Regional təhlükəsizlik və əməkdaşlıq Azərbaycanın strateji prioriteti kimi

Bakıda keçirilən XIII Qlobal Bakı Forumu beynəlxalq münasibətlər sistemində baş verən mürəkkəb proseslərin müzakirə edildiyi mühüm platformalardan biri kimi dünya ictimaiyyətinin diqqət mərkəzində olmuşdur. “Keçid dövründə olan dünyada fikir ayrılıqlarının aradan qaldırılması” mövzusuna həsr edilən forumda müxtəlif ölkələrin siyasi liderləri, beynəlxalq təşkilatların nümayəndələri, nüfuzlu diplomatlar və ekspertlər iştirak edərək qlobal təhlükəsizlik, sabitlik və əməkdaşlıq məsələlərini müzakirə etmişlər.
Forumda Azərbaycan Respublikasının Prezidenti Ilham Əliyev də iştirak edərək geniş məzmunlu çıxış etmiş və müasir beynəlxalq münasibətlər sistemində təhlükəsizlik, enerji əməkdaşlığı, nəqliyyat bağlantıları və regional sabitlik kimi mühüm məsələlərə toxunmuşdur. Dövlət başçısının çıxışında xüsusilə regional təhlükəsizlik məsələsinə xüsusi diqqət yetirilmiş, Azərbaycanın bu istiqamətdə həyata keçirdiyi siyasətin mahiyyəti və nəticələri barədə geniş məlumat verilmişdir.
Prezident İlham Əliyev çıxışında vurğulamışdır ki, regional təhlükəsizlik məsələsi Azərbaycan üçün hər zaman ən vacib prioritetlərdən biri olub. Bu yanaşma ölkənin qarşılaşdığı tarixi çağırışlar və geosiyasi reallıqlar fonunda formalaşmışdır. Uzun illər ərzində Azərbaycanın ərazilərinin bir hissəsinin işğal altında qalması ölkənin əsas gündəliyini müəyyən edən başlıca məsələlərdən biri olmuşdur. Bu səbəbdən sülhün təmin olunması və dövlət suverenliyinin bərpası Azərbaycan üçün daim bir nömrəli prioritet hesab edilmişdir.
Dövlət başçısı qeyd etmişdir ki, Azərbaycan bu məqsədə nail olmaq üçün uzun illər ərzində böyük səylər göstərmiş, beynəlxalq hüququn norma və prinsiplərinə əsaslanaraq öz mövqeyini qətiyyətlə müdafiə etmişdir. Suverenliyin və ərazi bütövlüyünün bərpası təxminən üç onillik davam edən mürəkkəb və çətin proses olmuşdur. Lakin Azərbaycan bu hədəfə beynəlxalq hüququn tələblərinə uyğun şəkildə nail olmuşdur. Prezident İlham Əliyevin sözlərinə görə, bu proses BMT Nizamnaməsinin prinsipləri və xüsusilə dövlətlərin özünümüdafiə hüququnu təsbit edən müddəalar çərçivəsində həyata keçirilmişdir. Dövlət başçısı vurğulamışdır ki, güclü siyasi iradə, qətiyyət və məqsədə sadiqlik mövcud olduqda ədalətin bərpasına nail olmaq mümkündür. Azərbaycanın keçdiyi yol da bunu aydın şəkildə göstərir. Qeyd etmişdir ki, bu gün regionda formalaşan yeni reallıqlar sülh və əməkdaşlıq üçün yeni imkanlar yaradır. Azərbaycan artıq suverenliyini tam bərpa etmiş dövlət kimi regional təhlükəsizliyin və sabitliyin möhkəmləndirilməsi istiqamətində fəal siyasət həyata keçirir. Bu siyasətin əsas məqsədi regionda davamlı sülhün və qarşılıqlı əməkdaşlığın təmin olunmasıdır.
Dövlət başçısı forum iştirakçılarının diqqətinə çatdırmışdır ki, müasir dünyada təhlükəsizlik anlayışı yalnız hərbi sahə ilə məhdudlaşmır. Bu gün enerji təhlükəsizliyi də dövlətlərin milli təhlükəsizlik strategiyalarının mühüm tərkib hissəsinə çevrilmişdir. Enerji bazarlarında baş verən dəyişikliklər və qlobal iqtisadi proseslər bir daha göstərir ki, enerji resurslarının sabit və etibarlı şəkildə təmin olunması dünya ölkələri üçün həyati əhəmiyyət daşıyır. Prezident İlham Əliyev qeyd etmişdir ki, Azərbaycan bu sahədə də mühüm rol oynayan ölkələrdən biridir. Ölkəmiz həm neft, həm təbii qaz, həm də digər enerji resurslarının istehsalı və ixracı ilə məşğul olmaqla beynəlxalq enerji təhlükəsizliyinin təmin olunmasına töhfə verir. Azərbaycanın həyata keçirdiyi enerji layihələri və qurduğu infrastruktur bir çox ölkələrin enerji tələbatının ödənilməsində mühüm rol oynayır.
Dövlət başçısı çıxışında vurğulamışdır ki, Azərbaycan beynəlxalq enerji bazarında məsuliyyətli tərəfdaş kimi tanınır və bu mövqeyini qoruyub saxlayır. Ölkəmiz enerji bazarında sabitliyin təmin olunmasının tərəfdarıdır və bu istiqamətdə müxtəlif beynəlxalq platformalarda fəal iştirak edir. Azərbaycanın enerji siyasəti bazarda tarazlığın qorunmasına, proqnozlaşdırılan və sabit qiymətlərin formalaşmasına töhfə verməyə yönəlib.
Prezident İlham Əliyev çıxışında həmçinin qeyd etmişdir ki, enerji təhlükəsizliyi ilə yanaşı nəqliyyat və logistika sahəsində əməkdaşlıq da regionun inkişafında mühüm rol oynayır. Müasir dövrdə qlobal tədarük zəncirlərinin sabit fəaliyyəti və beynəlxalq ticarətin davamlılığı üçün etibarlı nəqliyyat marşrutlarının mövcudluğu böyük əhəmiyyət daşıyır.
Azərbaycan bu sahədə də mühüm təşəbbüslərlə çıxış edən ölkələrdən biridir. Son illər ərzində ölkəmiz nəqliyyat və logistika infrastrukturunun inkişafına böyük sərmayələr yatırmışdır. Bu investisiyalar nəticəsində Azərbaycan regionun əsas tranzit və logistika mərkəzlərindən birinə çevrilmişdir.
Prezident İlham Əliyev qeyd etmişdir ki, Azərbaycan hazırda mühüm beynəlxalq nəqliyyat dəhlizlərinin fəaliyyətində fəal iştirak edir və bu istiqamətdə yeni təşəbbüslər irəli sürür. Ölkəmizin yerləşdiyi coğrafi mövqe və yaradılmış müasir infrastruktur müxtəlif regionlar arasında iqtisadi və nəqliyyat əlaqələrinin inkişafına geniş imkanlar yaradır. Dövlət başçısının sözlərinə görə, nəqliyyat bağlantılarının genişləndirilməsi yalnız iqtisadi baxımdan deyil, eyni zamanda regionda əməkdaşlığın və qarşılıqlı etimadın möhkəmlənməsi baxımından da mühüm əhəmiyyət daşıyır. Bu proses region ölkələri arasında yeni əməkdaşlıq imkanlarının formalaşmasına və sabitliyin güclənməsinə xidmət edir.
Prezident İlham Əliyevin XIII Qlobal Bakı Forumunda səsləndirdiyi fikirlər bir daha göstərir ki, Azərbaycan regional təhlükəsizlik və sabitliyin təmin olunmasında mühüm rol oynayan dövlətlərdən biridir. Ölkəmiz həm təhlükəsizlik, həm enerji, həm də nəqliyyat sahələrində həyata keçirdiyi siyasət vasitəsilə regionda əməkdaşlığın genişlənməsinə və yeni inkişaf imkanlarının yaranmasına töhfə verir.
Bu baxımdan Azərbaycanın həyata keçirdiyi siyasət yalnız milli maraqların qorunmasına deyil, eyni zamanda regionda sülhün, sabitliyin və qarşılıqlı faydalı əməkdaşlığın möhkəmləndirilməsinə xidmət edir. Prezident İlham Əliyevin forumda səsləndirdiyi mesajlar isə göstərir ki, Azərbaycan bundan sonra da regional təhlükəsizlik və inkişaf naminə öz təşəbbüslərini davam etdirəcək.

Aynur Əsgərova,
ETİHİ Salyan rayon komitəsinin sədri, YAP fəalı