzifələrdə təmsil olunurlar. Eyni zamanda, məşqçi heyəti də vaxtilə böyük uğurlar qazanmış idmançılardan formalaşıb. Prezident vurğulayıb ki, bu gün məşqçi kimi fəaliyyət göstərən şəxslərin yarışlarını vaxtilə özü də izləyib, onlara həm ölkə daxilində, həm də beynəlxalq yarışlarda azarkeşlik edib. Bu gün isə həmin idmançıların yetirmələri yeni qələbələrlə ölkəmizi sevindirirlər. Bu, nəsillər arasında sağlam və davamlı inkişafın, təcrübənin ötürülməsinin bariz nümunəsidir. Nəsillər dəyişsə də, Azərbaycan idmanının uğurları dəyişməz qalır və ildən-ilə daha da möhkəmlənir.
Dövlət başçısı çıxışında gələcək hədəflərə də toxunaraq qeyd edib ki, idmanın inkişafı bundan sonra da diqqət mərkəzində saxlanılacaq. Xüsusilə regionlarda gənc istedadların aşkar olunması, onların peşəkar səviyyədə hazırlanması və beynəlxalq yarışlara çıxarılması istiqamətində işlər daha da gücləndiriləcək. Ölkəmizin bütün bölgələrində fəaliyyət göstərən Olimpiya İdman kompleksləri və müasir güləş zalları bu baxımdan geniş imkanlar yaradır. Seleksiya işinin düzgün təşkili gələcək uğurların əsasını təşkil edir və bu istiqamətdə görülən tədbirlər Azərbaycan idmanının davamlı inkişafını təmin edəcək.
Sonda bir daha qeyd olunub ki, Azərbaycan idmançılarının beynəlxalq arenada qazandığı uğurlar dövlətimizin gücünü, xalqımızın iradəsini və milli birliyini nümayiş etdirir. Güləşçilərimizin Avropa çempionatında əldə etdiyi bu möhtəşəm qələbə ölkəmizin idman tarixində növbəti parlaq səhifə kimi qalacaq. Əminliklə vurğulanıb ki, dövlətin diqqət və qayğısı, idmançıların əzmkarlığı və peşəkarlığı sayəsində Azərbaycan idmanı bundan sonra da yeni zirvələr fəth edəcək, üçrəngli bayrağımız beynəlxalq arenalarda daim yüksəklərdə dalğalanacaq.

Xanım Qədirova,
Salyan rayon Uşaq Gənclər İdman Şahmat Məktəbinin məşqçi-müəllimi, YAP fəalı