8 NOYABR – ZƏFƏR GÜNÜ: MİLLİ QÜRURUMUZUN, DÖVLƏTÇİLİYİMİZİN VƏ DÖNÜŞMƏZ İRADƏMİZİN TƏNTƏNƏSİ

Zəfər tariximiz əbədi, qələbəmiz dönməzdir!

   Azərbaycan xalqının çoxəsrlik tarixində elə günlər var ki, onlar yalnız təqvimdə bir tarix deyil, bütöv bir xalqın taleyini dəyişən, milli yaddaşına əbədi həkk olunan möhtəşəm hadisələrdir.8 Noyabr – Zəfər Günü də məhz belə müqəddəs tarixlərdəndir. Bu gün xalqımızın milli iradəsinin, birliyinin, vətənpərvərliyinin, qəhrəmanlığının və dövlətçilik əzminin təntənəsidir.
    8 Noyabr Azərbaycan tarixinin ən şanlı səhifələrindən biridir. Bu tarix torpaqlarımızın azadlığı uğrunda illərlə davam edən mübarizənin, xalqımızın bitib-tükənməyən Vətən sevgisinin və Azərbaycan dövlətinin qətiyyətli siyasətinin möhtəşəm nəticəsidir.
Məlum olduğu kimi, Ermənistanın Azərbaycana qarşı hərbi təcavüzü nəticəsində torpaqlarımızın bir hissəsi uzun illər işğal altında qalmış, yüz minlərlə soydaşımız doğma yurdlarından didərgin düşmüşdü. Azərbaycan xalqı bütün bu illər ərzində öz tarixi torpaqlarına qayıdacağına, ərazi bütövlüyünün bərpa olunacağına inamını itirmədi. Bu inamı yaşadan əsas qüvvə xalqımızın Vətənə bağlılığı, dövlətimizin apardığı ardıcıl siyasət və milli birliyimiz idi.
     Müstəqil Azərbaycan dövlətinin qurucusu, Ümummilli Lider Heydər Əliyev ölkəmizin gələcək inkişaf strategiyasını müəyyənləşdirərək güclü dövlətçilik ənənələrinin əsasını qoydu. Ulu Öndərin müəyyən etdiyi siyasi kurs Azərbaycanın beynəlxalq mövqelərinin möhkəmlənməsinə, iqtisadi qüdrətinin artmasına, ordu quruculuğunun inkişafına və milli həmrəyliyin güclənməsinə mühüm töhfələr verdi.
Bu siyasi strategiya Azərbaycan Respublikasının Prezidenti, Yeni Azərbaycan Partiyasının Sədri, Müzəffər Ali Baş Komandan cənab İlham Əliyev tərəfindən müasir dövrün çağırışlarına uyğun şəkildə uğurla davam etdirildi.
    Dövlətimizin başçısının qətiyyətli rəhbərliyi ilə Azərbaycan iqtisadi, siyasi və hərbi baxımdan böyük gücə çevrildi. Güclü iqtisadiyyat, müasir ordu, məqsədyönlü diplomatiya və xalq-iqtidar birliyi tarixi Zəfərimizin möhkəm təməlini təşkil etdi.
    2020-ci il sentyabrın 27-də başlayan 44 günlük Vətən müharibəsi Azərbaycan xalqının qəhrəmanlıq salnaməsinə çevrildi. Müzəffər Ali Baş Komandanın rəhbərliyi ilə rəşadətli Azərbaycan Ordusu misilsiz şücaət göstərərək torpaqlarımızı bir-bir işğaldan azad etdi. Hər gün cəbhədən gələn qələbə xəbərləri xalqımızın qəlbində illərlə yaşatdığı azadlıq ümidini gerçəyə çevirdi.
    Nəhayət, 2020-ci il noyabrın 8-də Qarabağın tacı, Azərbaycanın mədəniyyət paytaxtı, milli kimliyimizin və mənəvi zənginliyimizin rəmzi olan Şuşa şəhəri işğaldan azad edildi. Şuşanın azad olunması Vətən müharibəsinin taleyində həlledici məqam olmaqla yanaşı, Azərbaycan xalqının yenilməz ruhunun dünyaya nümayişi idi.
    Məhz bu möhtəşəm tarixi hadisənin əbədiləşdirilməsi məqsədilə 8 Noyabr ölkəmizdə Zəfər Günü elan edildi.
Zəfərimizin arxasında yalnız hərbi güc deyil, həm də misilsiz xalq birliyi, siyasi iradə, milli həmrəylik və Vətən sevgisi dayanırdı. Azərbaycan xalqı həmin günlərdə bir yumruq kimi birləşərək dünyaya göstərdi ki, milli maraqlar, dövlətçilik və Vətən sevgisi hər şeydən ucadır.
    Bu Qələbə, ilk növbədə, canından keçərək müqəddəs torpaqlarımızı azad edən şəhidlərimizin qanı, qazilərimizin fədakarlığı, əsgər və zabitlərimizin qəhrəmanlığı hesabına qazanıldı. Bu səbəbdən Zəfər Gününü qeyd edərkən qəlbimizdə həm sonsuz qürur, həm də dərin minnətdarlıq hissi daşıyırıq. Şəhidlərimizin əziz xatirəsi xalqımızın yaddaşında əbədi yaşayacaq. Onların bizə əmanət qoyduğu Vətənə sahib çıxmaq hər bir Azərbaycan vətəndaşının müqəddəs borcudur.
    Bu gün işğaldan azad edilmiş ərazilərimizdə aparılan genişmiqyaslı quruculuq və bərpa işləri, doğma yurdlarına qayıdan insanların sevinc dolu anları Zəfərimizin davam edən təntənəsidir. Qarabağ və Şərqi Zəngəzur yenidən qurulur, həyat öz axarına qayıdır, üçrəngli Azərbaycan bayrağı doğma torpaqlarımızın hər guşəsində qürurla dalğalanır.
    Yeni Azərbaycan Partiyasının fəalı olaraq hesab edirəm ki, Zəfər Gününün mahiyyəti yalnız tarixi Qələbəmizi xatırlamaqdan ibarət deyil. Bu müqəddəs tarix həm də gələcək nəsillər qarşısında məsuliyyətimizi, dövlətimizə sədaqətimizi, milli dəyərlərimizə bağlılığımızı və müstəqil Azərbaycanın inkişafına töhfə vermək borcumuzu xatırladır.
    Yeni Azərbaycan Partiyasının fəaliyyətinin əsas istiqamətlərindən biri də dövlətçilik ənənələrinin qorunması, milli həmrəyliyin möhkəmləndirilməsi, ölkəmizin davamlı inkişafına və gənc nəslin vətənpərvərlik ruhunda yetişməsinə töhfə verməkdir. Zəfər tariximizin gələcək nəsillərə düzgün çatdırılması bu baxımdan xüsusi əhəmiyyət daşıyır.
      Bir müəllim olaraq isə düşünürəm ki, Zəfər Gününün ən böyük mənəvi dəyərlərindən biri də bu tarixin yetişməkdə olan gənc nəslin yaddaşına qürur və məsuliyyət hissi ilə həkk olunmasıdır. Biz şagirdlərimizə yalnız tariximizi öyrətməməli, həm də onlara Vətəni sevməyi, dövlət rəmzlərinə hörmət etməyi, şəhidlərimizin müqəddəs xatirəsini yaşatmağı və müstəqil dövlətimizin gələcəyi üçün layiqli vətəndaş olmağı aşılamalıyıq.
Çünki Zəfər yalnız keçmişimizin şanlı səhifəsi deyil, həm də gələcəyimizin məsuliyyətidir.
Bu gün hər birimiz qürurla deyə bilərik ki, Azərbaycan xalqı öz tarixini özü yazdı, öz taleyinə özü sahib çıxdı.      Müzəffər Ordumuzun qəhrəmanlığı, dövlətimizin qüdrəti və xalqımızın sarsılmaz birliyi sayəsində tariximizin ən böyük arzularından biri gerçəkləşdi.
    8 Noyabr – Zəfər Günü milli qürurumuzun, dövlət müstəqilliyimizin, birliyimizin və yenilməzliyimizin əbədi rəmzidir.Bu möhtəşəm Qələbənin memarı olan Müzəffər Ali Baş Komandan cənab İlham Əliyevə, rəşadətli Azərbaycan Ordusuna, Vətən uğrunda canından keçən şəhidlərimizə və qazilərimizə sonsuz ehtiram və minnətdarlığımızı bildiririk.

Şəhidlərimizin ruhu qarşısında baş əyirik!

Qazilərimizə möhkəm cansağlığı arzulayırıq!

Yaşasın müstəqil, suveren və qalib Azərbaycan!

8 Noyabr – Zəfər Günümüz mübarək!

Qarabağ Azərbaycandır!