4 Günlük Döyüş, 4 İl Sonra 44 Günlük Zəfərə İmza Atdı

Tarix 1-2 aprel 2016-cı ili göstərirdi. Ermənistan tərəfi yenə özünə yaraşan formada atəşkəsi pozmuş və dinc əhalini hədəfə almışdı. Bunun nəticəsində dinc sakinlərdən 2 nəfər həlak olmuş, 10 nəfər isə müxtəlif dərəcədə yaralanmışdı. Lakin mənfur düşmənin bu mundarlığı cəzasız qalmamışdır. Azadlıq həsrətinin daha da artdığı, işğal olunmuş torpaqlara qayıdış həsrəti ilə burnumuzun göynədiyi zamanda bu, Azərbaycan ordusu üçün böyük bir fürsətə çevrildi. Bu dəfə xəbərlər “düşmən cavab atəşi ilə susduruldu” deməklə kifayətlənməyəcək, Azərbaycan Ordusunun gücünü göstərərək irəlilədiyini vurğulayacaqdı. Bu döyüş Azərbaycan Silahlı Qüvvələrinin qələbəsi ilə nəticələnmiş, Tərtər rayonunun Talış kəndi ətrafındakı yüksəkliklər, Cəbrayıl rayonunun Lələ Təpə yüksəkliyi və Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Tərtər rayonunun Suqovuşan kəndi istiqamətində yollar düşməndən azad olunmuşdur. Bununla da Ali Baş Komandanın rəhbərliyi ilə Azərbaycan ordusu öz gücünü göstərmiş və mənfur düşmənə vacib olan mesajı vermişdir. Unutmamaq lazımdır ki, əgər azadlıq kağız üzərində əldə olunmursa, meydanda əldə edilir. 4 gün davam edən bu döyüş 4 il sonra 44 günlük zəfər salnaməsinin başlanğıcına imza atdı. Azərbaycan türkləri iki şeyi unutmaz: birincisi, edilən yaxşılıqları; ikincisi isə xalqına, dövlətinə, namusuna və bayrağına edilən zülmləri. Azərbaycan xalqı bunu unutmadı, uyğun zaman və məkanı gözlədi. Nəhayət, 27 sentyabr 2020-ci ildə düşmənin atəşkəsi pozması ilə başlayan yeni mərhələ cavabsız qalmadı. Xocalının, beş yaşlı körpələrin, qocaların, qadınların, Mübarizlərin, Poladların, Allahverdilərin, Fəridlərin və adı burada sadalanmayan saysız-hesabsız qəhrəmanımızın qisası o əvəzsiz əməliyyatlarla alındı. Hər gün Azərbaycan tarixində yeni bir səhifə açıldı. Hər gün bir qəhrəmanlıq dastanı, hər saniyə bir igidlik yazıldı. Bir şairin dediyi kimi: “Qəhrəmanlar can verir, yurdu yaşatmaq üçün.” Bu qəhrəmanlar, xalq və siyasi arenada sözünü çəkinmədən deyən lider bu qəhrəmanlıq salnaməsinə imza atdılar. 44 gün dünya tarixində misilsiz bir səhifə açdı. Son üç yüzillik tarixində Azərbaycan xalqı ilk dəfə torpaq itirmədi, itirilmiş torpaqları geri aldı. Zəfərə gedən yolda qaçınılmaz olanı etdik: nə bahasına olursa-olsun, bu meydanı tərk etmədik. Çünki düşmən həmin savaşa qədər sülh masasına gəlməmişdi. Demək ki, onların başına “dəmir yumruq” dəyməli imiş ki, özlərinə gəlsinlər...

Ömər Hüseynli
Ana Vətən Partiyasının sədr müavini