Dünya Azərbaycanlılarının Həmrəyliyi Günü – milli birliyin və dövlətçiliyin rəmzidir 

Dünya Azərbaycanlılarının Həmrəyliyi Günü Azərbaycan xalqının milli azadlıq mübarizəsinin, birlik və bərabərlik ideyasının məntiqi nəticəsi olaraq formalaşmış və artıq möhkəm ənənəyə çevrilmiş dövlət bayramıdır. Qədim və zəngin tarixə malik Azərbaycan xalqının milli dirçəlişini, tərəqqisini və müstəqil dövlətçilik uğrunda apardığı müqəddəs mübarizəni özündə əks etdirən bu əlamətdar gün hər bir azərbaycanlı üçün inam, ümid və qürur mənbəyidir.
Ümummilli Lider Heydər Əliyevin təşəbbüsü və siyasi iradəsi ilə 1991-ci il dekabrın 16-da Naxçıvan Muxtar Respublikası Ali Məclisinin iclasında 31 dekabr tarixinin Dünya Azərbaycanlılarının Həmrəyliyi Günü kimi qeyd olunması barədə qərar qəbul edilmişdir. Daha sonra Azərbaycan Respublikasının Ali Soveti tərəfindən bu tarix rəsmi dövlət bayramı elan olunmuşdur. Bu qərar bütün dünyaya səpələnmiş azərbaycanlıların vahid ideya və məqsəd ətrafında birləşməsinə güclü təkan vermişdir.
Həmrəylik Gününün tarixi kökləri XX əsrin sonlarında baş vermiş mühüm hadisələrlə bağlıdır. Sovet imperiyasının süqutu ərəfəsində Araz çayının hər iki sahilində yaşayan azərbaycanlıların sərhədlərə doğru yürüşü, süni şəkildə ayrılmış Şimali və Cənubi Azərbaycanın birləşmək arzusu xalqımızın bir millət olduğunu dünyaya nümayiş etdirmişdir. Bu hadisələr milli birliyin və azadlıq ideyasının simvoluna çevrilmişdir.
Dünya azərbaycanlılarının həmrəyliyi ideyasının mərkəzində Azərbaycan dövlətçiliyinə sədaqət, ana dilimizə, milli-mənəvi dəyərlərimizə hörmət və ümumbəşəri dəyərlərin qorunması dayanır. Ulu Öndər Heydər Əliyev dünya azərbaycanlılarının milli birliyinin ideoloqu, təşkilatçısı və təbliğatçısı kimi bu ideyanı ardıcıl şəkildə həyata keçirmiş, xarici ölkələrdə yaşayan soydaşlarımızla daim əlaqə saxlamış, onların təşkilatlanmasına xüsusi önəm vermişdir. Onun “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı hər bir azərbaycanlı üçün milli qürur rəmzinə çevrilmişdir.
Bu siyasət Prezident İlham Əliyev tərəfindən uğurla davam etdirilir. Dövlət başçısı bütün xarici səfərləri zamanı diaspor nümayəndələri ilə görüşür, onların problemləri ilə maraqlanır, diaspor quruculuğunu dövlət siyasətinin mühüm istiqamətlərindən biri kimi müəyyən edir. Prezident İlham Əliyevin rəhbərliyi ilə Diasporla İş üzrə Dövlət Komitəsinin yaradılması, Azərbaycan Diasporuna Dəstək Fondunun təsis edilməsi, diaspor fəaliyyətinə dair mühüm sənədlərin qəbulu dünya azərbaycanlılarının daha sıx birləşməsinə xidmət edir.
Dünya Azərbaycanlılarının Qurultayları bu birliyin möhkəmlənməsində xüsusi rol oynayır. 2001-ci ildə keçirilmiş I Qurultaydan başlayaraq, xüsusilə 2022-ci ildə azad Şuşada keçirilmiş V Qurultay – Zəfər Qurultayı dünya azərbaycanlılarının milli həmrəyliyinin və qələbə ruhunun bariz ifadəsi olmuşdur. Prezident İlham Əliyevin qeyd etdiyi kimi, bu qurultaylar müstəqil Azərbaycanın bütün dünya azərbaycanlıları üçün güclü cazibə mərkəzi olduğunu bir daha təsdiqləmişdir.
2020-ci il Vətən müharibəsi və sonrakı dövrdə əldə olunan tarixi Zəfər dünya azərbaycanlılarının birliyini daha da gücləndirmişdir. Xaricdə yaşayan soydaşlarımız Azərbaycanın haqq səsinin dünya ictimaiyyətinə çatdırılmasında fəallıq göstərmiş, dövlətimizin ətrafında sıx birləşmişlər. “Dəmir yumruq” yalnız hərbi gücün deyil, eyni zamanda milli birliyin və həmrəyliyin rəmzinə çevrilmişdir.

Bu gün Dünya Azərbaycanlılarının Həmrəyliyi Günü milli birlik, Vətənə bağlılıq, dövlətçilik ideyalarına sədaqət bayramıdır. Harada yaşamasından asılı olmayaraq, hər bir azərbaycanlı bilməlidir ki, onun arxasında güclü, müstəqil Azərbaycan dövləti dayanır. Bu birlik və həmrəylik Azərbaycan xalqının bu günü və sabahı üçün ən böyük təminatdır.

Milli məclisin deputatı Ülviyyə Həmzəyeva