8 Noyabr: təqvimin qızıl hərflərlə yazılmış tarixi

Dövlət başçısı İlham Əliyevin “Mən işğal dövründə deyirdim, hər birimiz azadlıq gününü, bu müqəddəs günü öz işimizlə yaxınlaşdırmalıyıq, yaxınlaşdırırdıq və yaxınlaşdırdıq” çağırışı tarixi Zəfərimizə gedən yolun aydın ifadəsidir.  Cənab İlham Əliyev ən yüksək tribunalardan Azərbaycan xalqının və dövlətinin heç vaxt işğal faktı ilə barışmayacağını, işğalçı Ermənistanın bütün təxribatlarının qarşısının qətiyyətlə alınacağını, ölkəmizin ərazi bütövlüyünün bərpa ediləcəyini dəfələrlə bəyan etmişdi. 2016-cı ildə baş vermiş Aprel döyüşləri, 2018-ci ildə keçirilmiş uğurlu Günnüt əməliyyatı, 2020-ci ilin iyul ayındakı Tovuz döyüşləri Azərbaycan dövlətinin iradəsini, ordumuzun gücünü və xalqımızın həmrəyliyini bütün dünyaya göstərmişdi. Amma bütün bunlardan nəticə çıxarmayan Ermənistan 2020-ci il 27 sentyabr tarixində növbəti hərbi təxribat törətdi, Azərbaycanın yaşayış məntəqələrini və döyüş mövqelərini şiddətli artilleriya atəşinə tutdu. Düşmənin hərbi təxribatını dəf etmək və təcavüzünə son qoymaq məqsədilə Prezident, Silahlı Qüvvələrin Ali Baş Komandanı İlham Əliyev  bütün cəbhə boyu əks-hücuma keçmək əmri verdi. “Dəmir yumruq” əməliyyatının ilk saatlarından cəbhə xəttindən sevindirici xəbərlər gəlməyə başladı. 44 gün ərzində hər gün Azərbaycan Ordusu irəli gedirdi, hər gün yeni şəhərlər, kəndlər, qəsəbələr, yüksəkliklər azad edilirdi. Azərbaycan əsgəri, Azərbaycan zabiti bir amalla vuruşurdu ki, işğala son qoyulsun və tarixi ədalət zəfər çalsın. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Azərbaycan Ordusunun sentyabrın 27-də Qarabağda başladığı uğurlu əks-hücum əməliyyatı nəticəsində noyabrın 9-dək 5 şəhər, 4 qəsəbə və 286 kənd işğaldan azad edildi. Cəbrayıl şəhəri və rayonun 90 kəndi, Füzuli şəhəri və rayonun 53 kəndi, Zəngilan şəhəri, rayonun Mincivan, Ağbənd, Bartaz qəsəbələri və 52 kəndi, Xocavənd rayonunun Hadrut qəsəbəsi və 35 kəndi, Tərtər rayonunun 3 kəndi, Qubadlı şəhəri və rayonun 41 kəndi, Xocalı rayonunun 9 kəndi, Şuşa şəhəri, Laçın rayonunun 3 kəndi, həmçinin Ağdərə və Murovdağ istiqamətlərində bir neçə strateji yüksəkliyi, Zəngilanda isə Bartaz, Sığırt, Şükürataz yüksəkləri və daha 5 adsız yüksəklik azad olundu.
Azərbaycan Ordusu  müharibədə qüdrətini nümayiş etdirdi, peşəkarlıq nümunəsi ortaya qoydu. Ermənistanın 30 il ərzində mürəkkəb müdafiə mövqeləri qurduğu torpaqlarımızın cəmi 44 gün ərzində azad edilməsi dünya hərb tarixinin ən möhtəşəm hadisələrindən birinə  çevrildi. Ordumuz böyük şücaət göstərərək, çətin iqlim və ağır relyefdə hər qarış torpağımız uğrunda qəhrəmancasına mübarizə apardı, bütün növ döyüş qabiliyyətinə hazır olduğunu nümayiş etdirdi.  Bütün dünya Ali Baş Komandan İlham Əliyevin rəhbərliyi ilə Azərbaycan hərbçilərinin qəhrəmanlıqlarından bəhs etdi. Bu müharibədə strateji və taktiki hərbi əməliyyatlarımız dünya hərb tarixində yeni bir səhifə açdı. Təsadüfi deyil ki, Silahlı Qüvvələrimizin həyata keçirdiyi hərbi əməliyyatların strategiyası və taktikası tanınmış ekspertlər tərəfindən araşdırılır, dünyanın aparıcı hərbi məktəblərində təhlil və tədris olunur. ABŞ Hərbi Akademiyası və Pentaqonun rəsmiləri Azərbaycan Ordusunun hərbi əməliyyatlarının öyrənilməsi zərurətini qeyd edirlər. Aparıcı Qərb mətbu orqanlarında, habelə ABŞ-ın Milli Müharibə Kollecinin (National War College) və Seton Hall Universitetinin Diplomatiya və Beynəlxalq Münasibətlər Məktəbinin analitik nəşrlərində Azərbaycan Ordusunun hərbi taktikası öyrənilərkən belə qənaətə gəlinib ki, Ordumuzun qarşısında hətta dünyanın aparıcı ölkəsi olsaydı belə onun da heç bir şansı olmayacaqdı.
Prezident İlham Əliyevin 2020-ci il 3 dekabr tarixli Sərəncamı ilə Zəfər Günü təsis edildi. Hər il noyabrın 8-i Azərbaycanda  Zəfər Günü kimi təntənəli şəkildə qeyd edilir. Zəfərdən başlanan yeni qürur tariximiz davam edir.  Azərbaycan müharibə başa çatandan dərhal sonra işğaldan azad olunmuş ərazilərdə abadlıq və quruculuq işlərinə başlayaraq dünya hərb tarixində yenə də ilkə imza atdı. Yeni avtomobil yolları çəkildi, hava limanları tikildi, müasir kənd və qəsəbələr salınır. Prezident İlham Əliyev işğaldan azad olunan ərazilərimizdə aparılan bərpa-quruculuq işlərinə  özü nəzarət edir. Mütəmadi olaraq həmin ərazilərə səfərlər edir, görülən işlərlə yaxından tanış olur, yeni infrastruktur layihələrinin açılış və  təməlqoyma mərasimlərində iştirak edir. Hazırda azad Qarabağımız və azad Şərqi Zəngəzurumuz cənnət məkana çevrilir. Dövlətimizin gücü, qüdrəti, Müzəffər Ali Baş Komandan İlham Əliyevin  qətiyyəti, xalqımızın mübariz ruhu, sarsılmaz birliyi Azərbaycanı hər zaman zəfərlərə aparacaq. Xalqımız bundan sonra da müzəffər və qurucu xalq kimi öz adını tarixin yaddaşına silinməz izlərlə həkk edəcək, üçrəngli Bayrağımız daim ən yüksək zirvələrdə dalğalanacaq. Bu faktı qeyd etmək kifayətdir ki, 2026-cı ilin 23  oktyabr tarixinə olan məlumata əsasən işğaldan azad edilmiş ərazilərimizə  40922 nəfərdən ibarət 10114 ailənin qayıdışı təmin edilib.  47 yaşayış məntəqəsi, yəni 10 şəhər, 3 qəsəbə və 34 kənd sakinlərinə qovuşub. Qarabağ Universitetində 3330-dan çox tələbə təhsil alır. Ümumilikdə azad edilmiş ərazilərdə hazırda 93 mindən çox insan yaşayır, çalışır və təhsil alır. Doğma yurdlarına qayıdan sakinlərdən  artıq 11 min 937 nəfərin məşğulluğu təmin edilib. Onlardan 8056 nəfəri vakansiyalar üzrə münasib işlərlə təmin olunub, 1051 nəfər isə özünüməşğulluq proqramına cəlb edilərək kiçik ailə təsərrüfatlarını qurublar. Bir sözlə, doğma yurd-yuvasına qayıdan soydaşlarımızın yüksək və rahat yaşayışının təmin edilməsi üçün bütün zəruri addımlar atılır.

Elmar Əhmədov,
YAP Salyan rayon təşkilatının sədri