Azərbaycan regionun gələcək inkişafına töhfə verir

Azərbaycan ilə Ermənistan arasında münasibətlər uzun illər ərzində mürəkkəb siyasi və hərbi qarşıdurma şəraitində inkişaf edib. Otuz ildən artıq müddətdə Ermənistanın Azərbaycana qarşı həyata keçirdiyi işğal siyasəti regionda sabitliyin pozulmasına, təhlükəsizlik mühitinin zəifləməsinə və əməkdaşlıq imkanlarının məhdudlaşmasına səbəb olmuşdu. Azərbaycan torpaqlarının işğal altında saxlanılması, bir milyondan artıq soydaşımızın doğma yurdlarından didərgin salınması və beynəlxalq hüququn norma və prinsiplərinin kobud şəkildə pozulması Cənubi Qafqazda uzun illər davam edən gərginliyin əsas səbəblərindən biri idi. Buna baxmayaraq, Azərbaycan dövləti hər zaman beynəlxalq hüquqa əsaslanan ədalətli mövqe nümayiş etdirərək sülhün və danışıqların tərəfdarı olduğunu ortaya qoyub.
2020-ci ildə əldə olunan tarixi Zəfər isə regionda tamamilə yeni siyasi reallıqlar formalaşdırdı. Prezident İlham Əliyevin rəhbərliyi ilə Azərbaycan Ordusunun qazandığı möhtəşəm Qələbə nəticəsində ölkəmizin ərazi bütövlüyü və suverenliyi təmin edildi, uzun illər davam edən işğala son qoyuldu. Tarixi Zəfərdən sonra Azərbaycan bölgədə davamlı sülhün təmin olunması, kommunikasiyaların açılması və regional əməkdaşlığın inkişafı istiqamətində yeni təşəbbüslərlə çıxış etməyə başladı. Prezident İlham Əliyevin dəfələrlə vurğuladığı kimi, Azərbaycan müharibə səhifəsini bağlayaraq regionda əməkdaşlıq və inkişaf dövrünün başlanmasını istəyir.
Son dövrlərdə Azərbaycan və Ermənistan arasında münasibətlərin normallaşdırılması istiqamətində mühüm addımlar atılıb. Xüsusilə ABŞ Prezidenti Donald Trampın təşəbbüsü ilə formalaşan sülh gündəliyi regionda yeni əməkdaşlıq imkanlarının yaranmasına əlavə təkan verib. Vaşinqtonda keçirilən görüşlər, imzalanan Birgə Bəyannamə və tərəflər arasında aparılan danışıqlar artıq sülh prosesinin real mərhələyə keçdiyini göstərir. Bu gün həm Azərbaycan, həm də Ermənistan qarşıdurmadan əməkdaşlığa keçidin faydalarını görməyə başlayır.
Azərbaycanın təşəbbüsü ilə regionda nəqliyyat və kommunikasiya əlaqələrinin bərpası istiqamətində həyata keçirilən layihələr xüsusi əhəmiyyət daşıyır. Bu baxımdan Zəngəzur dəhlizi bölgənin gələcək inkişafı üçün mühüm strateji layihələrdən biri hesab olunur. Zəngəzur dəhlizi Azərbaycanın əsas hissəsini Naxçıvan Muxtar Respublikası ilə birləşdirməklə yanaşı, bütövlükdə Orta Dəhlizin əsas komponentlərindən birinə çevriləcək. Bu layihə yalnız region dövlətləri üçün deyil, Avropa ilə Asiya arasında iqtisadi və ticari əlaqələrin genişlənməsi baxımından da böyük əhəmiyyətə malikdir. Azərbaycan bu layihənin həyata keçirilməsi ilə bölgədə iqtisadi inteqrasiyanın və uzunmüddətli sabitliyin möhkəmlənməsinə mühüm töhfə verir.
Sülh prosesinin praktiki nəticələri artıq konkret faktlarla müşahidə olunur. Azərbaycan tərəfindən uzun illər qüvvədə olmuş tranzit məhdudiyyətlərinin aradan qaldırılması nəticəsində Ermənistan istiqamətində yeni yükdaşımalar həyata keçirilməyə başlanıb. Hazırda Azərbaycan ərazisi vasitəsilə Ermənistana on minlərlə ton yük çatdırılıb. Eyni zamanda, Azərbaycan ilk dəfə olaraq Ermənistana benzin və dizel yanacağının ixracına başlayıb. Bu addımlar regionda iqtisadi münasibətlərin formalaşması, qarşılıqlı etimadın möhkəmləndirilməsi və gələcək əməkdaşlıq perspektivlərinin genişlənməsi baxımından mühüm əhəmiyyət daşıyır.
2026-cı il 4 may tarixində “Avropa Siyasi Birliyi”nin 8-ci Zirvə toplantısında videobağlantı formatında iştirak edən Prezident İlham Əliyev məhz bu məsələlərə toxunaraq beynəlxalq ictimaiyyətə mühüm mesajlar verib. Dövlət başçısı çıxışında bildirib ki, artıq regionda yeni reallıq formalaşıb və Azərbaycan sülh gündəliyinə sadiq qalaraq əməkdaşlığın inkişafı istiqamətində konkret addımlar atır. Prezident İlham Əliyev qeyd edib ki, Ermənistanın “Avropa Siyasi Birliyi”nin 2028-ci ildə Azərbaycanda keçirilməsi təşəbbüsünü dəstəkləməsi iki ölkə arasında münasibətlərin normallaşması baxımından mühüm siyasi göstəricidir.
Dövlət başçısı çıxışında vurğulayıb ki, bu gün regionda sülhün real nəticələri artıq açıq şəkildə görünür. Prezident İlham Əliyev bildirib ki, Azərbaycan 1990-cı illərdən etibarən tətbiq olunan tranzit məhdudiyyətlərini birtərəfli qaydada aradan qaldırıb və bu qərar nəticəsində Azərbaycan ərazisi vasitəsilə Ermənistana 28 min ton yük çatdırılıb. Eyni zamanda, Azərbaycandan Ermənistana 12 min ton neft məhsulu ixrac olunub. Prezident İlham Əliyev qeyd edib ki, bütün bunlar bölgədə qarşılıqlı münasibətlərin yeni mərhələyə qədəm qoyduğunu və sülhün artıq praktiki nəticələr verdiyini göstərir.
Prezident İlham Əliyev çıxışında onu da diqqətə çatdırıb ki, Azərbaycan regionda sabitliyin və təhlükəsizliyin təmin olunmasına bundan sonra da töhfə verməyə davam edəcək. Dövlət başçısının səsləndirdiyi fikirlər bir daha nümayiş etdirdi ki, Azərbaycan postmünaqişə dövründə yalnız öz milli maraqlarını deyil, bütövlükdə regionun gələcək inkişafını və əməkdaşlıq imkanlarını əsas prioritetlərdən biri kimi müəyyənləşdirib. Bu gün həyata keçirilən layihələr və atılan addımlar Cənubi Qafqazın qarşıdurma məkanından əməkdaşlıq və inkişaf bölgəsinə çevrilməsinə xidmət edir.

Seyidağa Ağayev,
YAP Salyan rayon təşkilatının gənc fəalı