Azərbaycan beynəlxalq münasibətlərdə ədalətli yanaşmanın tərəfdarıdır

Müasir dövrdə Azərbaycan beynəlxalq müstəvidə müstəqil siyasəti, milli maraqlara əsaslanan qətiyyətli mövqeyi və regionda yaratdığı yeni reallıqlarla diqqət mərkəzindədir. Son illərdə ölkəmizin əldə etdiyi siyasi, iqtisadi və hərbi uğurlar, xüsusilə ərazi bütövlüyünün və suverenliyinin tam bərpa olunması Azərbaycanın beynəlxalq nüfuzunu daha da artırıb. Prezident İlham Əliyevin rəhbərliyi ilə həyata keçirilən uğurlu siyasət nəticəsində Azərbaycan Cənubi Qafqazda sabitlik və təhlükəsizliyin əsas təminatçılarından birinə çevrilib. Məhz bu uğurlar bəzi beynəlxalq dairələr tərəfindən obyektiv qarşılanmır, müəyyən Avropa institutlarında Azərbaycana qarşı qərəzli münasibət, ikili standartlar və siyasi təzyiq cəhdləri açıq şəkildə müşahidə olunur. Xüsusilə ölkəmizin müstəqil mövqeyi, milli maraqları qətiyyətlə müdafiə etməsi və heç bir xarici təsir altında siyasət yürütməməsi müəyyən dairələri ciddi şəkildə narahat edir.
Azərbaycanın regionda yaratdığı yeni siyasi reallıqlar, separatizmə son qoyması və uzun illər beynəlxalq təşkilatlar tərəfindən icra edilməyən qərarları öz gücü hesabına təmin etməsi bəzi Qərb institutlarının ölkəmizə münasibətində açıq şəkildə özünü göstərən qısqanclıq və qərəz meyillərini daha da gücləndirib. Halbuki Azərbaycan bu gün yalnız öz milli maraqlarını təmin edən dövlət deyil, eyni zamanda regionda əməkdaşlıq, dialoq və sülh təşəbbüsləri ilə çıxış edən etibarlı tərəfdaşdır. Buna baxmayaraq, bəzi Avropa təsisatları reallığı qəbul etmək əvəzinə, Azərbaycana qarşı əsassız ittihamlar səsləndirməyə, ölkəmizin beynəlxalq nüfuzuna xələl gətirməyə çalışırlar.
2026-cı il 4 may tarixində “Avropa Siyasi Birliyi”nin 8-ci Zirvə toplantısında videobağlantı formatında iştirak edən Prezident İlham Əliyev çıxışı zamanı məhz bu məsələlərə toxunaraq mühüm mesajlar səsləndirib. Dövlət başçısı qeyd edib ki, Azərbaycan regionda sülhün və əməkdaşlığın təmin olunması istiqamətində ardıcıl addımlar atsa da, bəzi Avropa institutları Ermənistan-Azərbaycan münasibətlərinə yanaşmada obyektiv və ədalətli mövqe nümayiş etdirmirlər. Prezident İlham Əliyev bildirib ki, bu gün regionda formalaşan yeni münasibətlər sistemi artıq öz real nəticələrini verməkdədir və həm Azərbaycan, həm də Ermənistan sülhün praktik faydalarını görməyə başlayıb.
Dövlət başçısı çıxışında vurğulayıb ki, sülh prosesinin mühüm nəticələrindən biri kommunikasiya və nəqliyyat əlaqələrinin bərpasıdır. Prezident İlham Əliyev qeyd edib ki, “Trampın Beynəlxalq Sülh və Rifah Marşrutu” Azərbaycanın əsas hissəsini Naxçıvanla birləşdirəcək və eyni zamanda Orta Dəhlizin mühüm tərkib hissəsinə çevriləcək. Bu layihə yalnız region ölkələri üçün deyil, bütövlükdə Avrasiya məkanı üçün strateji əhəmiyyət daşıyır. Dövlət başçısı diqqətə çatdırıb ki, Azərbaycan bütün bu təşəbbüslərlə bölgədə uzunmüddətli sabitliyin və iqtisadi inteqrasiyanın təmin olunmasına töhfə verir.
Prezident İlham Əliyev çıxışında Avropa Komissiyasının Ermənistan-Azərbaycan sülh prosesinə münasibətdə nümayiş etdirdiyi konstruktiv yanaşmanı yüksək qiymətləndirib və təşəkkürünü ifadə edib. Bununla yanaşı, dövlət başçısı təəssüf hissi ilə vurğulayıb ki, bütün Avropa institutları eyni mövqedən çıxış etmir. Prezident xüsusilə Avropa Parlamenti və Avropa Şurası Parlament Assambleyasının fəaliyyətində Azərbaycana münasibətdə ikili standartların və qərəzli yanaşmanın açıq şəkildə hiss olunduğunu bildirib.
Dövlət başçısı qeyd edib ki, Azərbaycan 2001-ci ildən Avropa Şurasının üzvüdür və bu müddət ərzində təşkilat daxilində daim fəal əməkdaşlıq nümayiş etdirib. Prezident İlham Əliyev xatırladıb ki, Azərbaycan nümayəndə heyətinə uzun illər ərzində heç bir məhdudiyyət tətbiq edilməyib. Lakin Azərbaycanın 2023-cü ilin sentyabr ayında Qarabağda separatizmə son qoyaraq öz suverenliyini tam təmin etməsindən qısa müddət sonra AŞPA tərəfindən nümayəndə heyətimizə qarşı sanksiya xarakterli addımlar atılıb. Prezident İlham Əliyev vurğulayıb ki, Azərbaycan bununla BMT Təhlükəsizlik Şurasının illərlə kağız üzərində qalan qətnamələrinin icrasını təmin edib və ölkəmizin ərazi bütövlüyü digər bütün dövlətlərin ərazi bütövlüyü qədər eyni dəyərə malikdir.
Prezident İlham Əliyev çıxışında Avropa Parlamentinın Azərbaycana qarşı fəaliyyətini də sərt şəkildə tənqid edib. Dövlət başçısı bildirib ki, İkinci Qarabağ müharibəsindən sonra Avropa Parlamenti tərəfindən Azərbaycan əleyhinə ardıcıl şəkildə qərəzli və əsassız qətnamələr qəbul olunub. Prezident İlham Əliyev qeyd edib ki, bu qurum Avropada artan ksenofobiya, islamofobiya, anti-semitizm, miqrasiya problemləri, sosial böhran və evsiz insanların vəziyyəti kimi ciddi məsələlərin həlli ilə məşğul olmaq əvəzinə, bütün diqqətini Azərbaycana qarşı qarayaxma kampaniyasına yönəldib. Dövlət başçısının sözlərinə görə, bunun əsas səbəbi Azərbaycanın öz suverenliyini təmin etməsi, separatçılığı aradan qaldırması və milli maraqlarını qətiyyətlə müdafiə etməsidir.
Prezident İlham Əliyev diqqətə çatdırıb ki, yaranmış vəziyyətlə əlaqədar olaraq Azərbaycan parlamenti mayın 1-də Avropa Parlamenti ilə əməkdaşlığın dayandırılması, Avropa İttifaqı-Azərbaycan Parlament Əməkdaşlığı Komitəsində iştirakın dayandırılması və Avronest Parlament Assambleyasında üzvlüklə bağlı prosedurlara yenidən baxılması haqqında qərar qəbul edib. Dövlət başçısı bildirib ki, “Avropa Siyasi Birliyi” platforması açıq fikir mübadiləsi üçün mühüm imkan yaratdığına görə o, bu məsələləri həmkarlarının diqqətinə çatdırmağı vacib hesab edib. Prezident İlham Əliyevin çıxışı bir daha göstərdi ki, Azərbaycan beynəlxalq münasibətlər sistemində ədalətli yanaşmanın, qarşılıqlı hörmətin və bərabərhüquqlu əməkdaşlığın tərəfdarıdır və ölkəmizə qarşı tətbiq olunan ikili standartları heç vaxt qəbul etməyəcək.

Vüqar Ağayev
YAP Salyan rayon təşkilatının məsləhətçisi