31 Yanvar aktyor Ələsgər Ələkbərovun xatirə günüdü.

Ələsgər Ələkbərov
Doğum tarixi: 26.03.1910
Vəfat tarixi: 31.01.1963
Ələsgər Hacağa oğlu Ələkbərov Bakıda anadan olub. 1920-ci ildə atasının ölümündən sonra ailənin bütün ağırlığı anası Zübeydənin üstünə düşür. Həyatı nə qədər çətin keçsə də, balaca Ələsgərin teatra olan həvəsi azalmır. Məktəbdə oxuduğu illərdə tez-tez Əbilov klubundakı dram dərnəyinə getməyə başlayır. Ələsgər Ələkbərov Bakı Teatr Texnikumunda oxumaqla (1927-1930) bərabər, Bakı Türk İşçi Teatrına qəbul olunur. Bu teatr onun aktyorluq qabiliyyətinin daha da inkişaf etməsində mühüm rol oynayır. Teatrda işlədiyi illərdə aktrisa Hökumə Qurbanova ilə ailə qurur. 1933-cü ildə Bakı Türk İşçi Teatrı Gəncəyə köçürülür. Gənc ailə də Bakıdan Gəncəyə köçür. Teatrın səviyyəsini qaldırmaq üçün Bakıdan Gəncəyə gələn Abbas Mirzə Şərifzadə teatrda həm rejissor, həm də aktyor kimi çalışmağa başlayır. Elə bu zaman Hökumə xanımın istedad və bacarığı onun gözündən yayınmır. O, tamaşalarda Hökumə xanımla məşq etdikcə Ələsgər qısqanclıqdan alışıb yanır. Bu qısqanclıq teatrın divarları arasında qalmır, ailə həyatlarında da mənfi rol oynayırdı. Hökumə xanımla ayrılandan sonra Ələsgər univermaqda işləyən bir rus qızı ilə evlənir və ətrafdakıların qınağı ilə rastlaşsa da, heç kimə məhəl qoymur. 1933-cü ildən isə Ələsgər Ələkbərov Akademik Dram Teatrında işləməyə başlayır. 1959-cu ildə Moskvada Azərbaycan mədəniyyəti və ədəbiyyatı ongünlüyündə Vaxtanqov teatrının səhnəsində Azərbaycan Dram Teatrının kollektivi "Otello"nu oynayırdı. Ələsgər Ələkbərov Moskvada neçə-neçə Otellolar görmüş tamaşaçılar qarşısında Otello rolunu oynayırdı. Bu Otello doğrudan da onların indiyədək gördüyü Otellolardan tamamilə fərqli idi. Dekadanın sonunda Azərbaycandan gələn incəsənət xadimlərinə ittifaq səviyyəli fəxri adlar verilməliydi. Rəşid Behbudov, Qəmər Almaszadə, Leyla Vəkilova SSRİ Xalq artisti fəxri adına layiq görülür. Hamı Akademik Dram Teatra ayrılan fəxri adın Ələsgər Ələkbərova veriləcəyini gözləyir. Ancaq bu fəxri ad teatrın rəhbəri Adil İsgəndərova verilir. Bakıya qayıdandan sonra Ələsgər Ələkbərov teatrdan çıxmaq üçün ərizə ilə Mədəniyyət Nazirliyinə müraciət edir. Mədəniyyət naziri Məmməd Qurbanovun etirazına baxmayaraq, o, teatrdan uzaqlaşır. Ələsgər Ələkbərov bir də teatra 1959-cu ilin axırında - Adil İsgəndərov vəzifəsindən uzaqlaşdırılandan sonra qayıdır. Ancaq sonra özü də başa düşür və etiraf edirdi: "İsgəndərovsuz teatr həmin teatr deyil". Ələsgər Ələkbərov Dovyenko adına Kiyev kinostudiyasında çəkilən “Kiyevli: Varislər” filmində (1960, rejissor Timofey Levçuk / Ukrayna) padre Aqila rolunda oynayıb. Əməkdar artist (1938), Xalq artisti (1940), SSRİ хalq artisti (1961) Ələsgər Ələkbərov 1963-cü ildə dünyasını dəyişib.

Filmoqrafiya:
Vulkan üzərində ev (1928, tammetrajlı bədii film) – aktyor (Həsən)
Lətif (1930, tammetrajlı bədii film) – aktyor (kolxoz sədri)
Altıncı hiss (1935, tammetrajlı bədii film) – aktyor (mühəndis Heydər)
Almas (1936, tammetrajlı bədii film) – aktyor (Fuad)
Kəndlilər (1939, tammetrajlı bədii film) – aktyor (aşıq Göydəmir)
Yeni horizont (1940, tammetrajlı bədii film) – aktyor (partkom katibi Aslanov)
Sovqat (1942, qısametrajlı bədii film) – aktyor (Ayaz)
Fətəli xan (1947, tammetrajlı bədii film) – aktyor (Fətəli xan)
Qara daşlar (1956, tammetrajlı bədii film) – aktyor (Qüdrət İsmayılzadə)
Kölgələr sürünür (1958, tammetrajlı bədii film) – aktyor (professor Rəşid Sərdarlı)
Ögey ana (1958, tammetrajlı bədii film) – aktyor (Hüseyn dayı)
Uzaq sahillərdə (1958, tammetrajlı bədii film) – aktyor (Ferrero)
Səhər (1960, tammetrajlı bədii film) – aktyor (Rəhim bəy)
Leyli və Məcnun (1961, tammetrajlı bədii film) – aktyor (Şeyx Əmir)
Böyük dayaq (1962, tammetrajlı bədii film) – aktyor (kolxoz sədri Rüstəm kişi)