Qələbə əzmi və milli güc: Azərbaycan idmanının inkişaf mənzərəsi

Son illər Azərbaycan idmanı keyfiyyətcə yeni mərhələyə qədəm qoyaraq həm nəticələrin sabitliyi, həm də coğrafiyasının genişlənməsi ilə diqqət çəkir. Artıq təkcə ayrı-ayrı fərdi uğurlardan deyil, sistemli və ardıcıl nailiyyətlərdən danışmaq mümkündür. Müxtəlif idman növlərində əldə olunan qələbələr, beynəlxalq yarışlarda yüksələn nəticələr və formalaşan güclü idman məktəbləri ölkəmizin bu sahədə qazandığı təcrübənin və məqsədyönlü fəaliyyətin nəticəsidir. Bu inkişafın fonunda Azərbaycan idmançılarının çıxışları yalnız idman hadisəsi kimi deyil, həm də ölkənin ümumi potensialının, iradəsinin və təşkilatlanma qabiliyyətinin göstəricisi kimi dəyərləndirilir.
Məhz belə bir uğurlu mərhələdə Ölkə Prezidenti cənab İlham Əliyev Avropa çempionatında komanda hesabında çempion olan güləşçilərlə görüşərək onların nailiyyətlərini yüksək qiymətləndirib. Görüş zamanı dövlət başçısı Azərbaycan idmanının ümumi mənzərəsinə toxunaraq vurğulayıb ki, bu gün idmançılarımız dünyanın ən mötəbər yarışlarında ölkəmizi layiqincə təmsil edirlər. Onun sözləri ilə desək, həm Olimpiya Oyunlarında, həm dünya və Avropa çempionatlarında əldə olunan nəticələr artıq təsadüfi xarakter daşımır, bu, düşünülmüş siyasətin və uzunmüddətli hazırlığın nəticəsidir.
Prezident çıxışında idmanın ayrılmaz xüsusiyyətinə də diqqət çəkərək bildirib ki, uğurlarla yanaşı, məğlubiyyətlər də qaçılmazdır. Lakin əsas məqam idmançılarda olan güclü qələbə əzmidir. “Əsas odur ki, idmançılarımızda qələbə əzmi çox güclüdür” fikri ilə dövlət başçısı idmançılarımızın daxili motivasiyasını və mübarizə ruhunu xüsusi vurğulayıb. Bu keyfiyyətin isə ümumilikdə Azərbaycan cəmiyyətində formalaşan qalib ruhun bir parçası olduğu qeyd edilib. Bu gün Azərbaycanın qalib dövlət və qalib xalq kimi yaşaması idman sahəsindəki uğurlarda da öz əksini tapır.
Görüşdə diqqət çəkilən əsas məqamlardan biri də idmanın dayanıqlı inkişafının təmin olunması olub. İlham Əliyev uzun illər idman sahəsi ilə sıx bağlı olduğunu xatırladaraq bildirib ki, bu müddət ərzində bir neçə nəsil idmançının yetişməsi, uğurların davamlı xarakter alması və idman ənənələrinin qorunub saxlanılması onun bilavasitə müşahidəsində baş verib. Bu baxımdan, Azərbaycanın idman sahəsində qazandığı nailiyyətlər epizodik deyil, ardıcıl və planlı inkişafın nəticəsidir.
Söhbət zamanı ölkəmizin beynəlxalq idman tədbirlərinə ev sahibliyi etməsi də xüsusi vurğulanıb. Bildirilib ki, Azərbaycanda keçirilən yarışlar təkcə təşkilati uğur deyil, eyni zamanda idmanın kütləviliyinin artmasına xidmət edir. Avropa Oyunları və İslam Həmrəyliyi Oyunları kimi mötəbər tədbirlərin yüksək səviyyədə təşkili ölkəmizin bu sahədə böyük təcrübəyə malik olduğunu göstərir. Eyni zamanda MDB Oyunları yarışlarının bölgələrdə keçirilməsi Azərbaycanın idman infrastrukturunun genişliyini və potensialını açıq şəkildə nümayiş etdirib. Bu fakt bir daha təsdiqləyir ki, idmana göstərilən qayğı sistemli xarakter daşıyır və ölkənin bütün bölgələrini əhatə edir.
Avropa çempionatında əldə olunan nəticələr isə görüşün əsas mövzularından biri olub. Dövlət başçısı bu qələbəni xüsusi vurğulayaraq qeyd edib ki, həm yunan-Roma, həm də sərbəst güləş növlərində komanda hesabında birinci olmaq böyük nailiyyətdir və bunu “tarixi qələbə” kimi dəyərləndirmək olar. Bu nəticə Azərbaycan güləş məktəbinin gücünü, məşq prosesinin düzgün qurulduğunu və idmançıların yüksək hazırlıq səviyyəsini bir daha sübut edir.
Qadın güləşçilərin çıxışı da müsbət qiymətləndirilib. Qızların medalçılar sırasında yer alması bu sahədə inkişafın olduğunu göstərir. Dövlət başçısı bu istiqamətdə nikbinliyini ifadə edərək bildirib ki, “əminəm ki, gələcəkdə də qızlar qızıl medal qazanacaqlar”. Bu fikir qadın güləşinin perspektivinə olan inamın göstəricisidir. Eyni zamanda qeyd olunub ki, bəzi hallarda daha yüksək nəticələr əldə etmək mümkün olsa da, ümumi mənzərə müsbətdir və inkişaf dinamikası açıq şəkildə görünür.
Görüş zamanı komanda daxilindəki birlik və sağlam mühit də xüsusi qeyd olunub. Prezident vurğulayıb ki, milli komandada hökm sürən ruh yüksəkliyi, qarşılıqlı dəstək və vahid məqsəd uğrunda birləşmək bacarığı uğurların əsas amillərindən biridir. İdmançıların bir-birinin nəticəsinə sevinməsi, komanda kimi çıxış etməsi Azərbaycan idmanının gücünü artıran mühüm keyfiyyətlərdəndir.
Sonda İlham Əliyev idmançıları bir daha təbrik edərək onların gələcək yarışlarda da yüksək nəticələr göstərəcəklərinə əminliyini ifadə edib. Qeyd olunub ki, Azərbaycan idmanının qarşısında yeni hədəflər dayanır və bu uğurlar həmin hədəflərə çatmaq üçün möhkəm zəmin yaradır. Əldə olunan nailiyyətlər göstərir ki, düzgün qurulmuş siyasət, güclü idman məktəbi və vətənpərvər idmançılar sayəsində Azərbaycan idmanı bundan sonra da yüksələn xətlə inkişaf edəcək, ölkəmizin üçrəngli bayrağı beynəlxalq arenalarda daha da ucalacaq.

Fariz Sadıqlı,
Salyan rayonu üzrə Gənclər və İdman sektorunun baş məsləhətçisi, YAP fəalı