"Zəngilan rayonunun işğaldan azad edilməsi 44 günlük şanlı Zəfərimizin ən parlaq səhifələrindən biridir. Zəngilan rayonu coğrafi mövqeyi baxımından strateji əhəmiyyətli bölgəmizdir".

Bunu Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlanasında qeyd edib ki, Zəngilan Hava Limanın istifadəyə verilməsi və Zəngəzur dəhlizinin buradan keçməsi rayonun gələcək inkişafı haqqında hər birimizdə aydın fikir formalaşdırır:

"Rayonun ərazisi şərqdən Həkəri çayından Mehri dağ silsiləsinə qədər olan olan ərazini əhatə edir. Şimaldan Qubadlı, Şərqdən Cəbrayıl rayonu, cənubdan Araz çayı boyunca İran İslam Respublikası, qərbdən isə Ermənistanın Mehri və Qafan rayonları ilə həmsərhəddir. Bilindiyi kimi, Füzuli və Cəbrayıl rayonları Ermənistan silahlı qüvvələri tərəfindən işğal olunduqdan sonra zəngilanlılar mühasirə şəraitində olmasına baxmayaraq 67 gün misilsiz qəhramanlıqlar göstərməklə son ana qədər rayonu müdafiə etmişdir. 1993 - cu ildə Ermənistan tərəfindən işğal edilən Zəngilan rayonu 27 il ərzində dağıntılara, vandallığa və təbii sərvətlərinin talan olunmasına məruz qalmışdır. Ermənilər Zəngilanda yerləşən bütün dini, tarixi abidələri dağıtmış, flora və faunanı, meşə təsərrüfatını məhv etmişdir. Lakin Azərbaycan xalqı, onun Ali Baş Komandanı cənab İlham Əliyev heç vaxt işğalla barışmadı. Ulu Öndər Heydər Əliyevin irsi, onun strateji yol xəritəsi və cənab Prezident İlham Əliyevin prinsipial, qətiyyətliliyi, liderliyi bizləri Zəngilanın simasında doğma Qarabağımıza hər keçən gün daha da yaxınlaşdırdı. Nəhayət 2020-ci il oktyabrın 20-də qəhraman Azərbaycan Ordusu Müzəffər Ali Baş Komandan İlham Əliyevin rəhbərliyi ilə Zəngilan şəhərini və rayonun əksər kəndlərini azad etdi. 2020-ci ilin oktyabr ayının sonuna yaxın Zəngilan rayonunun bütün ərazisi Azərbaycan ordusunun nəzarətinə keçdi.
Zəngilan zəfəri hərbi-siyasi baxımdan böyük əhəmiyyət daşıyır. Rayonun azad olunması ilə ölkəmiz Zəngəzur istiqamətində mühüm üstünlük qazandı. Eyni zamanda, Ermənistanın cənubunda yerləşən təchizat xəttləri, strateji obyektlər ordumuzun nəzarəti altına alındı. Paralel olaraq da bu uğur əsgərimizə Qubadlı və Laçının azadlığına gedən yolun qapılarını açdı. Bu gün hər bir azərbaycanlı qürurla Zəngilan rayonunun dirçəlişinə və yenidənqurulmasına şahidlik edir. Böyük Qayıdış Proqramı çərçivəsində qısa müddət ərzində görülən genişmiqyaslı infrastruktur layihələri, Ağıllı kənd və şəhər konsepsiyası əsasında müasir yaşayış massivləri birliyimizin, gücümüzün rəmzinə çevrilmişdir. Ağalı kəndi işğaldan azad edilmiş yurdumuzda həyatın yenidən canlanmasının simvoluna çevrilmişdir. Zəngilan Hava Limanın istifadəyə verilməsi və Zəngəzur dəhlizinin buradan keçməsi rayonun gələcək inkişafı haqqında hər birimizdə aydın fikir formalaşdırır. Zəngilan zəfəri milli qürurun simvolu kimi Azərbaycan tarixinə qızıl hərflərlə yazıldı".