Xalq prezidentin çağırışına qoşuldu - 4 min gənc qeydiyyata alındı

Fəzail Ağamalı: “Əsgərindən generalına qədər bu döyüşdə rəşadət göstərildi”

"İyulun 15-də Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında “Əgər kimsə, hansısa vətənpərvər insan orduda xidmət etmək istəyirsə, mən bunu ancaq alqışlayıram”,- deyən Azərbaycan Prezidenti cənab İlham Əliyevin çağırışına səs verən minlərlə gənc Səfərbərlik və Hərbi Xidmətə Çağırış üzrə Dövlət Xidmətinin qeydiyyatda olduqları yerli idarə, şöbə və bölmələrinə gələrək könüllü olaraq orduda xidmət etmək haqqında öz arzularını ifadə edir və müvafiq qaydada qeydiyyata alınırlar".

KANAL4 xəbər verir ki, bu barədə Səfərbərlik və Hərbi Xidmətə Çağırış üzrə Dövlət Xidmətindən bildirilib.

"Səfərbərlik və Hərbi Xidmətə Çağırış üzrə Dövlət Xidməti vətəndaşlarımıza göstərdikləri yüksək vətənpərvərliyə görə təşəkkürünü bildirir. Bir daha xatırladır ki, hal-hazırda Azərbaycan Silahlı Qüvvələri qanunvericiliyin tələblərinə uyğun olaraq komplektləşdirilmişdir. Azərbaycan Respublikasının ərazi bütövlüyünün müdafiəsi Azərbaycan Ordusu tərəfindən tam təmin edilir. Zərurət yarandığı halda ehtiyatda olan hərbi vəzifəlilər mövcud qanunvericiliyin tələblərinə əsasən Xidmətin yerli struktur bölmələrinə çağırılaraq ölkənin müdafiəsinin və dövlətin təhlükəsizliyinin təmin edilməsi məqsədilə müvafiq tədbirlərə cəlb edilə bilərlər", məlumatda qeyd olunub.

Ana Vətən Partiyasının sədri, deputat Fəzail Ağamalı xalqımızın döyüş ruhunun hər zaman yüksək olduğunu söylədi:

“Ölkə prezidenti Nazirlər Kabinetinin 6 aylıq fəaliyyəti ilə keçirmiş olduğu müşavirədə olduqca ciddi məsələlər ətrafında fikirlərini önə çəkdi. Deyərdim ki, prezidentimizin qətiyyətli mövqeyi, sarsılmaz siyasi iradəsi onun çıxışlarında, davranışlarında birmənalı şəkildə özünü ifadə etməkdə idi. Son günlər Ermənistanın Tovuz istiqamətində silahlı qüvvələrimizin mövqelərinə atəş açması, təxribat törədərək özünün işğalçılıq addımlarına doğru irəliləmək niyyəti və bunun ordumuz tərəfindən qətiyyətlə cavablandırılması, düşmənə vurulmuş ağır zərbə hər birimizdə qürur hissi doğurur. Bu müharibədir, müharibə itkisiz olmur. Təəssüf edirəm ki, bu döyüşdə də qəhrəman övladlarımızı şəhid verdik. Əsgərindən generalına qədər bu döyüşdə rəşadət göstərildi. Şəhid olan hər bir hərbiçimizə Allah rəhmət eləsin, ruhları şad olsun. Belə bir zaman kəsiyində Azərbaycan xalqı birmənalı şəkildə dövlət başçımızla, dövlətimizlə, həm də ordumuzla bərabər oldu”.

Deputat təxribatçı qüvvələrdən də söz açdı:

“Azərbaycanın vətənpərvər övladları ilə bərabər yaranmış olan situasiyadan istifadə edən təxribatçı insanlar da bu proseslərdə göründülər. Onlar çox minlik Azərbaycan gənclərinin vətənpərvərlikləri altında çox cılız və zəif göründülər. Dövlətimiz ölkə prezidentinin dediyi kimi onlara qarşı kəskin münasibətini ortaya qoyacaq. Təxribat törədənlər öz cəzalarını mütləq alacaqlar.

Ölkə başçısı vətənpərvər insanların ordumuzu müdafiə etmələri ilə yanaşı, onların orduda xidmət etmək istəklərini alqışladı. Olduqca maraqlı bir təklif irəli sürdü ki, kimsə orduda olmaq istəyirsə, buyursunlar Səfərbərlik Xidmətlərinə müraciət etsinlər, orada qeydiyyatdan keçsinlər. Bu bir çağırış idi. Məndə də məlumatlar var ki, bu çağırışın ardından ayrı-ayrı yerlərdə çoxsaylı vətən oğulları artıq qeydiyyata durmaq üçün Səfərbərlik Xidmətlərinə müraciət etməkdədirlər. Bu bir daha xalqımızın, ölkə gəncliyinin ordumuzla bərabər olduğunu nümayiş etdirdi.

Eyni zamanda, Azərbaycan xalqının heç bir halda, heç bir şərtlə torpaqlarımızın erməni tapdağında qalmasına imkan verməyəcəyini bütün dünyaya çatdırdı. Bu gündən etibarən ölkə prezidentinin çağırışına qoşularaq Səfərbərlik Xidmətlərinin qarşısına getməklə özlərinin torpağa, vətənə bağlı olduqlarını konkret əməllə sübut etdilər. Bu Azərbaycanı istəməyən dairələrə, eyni zamanda, təxribat törətmək istəyənlərə qarşı sözün həqiqi mənasında tərs sillə funksiyasını yerinə yetirdi. Bütün bunlar sübut etdi ki, xalqımızın döyüş ruhu yüksəkdir. Xalqımızın mütləq əksəriyyəti torpaqlarımızı azad etmək hər cür fədakarlığa hazırdır. Bunu da düşünməliyik ki, atmış olduğumuz addımlar dövlətimizin həyata keçirmək istədiyi tədbirlərə, planlara mane olmalı deyil.

Güclü ordumuz var. Kifayət qədər müasir, hərbi texnika ilə silahlanmış peşəkar silahlı qüvvələrimiz var. Əminəm ki, bunlar istənilən döyüş tapşırıqlarını yerinə yetirməyə qadirdir. Bunu bir neçə gündür davam etməkdə olan Tovuz istiqamətindəki qarşıdurma da sübut edir. Bundan sonra gənclərimizə səslənirəm, antimilli qüvvələrə, təxribat törətmək istəyənlərə qarşı mübarizəmizi gücləndirək, ordumuzun yanında olaq. İnformaasiya müharibəsində də ordumuz kimi qalib gəlməliyik. İşğal olunmuş torpaqlarımızda bayrağımızı dalğalandıraq, ordumuzla bərabər olaq”.

KANAL 4 

Səmil Şahlaroğlu