“Möhtərəm cənab Prezident İlham Əliyevin işğaldan azad olunmuş Ağdam şəhərinə səfəri və “Böyük Qayıdış” proqramı çərçivəsində görülən işlərlə tanış olması dövlətimizin gücünün, Ali Baş Komandanın qətiyyətliliyinin göstəricisidir”. 

Bu sözləri Ana Vətən Partiyasının sədr müavini, Milli Məclisin deputatı Günay Ağamalı “Cebheinfo.az”-a açıqlamasında deyib. O bildirib ki, öz doğma torpaqlarına qayıdan sakinlərlə görüşən ölkə rəhbərimiz onların sevincinə şərik olmaqla Prezident-xalq vəhdətini bir daha nümayiş etdirdi: 

“Dövlət başçımızın sakinlərlə səmimi görüşü xalqa olan diqqət və qayğının ifadəsidir. Cənab Prezident İlham Əliyevin sakinlərlə görüş zamanı etdiyi çıxış post-münaqişə dövrünün strateji hədəflərini, eyni zamanda yeni geosiyasi konfiqurasiyada Azərbaycanın yüksələn nüfuzunu bir daha təsdiq etdi. 

44 günlük Vətən müharibəsində əldə etdiyimiz tarixi Zəfərin qürurundan bəhs edən dövlət rəhbəri, keçən müddət ərzində Azərbaycanın üzləşdiyi çətinliklər, böyük güclərin, eyni zamanda beynəlxalq təşkilatların ədalətsiz, qeyri-konstruktiv yanaşmalarını xüsusi olaraq qeyd etdi”. 

Millət vəkili qeyd edib ki, bütün bunlar məhz görülən işlərin, qazanılan qələbənin böyüklüyünü təsdiqləyən qiymətli mənbədir: 

“Heç kimə sirr deyil ki, keçmiş ATƏT-in Minsk Qrupunun həmsədrləri, ümumilikdə, həmsədr institutu fəaliyyət göstərdiyi müddət ərzində işğalı sonlandırmaq əvəzinə onu stimullaşdıran və ölkəmizi işğalla barışmağa məcbur edən ritorika nümayiş etdirirdilər. Onlardan bəzisi açıq şəkildə Ermənistanı silahlandırmaqla münaqişənin davam etməsinə zəmin yaradırdı. 

İndi həmin silahlar “Qənimətlər parkı”nda xalqa və gələn qonaqlara nümayiş etdirilir. Təbii ki, indi Azərbaycanın liderliyində formalaşan geosiyasi arxitekturanın şəriksiz memarı Ali Baş Komandan İlham Əliyevdir. 

Onun rəhbərliyi altında görülən işlər dosta fəxarət, düşmənlərə gözdağıdır”.

Günay Ağamalı vurğulayıb ki, ölkə rəhbəri məhz Ağdamın simasında işğalın sonlaşdırılmasını əyani şəkildə nümayiş etdirir:

“İşğal dövründə obrazlı şəkildə desək, ermənilər Ağdamda daşı daş üstündə qoymamışdılar. Ağdamın “Qafqazın Xirosiması” adlandırılması təsadüfi deyildi. İndi ən müasir standartlara cavab verən yeni Ağdamın yaranışın müşahidə edirik. Bərpa və quruculuq işləri çərçivəsində 13 hektardan çox olan kompleksdə 11 məhəllə də 60 bina inşa edilib. 

Kompleksdə 114-ü birotaqlı, 464-ü ikiotaqlı, 536-sı üçotaqlı, 154-ü dördotaqlı olmaqla ümumilikdə 1268 mənzil var. Dekabrda buraya 104 ailənin (426 nəfər) köçürülməsi nəzərdə tutulur. 

2026-cı ilin yanvar-fevral aylarında isə daha 1164 ailə (4772 nəfər) köçürüləcək. Görülən işlər onu deməyə əsas verir ki, yeniləşən Ağdam Azərbaycanın aparıcı mərkəzlərindən birinə çevriləcəkdir. Möhtərəm cənab Prezident İlham Əliyev praqmatik və uzaqgörən siyasəti, düşünülmüş strategiyası nəticəsində Qarabağda bundan sonra heç bir gücün dəyişə bilməyəcəyi tarix yazır”.