Dövlətin idmana göstərdiyi davamlı diqqət ildən-ilə daha böyük nəticələrə gətirib çıxarır və idmançılarımız artıq müzəffər xalqın nümayəndələri kimi yarışlara qatılırlar.

2025-ci ilin idman yekunlarına həsr olunmuş mərasimdə çıxış edən Azərbaycan Respublikasının Prezidenti İlham Əliyev ölkəmizdə idmanın inkişafı, əldə olunan nailiyyətlər və gələcək perspektivlər barədə geniş və əhatəli fikirlər səsləndirmişdir. Dövlət başçısı qeyd etmişdir ki, cari il Azərbaycan idmanı üçün xüsusilə uğurlu olmuş, idmançılarımız beynəlxalq arenalarda rekord sayda nailiyyətlər əldə etmişlər.
Prezidentin sözlərinə görə, bu il idmançılarımız beynəlxalq yarışlarda 2000-dən çox medal qazanmış, onlardan təqribən 600-dən çoxu qızıl medal olmuşdur. Bu göstəricilər ötən illərlə müqayisədə daha yüksəkdir və bu fakt Azərbaycanda idmanın inkişafının düzgün və məqsədyönlü dövlət siyasəti əsasında aparıldığını bir daha təsdiqləyir. Dövlətin idmana göstərdiyi davamlı diqqət ildən-ilə daha böyük nəticələrə gətirib çıxarır.
İlham Əliyev vurğulamışdır ki, idmanın inkişafı Azərbaycanda dövlət siyasətinin prioritet istiqamətlərindən biridir. Bu sahədə illər ərzində çoxsaylı dövlət proqramları icra edilmiş, müasir idman infrastrukturu demək olar ki, sıfırdan yaradılmışdır. Hazırda həm paytaxtda, həm də bölgələrdə idmanla məşğul olmaq üçün hərtərəfli şərait mövcuddur. 2025-ci ildə Gəncə və Yevlax şəhərlərində Olimpiya İdman Komplekslərinin istifadəyə verilməsi ilə bölgələrdə bu cür komplekslərin sayı 46-ya çatmışdır.
Dövlət başçısı sağlam gənc nəslin formalaşdırılmasının ölkənin gələcək inkişafı üçün əsas şərt olduğunu xüsusi qeyd etmişdir. Onun sözlərinə görə, sağlam gənclik olmadan nə idman uğurlarına, nə də ümumi inkişaf səviyyəsinə nail olmaq mümkündür. Uşaqlıqdan idmana marağın artırılması gələcək böyük nailiyyətlərin təməlini qoyur və bu istiqamətdə həyata keçirilən siyasət gəncləri idmana daha da həvəsləndirir.
Prezident İlham Əliyev çıxışında gənclərin vətənpərvərlik ruhunda tərbiyə olunmasının da dövlət siyasətinin əsas istiqamətlərindən biri olduğunu bildirmişdir. O vurğulamışdır ki, gənclərin fiziki hazırlığı ilə mənəvi saflığı bir-birini tamamlamalıdır. Məhz bu vəhdət ölkənin davamlı və uğurlu inkişafını təmin edə bilər. İdmanın gənc nəslin vətənpərvərlik ruhunda formalaşmasında mühüm rol oynadığı xüsusi qeyd olunmuşdur.
Dövlət başçısı idmançılarımızın beynəlxalq arenalarda Azərbaycan Dövlət Bayrağını qaldırmasının hər bir vətəndaş üçün qürur mənbəyi olduğunu bildirmişdir. Son beş il ərzində bayrağımızın qalib ölkənin bayrağı kimi dalğalanması idmançılarımızın məsuliyyətini daha da artırmışdır. Onlar artıq müzəffər xalqın nümayəndələri kimi yarışlara qatılırlar.
Çıxışda 2025-ci ildə ölkəmizdə keçirilmiş ən mühüm idman hadisələrindən biri olan MDB ölkələrinin üçüncü Oyunları xüsusi vurğulanmışdır. Bu Oyunlar yüksək səviyyədə təşkil olunmuş, yarışlar bir neçə şəhərdə, o cümlədən Gəncə və Xankəndidə keçirilmişdir. Bu fakt Azərbaycanın bölgələrdə də böyük beynəlxalq tədbirləri qəbul etmək potensialına malik olduğunu nümayiş etdirmişdir. Azərbaycan komandası bu Oyunlarda uğurla çıxış edərək komanda hesabında ikinci yerə layiq görülmüşdür.
Prezident İlham Əliyev həmçinin bu il Bakıda ilk dəfə keçirilən UFC beynəlxalq turnirini də mühüm hadisə kimi dəyərləndirmişdir. Dünya miqyasında böyük maraq doğuran bu turnirin Bakıda təşkili ölkəmizin artan nüfuzunu və beynəlxalq idman aləmindəki yerini bir daha təsdiqləmişdir. Turnirin dünya mediasında geniş işıqlandırılması Azərbaycanın tanıdılması baxımından mühüm rol oynamışdır.
Dövlət başçısı Formula 1 yarışlarının ölkəmizin turizm potensialına müsbət təsirindən də bəhs etmişdir. Qeyd olunmuşdur ki, ilk Formula 1 yarışından sonra Azərbaycana gələn xarici turistlərin sayı 20 faiz artmışdır. Bu yarışlar yüz milyonlarla insan tərəfindən izlənilir və Bakı şəhərinin gözəlliyi bütün dünyaya nümayiş etdirilir.
Çıxışda gələcək planlar da diqqətə çatdırılmışdır. Xüsusilə Qusar rayonunda, Şahdağ Xizək Kurortunda ilk dəfə keçiriləcək Xizək üzrə Dünya Kuboku Azərbaycan idman tarixində mühüm hadisə kimi qiymətləndirilmişdir. Bu yarış Azərbaycanın beynəlxalq qış idmanları xəritəsində öz yerini möhkəmləndirməsinə imkan yaradacaq.
Prezident İlham Əliyev qeyd etmişdir ki, Bakı şəhərinin “Dünyanın İdman Paytaxtı” seçilməsi Azərbaycanda idmanın inkişafına verilən yüksək beynəlxalq qiymətdir və bu, ölkəmiz üçün böyük qürur mənbəyidir. O, həmçinin idmançıların və idman mütəxəssislərinin mükafatlandırılmasının artıq uzun illərdir davam edən gözəl bir ənənə olduğunu vurğulamışdır.
Sonda dövlət başçısı bildirmişdir ki, Azərbaycanın idman şöhrətini ucaldan insanlar dövlət tərəfindən hər zaman yüksək qiymətləndiriləcək və idmanın inkişafı istiqamətində aparılan siyasət gələcək illərdə də uğurla davam etdiriləcəkdir.

Milli məclisin Deputatı Ülviyyə Həmzəyeva