“Demokratiyanı heç bir ölkəyə kənardan sırımaq olmaz. İraq, Liviya və Əfqanıstandakı vəziyyət bunu sübut edir”. Bu sözləri Fransa prezidenti Emmanuel Makron “TF1” televiziyasına müsahibəsində deyib.

Makron bildirib ki, hələlik “Taliban” rejiminin tanınmasından söhbət getmir, amma onunla danışıqlar aparılacaq. “Şərt var. Onlar gərək öz ərazilərində yaşayanların, ilk növbədə də qadınların hüquqlarına hörmətlə yanaşsınlar”,- Makron bildirib.
Fransa prezidenti taliblərin terrorçu qruplaşmalarla mübarizə aparmalı olduğunu da əlavə edib.

Yada salaq ki, bir qədər əvvəl bu şərtləri Fransanın xarici işlər naziri Jan-İv le Drian da səsləndirmişdi. Onun sözlərinə görə, “Taliban” ilk növbədə “Əl-Qaidə” ilə mübarizə aparmalıdır.