8 NOYABR – ZƏFƏR GÜNÜ: MİLLİ QÜRURUMUZUN, BİRLİYİMİZİN VƏ QƏHRƏMANLIĞIMIZIN TƏNTƏNƏSİ*

     Azərbaycan xalqının çoxəsrlik tarixində elə günlər var ki, həmin günlər yalnız təqvimdə bir tarix deyil, bütöv bir xalqın yaddaşına, qüruruna və milli kimliyinə əbədi həkk olunur. "8 Noyabr – Zəfər Günü" də məhz belə müqəddəs və unudulmaz tarixlərdən biridir.

    Bu gün Azərbaycan xalqı öz qəhrəmanlıq salnaməsinin ən şanlı səhifələrindən birini – tarixi Zəfərini böyük qürur və ehtiramla qeyd edir.
     2020-ci il sentyabrın 27-də başlayan 44 günlük Vətən müharibəsi Azərbaycan xalqının sarsılmaz iradəsini, milli birliyini, Vətən sevgisini və ordumuzun misilsiz qəhrəmanlığını bütün dünyaya nümayiş etdirdi. Ali Baş Komandanın rəhbərliyi ilə Azərbaycan Ordusu döyüş meydanında böyük şücaət göstərərək torpaqlarımızın azadlığı uğrunda mübarizə apardı. Hər qarış torpaq uğrunda canından keçməyə hazır olan igid oğullarımız öz qanları və canları bahasına tarix yazdılar.
      Noyabrın 8-də qədim mədəniyyətimizin, milli ruhumuzun və mənəvi dəyərlərimizin beşiyi olan Şuşa şəhərinin işğaldan azad edilməsi Vətən müharibəsinin taleyində həlledici mərhələ oldu. Qayalara söykənən bu müqəddəs şəhərin azad olunması xalqımızın illərlə qəlbində yaşatdığı bir arzunun gerçəkləşməsi idi. Şuşadan yüksələn üçrəngli bayrağımız bütün dünyaya Azərbaycan xalqının əyilməz ruhunu və sarsılmaz iradəsini nümayiş etdirdi.
    8 Noyabr sadəcə hərbi qələbənin deyil, xalq-ordu birliyinin, milli həmrəyliyin, vətənpərvərliyin və tarixi ədalətin təntənəsidir. Bu Zəfər Azərbaycan xalqının bir yumruq kimi birləşərək ən çətin sınaqlardan üzüağ çıxdığının parlaq sübutudur. Lakin bu möhtəşəm Qələbənin arxasında böyük bir ağrı, saysız-hesabsız fədakarlıq və Vətən uğrunda canını fəda edən qəhrəmanlarımızın müqəddəs qanı dayanır. Şəhidlərimizin əziz xatirəsi xalqımızın qəlbində əbədi yaşayacaq. Onların bizə əmanət etdiyi müstəqil, bütöv və güclü Azərbaycanı qorumaq hər birimizin mənəvi borcudur.          Qazilərimizin göstərdiyi şücaət, fədakarlıq və Vətən sevgisi isə gələcək nəsillər üçün əsl qəhrəmanlıq nümunəsidir.
    Bu gün azad edilmiş torpaqlarımızda aparılan genişmiqyaslı bərpa və quruculuq işləri, doğma yurdlarına qayıdan insanların sevinc dolu anları Zəfərimizin davamıdır. Qarabağda həyat yenidən canlanır, şəhər və kəndlərimiz dirçəlir, tarixi və mədəni irsimiz bərpa olunur. Bir zamanlar həsrətlə gözlədiyimiz doğma torpaqlarımızda bu gün üçrəngli bayrağımız qürurla dalğalanır.

      Zəfər Günü həm də gələcək nəsillərə ötürülən böyük bir dərsdir. Bu tarix övladlarımıza Vətəni sevməyi, dövlətə sədaqəti, milli dəyərlərimizi qorumağı, birliyi və həmrəyliyi öyrədir. Çünki güclü dövlətin təməli Vətəninə bağlı, tarixini bilən, milli qürurunu yaşadan və gələcəyinə inanan gənclərdir.
     8 Noyabr – Azərbaycan xalqının qalibiyyət ruhunun, milli qürurunun və sarsılmaz birliyinin rəmzidir. Bu gün tariximizin qürur səhifəsi, sabahımızın isə böyük məsuliyyətidir.
      Zəfərimiz əbədi, dövlətçiliyimiz sarsılmaz, üçrəngli bayrağımız daim yüksəklərdə olsun!

Vətən uğrunda canından keçən bütün şəhidlərimizə Allahdan rəhmət diləyir, qazilərimizə möhkəm cansağlığı arzulayırıq.

*Zəfərin mübarək, Azərbaycan!*