Dünya azərbaycanlılarının həmrəyliyi: tarixi əsaslar və Heydər Əliyev irsi

Dünya azərbaycanlılarının həmrəyliyi, milli birlik və təşkilatlanma ideyası müasir Azərbaycan tarixində xüsusi yer tutur. Bu ideyanın sistemli şəkildə formalaşması, dövlət siyasətinin əsas istiqamətlərindən birinə çevrilməsi və qlobal miqyasda reallaşdırılması bilavasitə Ümummilli Lider Heydər Əliyevin adı ilə bağlıdır. Məhz Ulu Öndər dünya azərbaycanlılarının birliyini xalqımızın milli maraqlarının müdafiəsi və müstəqil dövlətçiliyimizin möhkəmləndirilməsi baxımından strateji əhəmiyyətə malik məsələ kimi qiymətləndirmişdir.
XX əsrin sonlarında Azərbaycan xalqı mürəkkəb və taleyüklü tarixi mərhələdən keçirdi. Milli azadlıq hərəkatı, müstəqillik uğrunda mübarizə, eyni zamanda xarici təzyiqlər və daxili siyasi böhranlar xalqın vahid ideya ətrafında birləşməsini zəruri edirdi. Belə bir şəraitdə Ümummilli Lider Heydər Əliyev xalqın milli şüurunun gücləndirilməsi, Azərbaycançılıq ideologiyasının formalaşdırılması və dünya azərbaycanlılarının vahid amal ətrafında səfərbər olunması istiqamətində mühüm addımlar atdı. Onun təşəbbüsü ilə 31 Dekabr – Dünya Azərbaycanlılarının Həmrəyliyi Günü təsis olundu və bu gün milli birliyin, ideoloji həmrəyliyin rəmzinə çevrildi.
Ulu Öndər Heydər Əliyev dünya azərbaycanlılarının həmrəyliyini sadəcə emosional bağlılıq deyil, dərin ideoloji məzmun daşıyan, milli dövlətçilik maraqlarına xidmət edən konsepsiya kimi dəyərləndirirdi. O, bu məsələyə dair fikirlərində xüsusi vurğulayırdı:
“Dünya azərbaycanlılarının həmrəyliyi gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir. Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən həmrəylik günü hər bir azərbaycanlı üçün inam və ümid anıdır.”
Bu fikirlər Ümummilli Liderin həmrəylik ideyasına verdiyi böyük dəyərin, onun tarixi mahiyyətini necə dərindən dərk etdiyinin bariz nümunəsidir. Heydər Əliyev üçün dünya azərbaycanlılarının birliyi ilk növbədə müstəqil Azərbaycan dövlətinə bağlılıq, milli-mənəvi dəyərlərə sədaqət və tarixi köklərə hörmət üzərində qurulurdu. O, daim qeyd edirdi ki, dünyanın müxtəlif ölkələrində yaşayan milyonlarla azərbaycanlını birləşdirən əsas amil onların vahid Vətənə – Azərbaycana mənəvi bağlılığıdır.
Ulu Öndərin uzaqgörən siyasəti nəticəsində dünya azərbaycanlılarının təşkilatlanması prosesi yeni mərhələyə qədəm qoydu. Xaricdə yaşayan soydaşlarımızın milli kimliyini qoruması, dilinə, mədəniyyətinə və adət-ənənələrinə sahib çıxması dövlət siyasətinin mühüm istiqamətinə çevrildi. Heydər Əliyev bu barədə bildirirdi ki, dünyanın müxtəlif ölkələrində milyonlarla azərbaycanlı yaşasa da, onların milli-mənəvi varlığını yaşadan yeganə dövlət müstəqil və suveren Azərbaycan Respublikasıdır. Məhz bu dövlət dünya azərbaycanlılarının birliyi və həmrəyliyi ideyasının əsas dayağıdır.
Dünya azərbaycanlılarının həmrəyliyi ideyası Ulu Öndərin müəyyənləşdirdiyi Azərbaycançılıq ideologiyasının ayrılmaz tərkib hissəsidir. Bu ideologiya xalqımızın dilinə, dininə, milli-mənəvi varlığına və ümumbəşəri dəyərlərə hörmət, onların qorunması və yaşadılması üzərində qurulmuşdur. Heydər Əliyevin siyasi kursu dünya azərbaycanlılarını vahid ideya ətrafında birləşdirərək, onları müstəqil dövlətçiliyimizin maraqlarının müdafiəsinə səfərbər etmişdir.
Bu gün Dünya Azərbaycanlılarının Həmrəyliyi Günü təkcə bayram deyil, eyni zamanda milli kimliyimizin, dövlətçilik düşüncəmizin və qlobal miqyasda birliyimizin təcəssümüdür. Bu möhkəm ideoloji təməl məhz Ümummilli Lider Heydər Əliyevin tarixi xidmətlərinin nəticəsi olaraq formalaşmışdır və bu gün də Azərbaycan dövlətinin siyasətində öz davamını tapır.

Könül Babayeva, 
Salyan rayonu, gənc YAP fəalı