Salyanda Birinci Qarabağ Müharibəsi şəhidi Əfqan Məlikovun xatirəsi yad edilib
2 aprel 2026-cı il tarixində Salyanda “Vətən bizim and yerimiz” layihəsi çərçivəsində Birinci Qarabağ müharibəsi şəhidi Əfqan İldır oğlu Məlikovun doğum gününə həsr olunmuş anım tədbiri keçirilib. Salyan Rayon Heydər Əliyev Mərkəzində təşkil olunan tədbirdə Salyan Rayon İcra Hakimiyyətinin və YAP Salyan rayon təşkilatının rəhbərliyi, şəhid ailələri, Qarabağ müharibəsi iştirakçıları, ziyalılar, ağsaqqallar, şəhidin qohumları, YAP fəalları, QHT nümayəndələri, həmçinin təhsil və mədəniyyət işçiləri, ictimaiyyət nümayəndələri iştirak ediblər.
Tədbir Vətənimizin ərazi bütövlüyü uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Ardınca şəhid Əfqan Məlikovun həyat və döyüş yoluna həsr olunmuş videoçarx nümayiş etdirilib.
Tədbirdə çıxış edən Salyan rayon İcra Hakimiyyətinin Ərazi-təşkilat və ictimai-siyasi məsələlər şöbəsinin müharibə iştirakçıları və şəhid ailələri ilə işin təşkili sektorunun müdiri Rəşad Kərimov, Yeni Azərbaycan Partiyası Salyan rayon təşkilatının sədr müavini Aqşin Babayev, Heydər Əliyev Mərkəzinin direktoru Nübar Bayramova, şair-yazıçı Firdovsi Sarvanlı, şəhidin bacısı Zərnigar Mikayılova, İctimai Nəzarət Cəmiyyətinin sədri Xalid Mirzəyev, idarə heyətinin üzvü Arzu Əbilova, “Murad Əlillər” İctimai Birliyinin sədri Rəsmiyyə Səmədova, Salyan şəhər 1 saylı məktəb-liseyin müəllimi, YAP Salyan rayon təşkilatının fəalı Şəlalə Əsgərova şəhid Əfqan Məlikovun qısa, lakin şərəfli ömür yolundan, Vətənə və xalqa sədaqətindən geniş bəhs ediblər. Bildirilib ki, Birinci Qarabağ müharibəsində qəhrəmancasına döyüşən belə igid oğullar Azərbaycanın tarixində qəhrəmanlıq rəmzinə çevriliblər. Onların döyüş meydanında göstərdiyi mərdlik və fədakarlıq gənc nəsil üçün əsl vətənpərvərlik nümunəsidir.
Çıxışlarda vurğulanıb ki, tədbirin Aprel döyüşləri ərəfəsinə təsadüf etməsi xüsusi əhəmiyyət daşıyır. Qeyd olunub ki, ölkəmizin əldə etdiyi uğurlar, müstəqilliyimizin və suverenliyimizin möhkəmlənməsi məhz şəhidlərimizin misilsiz qəhrəmanlığı və fədakarlığı sayəsində mümkün olub. Əfqan Məlikov da bu müqəddəs yolda canını fəda edərək adını xalqımızın yaddaşına əbədi həkk edib.
Eyni zamanda qeyd edilib ki, şəhidlərin xatirəsinin daim uca tutulması, onların ailələrinə göstərilən hörmət və ehtiram cəmiyyətimizin mənəvi dəyərlərinin ayrılmaz hissəsidir. Bu kimi tədbirlər gənc nəslin Vətənə bağlılıq və milli-mənəvi dəyərlərə sədaqət ruhunda formalaşmasında mühüm rol oynayır. Çıxış edənlər bildiriblər ki, Əfqan Məlikovun döyüş yolu və qəhrəmanlığı hər zaman örnək olacaq, onun əziz xatirəsi xalqımızın qəlbində daim yaşayacaq.
Tədbir çərçivəsində 1 saylı məktəb-liseyin şagirdləri tərəfindən şeir kompozisiyası təqdim olunmuş, Azərbaycan rəqsi ifa edilib. Sonda şəhidin yaxınları göstərilən ehtirama və tədbirin yüksək səviyyədə təşkilinə görə öz minnətdarlıqlarını bildiriblər.
