Yeni Azərbaycan Partiyasının VIII Qurultayında Möhtərəm Cənab Prezidenti, Yeni Azərbaycan Partiyasının Sədri İlham Əliyevin proqram xarakterli çıxışı ölkəmizin keçdiyi tarixi yolun, qazandığı möhtəşəm nailiyyətlərin və qarşıdakı dövr üçün müəyyənləşdirilən strateji hədəflərin dolğun ifadəsidir.

Qurultayın xüsusi tarixi əhəmiyyəti var. Yeni Azərbaycan Partiyası ilk dəfədir ki, qurultayı Azərbaycanın ərazi bütövlüyünü və suverenliyini tam bərpa etdiyi, separatizmə birdəfəlik son qoyduğu, qalib və qüdrətli dövlət kimi yeni geosiyasi reallıqlar formalaşdırdığı bir dövrdə keçirtdi. 8 Noyabr Zəfəri və 20 Sentyabr suverenliyimizin tam bərpası müasir dövlətçilik tariximizin iki mühüm zirvəsidir. Sözügedən tarixi nailiyyətlərin əsasında Möhtərəm Cənab Prezident İlham Əliyevin qətiyyətli liderliyi, Ordumuzun qəhrəmanlığı və xalq-iqtidar birliyi dayanır.

Dövlətimizin başçısının çıxışında səsləndirdiyi mühüm fikirlərdən biri də Azərbaycanın öz haqqını böyük siyasi təzyiqlər, ikili standartlar və geosiyasi müqavimət fonunda təmin etməsi ilə bağlı idi. Otuz ilə yaxın müddətdə həllini tapmayan münaqişəyə Azərbaycan özü son qoydu. Beynəlxalq hüququn kağız üzərində qalan prinsiplərini Azərbaycan dövləti öz siyasi iradəsi və hərbi qüdrəti ilə gerçəkliyə çevirdi. Bununla da sübut olundu ki, milli maraqların ardıcıl müdafiəsi, güclü dövlət, qüdrətli Ordu və xalqın vahid mövqeyi qarşısında heç bir təzyiq nəticə verə bilməz.

Ermənistan Azərbaycanın ərazi bütövlüyünü tanıyıb, sülh müqaviləsi paraflanıb, regionda tamamilə yeni siyasi reallıq yaranıb. Reallığın müəllifi Möhtərəm Cənab Prezident İlham Əliyevdir. 

Cənab Prezident İlham Əliyevin çıxışında Yeni Azərbaycan Partiyasının keçdiyi tarixi yolun dövlətçilik tariximizlə bağlılığı da xüsusi vurğulandı. 1992-ci ilin noyabrında Naxçıvanda Ulu Öndər Heydər Əliyevin rəhbərliyi ilə Yeni Azərbaycan Partiyasının yaradılması Azərbaycan cəmiyyətinin dövlətçiliyin qorunmasına, ölkənin parçalanmaq təhlükəsindən xilas edilməsinə və güclü siyasi liderliyə olan tələbinin ifadəsi idi.

1993-cü ildə xalqın təkidli tələbi ilə Ulu Öndər Heydər Əliyevin siyasi hakimiyyətə qayıdışı Azərbaycanı məhv olmaq təhlükəsindən xilas etdi. Dövlətçiliyimizin əsasları möhkəmləndirildi, siyasi sabitlik təmin olundu, iqtisadi inkişafın təməli qoyuldu, beynəlxalq təcrid aradan qaldırıldı və müstəqil Azərbaycanın uzunmüddətli inkişaf strategiyası müəyyənləşdirildi. “Əsrin müqaviləsi” ilə başlayan iqtisadi yüksəliş sonrakı mərhələdə Azərbaycanın siyasi və iqtisadi müstəqilliyinin əsas dayaqlarından birinə çevrildi.

Ölkə başçımız Cənab İlham Əliyevin rəhbərliyi ilə bu siyasi xətt yeni dövrün çağırışlarına uyğun olaraq daha böyük miqyas aldı. Azərbaycan iqtisadi cəhətdən müstəqil, güclü orduya malik, öz milli maraqlarını qətiyyətlə müdafiə edən və heç bir xarici siyasi mərkəzdən asılı olmayan dövlətə çevrildi. Bu gün ölkəmizin bir sıra beynəlxalq ekspertlər tərəfindən “orta güc dövləti” kimi xarakterizə edilməsi reallıqdır. Azərbaycan regionda baş verən proseslərin istiqamətini müəyyən edən mühüm geosiyasi aktor kimi çıxış edir.

Dövlət başçımızın gələcək hədəflərlə bağlı müəyyən etdiyi prioritetlər də xüsusi əhəmiyyət daşıyır. Dünyada beynəlxalq hüququn təsir imkanlarının zəiflədiyi, müharibə və münaqişələrin coğrafiyasının genişləndiyi mürəkkəb şəraitdə Azərbaycanın hərbi qüdrətinin daha da artırılması strateji zərurətdir. Qələbə qazanmağımız arxayınlaşmaq üçün əsas deyil. Əksinə, tarixi təcrübəmiz göstərir ki, dövlətimizin təhlükəsizliyi yalnız güclü Ordu, möhkəm iqtisadiyyat, milli birlik və hər an özünü müdafiə etmək imkanları üzərində qurulmalıdır.

Möhtərəm Cənab Prezident İlham Əliyevin ideoloji təhlükəsizliklə bağlı səsləndirdiyi fikirlər müasir dövr üçün son dərəcə aktualdır. İnformasiya müharibələrinin, süni intellektin, kiberhücumların və xaricdən yönəldilən manipulyativ təsirlərin genişləndiyi bir zamanda dövlət sərhədlərinin qorunması qədər milli şüurun və informasiya məkanının qorunması da vacibdir. Bunun ən güclü vasitələri keyfiyyətli təhsil, tarixi yaddaş, milli-mənəvi dəyərlərə bağlılıq və vətənpərvərlikdir. Bu istiqamətdə hər bir Azərbaycanlının üzərinə məsuliyyət düşür. Müasir ideoloji fəaliyyət Azərbaycanın həqiqətlərini, əldə etdiyi uğurları və qarşısında duran məqsədləri xüsusilə gənc nəslə yeni kommunikasiya vasitələri ilə çatdırmalıdır.

Azərbaycanın xarici siyasətdə əldə etdiyi mövqe dövlətimizin artan qüdrətinin bariz göstəricisidir. Azərbaycan öz milli maraqlarına əsaslanan, bərabərhüquqlu əməkdaşlığa söykənən müstəqil xarici siyasət həyata keçirir. Müxtəlif siyasi qütblərlə münasibətlər qurmaqla yanaşı, öz prinsipial mövqeyini qoruyur. Azərbaycanın etibarlı tərəfdaş kimi qəbul olunmasının əsas səbəbi də məhz sözünə, imzasına və öhdəliklərinə sadiqliyidir.

Türk dünyası, Mərkəzi Asiya, İslam dünyası, Avropa, Çin və Amerika Birləşmiş Ştatları ilə münasibətlərin yeni səviyyəyə yüksəlməsi Azərbaycanın çoxvektorlu və milli maraqlara söykənən diplomatiyasının nəticəsidir. Ölkəmizin İslam həmrəyliyinin gücləndirilməsində oynadığı birləşdirici rol, beynəlxalq dialoq üçün etibarlı məkan kimi qəbul edilməsi və müxtəlif siyasi qütblər arasında ünsiyyət platformasına çevrilməsi onun beynəlxalq nüfuzunun real göstəricisidir.

Möhtərəm Cənab Prezident İlham Əliyevin çıxışında iqtisadi və sosial məsələlərə geniş yer ayrılması dövlət siyasətinin mərkəzində Azərbaycan vətəndaşının dayandığını bir daha göstərdi. Minimum əməkhaqqının, pensiyaların və sosial müavinətlərin artırılmasının qarşıya məqsəd qoyulması sosial rifahın yüksəldilməsinin bundan sonra da əsas istiqamətlərdən olacağını göstərir. Eyni zamanda, xarici borcun aşağı səviyyəsi, böyük valyuta ehtiyatları, ölkəyə milyardlarla dollar həcmində yeni investisiyaların cəlb olunması Azərbaycanın maliyyə dayanıqlığının və iqtisadi müstəqilliyinin göstəricisidir.

Enerji və nəqliyyat sahələrində Azərbaycanın artan rolu ölkəmizi qlobal iqtisadi və təhlükəsizlik sisteminin mühüm elementinə çevirir. Azərbaycan neft, təbii qaz və elektrik enerjisinin etibarlı təchizatçısı olmaqla yanaşı, Şərqlə Qərbi, Şimalla Cənubu birləşdirən mühüm nəqliyyat qovşağına çevrilir. Orta Dəhliz və Şimal-Cənub nəqliyyat marşrutlarının imkanlarının genişləndirilməsi ölkəmizin geoiqtisadi əhəmiyyətini qarşıdakı illərdə daha da artıracaq.

Bütün bunlarla yanaşı, qarşıda duran ən müqəddəs vəzifələrdən biri Qarabağ və Şərqi Zəngəzurun dirçəldilməsidir. İşğaldan azad edilmiş ərazilərdə aparılan genişmiqyaslı quruculuq işləri tarixi ədalətin tam bərpası, keçmiş məcburi köçkünlərin doğma yurdlarına qayıdışı və Zəfərimizin sosial-iqtisadi məzmunla tamamlanmasıdır. “Böyük Qayıdış”ın bundan sonra daha da sürətlənməsi bütöv Azərbaycanın yeni inkişaf mərhələsinin əsas istiqamətlərindən biri olacaq.

Yeni Azərbaycan Partiyasının VIII Qurultayı bir daha göstərdi ki, Azərbaycan gələcəyin hədəflərini müəyyən edən qüdrətli ölkədir. Ərazi bütövlüyümüz və suverenliyimiz tam təmin olunub, dövlətimizin beynəlxalq nüfuzu yüksəlib, iqtisadi müstəqilliyimiz möhkəmlənib və Azərbaycan xalqı öz gələcəyinə inamla baxır.

Qarşımızda yeni tarixi mərhələ dayanır. Bu mərhələnin əsas fəlsəfəsi güclü dövlət, qüdrətli Ordu, dayanıqlı iqtisadiyyat, sosial rifah, milli birlik, ideoloji təhlükəsizlik və müstəqil xarici siyasətdir.

Ulu Öndər Heydər Əliyevin müəyyən etdiyi dövlətçilik yolu və dövlət başçımız Cənab İlham Əliyevin qətiyyətlə həyata keçirdiyi siyasi strategiya Azərbaycanın bundan sonrakı inkişafının da möhkəm təməlidir. Yeni Azərbaycan Partiyası yarandığı gündən olduğu kimi, bundan sonra da dövlətçiliyimizin möhkəmləndirilməsi, milli maraqlarımızın qorunması və Azərbaycanın yeni qələbələrə doğru inamla irəliləməsi naminə üzərinə düşən məsuliyyəti layiqincə yerinə yetirəcəkdir.1q

Bu gün Azərbaycan qalib, suveren, öz taleyinin sahibi və gələcəyini özü müəyyən edən qüdrətli dövlətdir. Qarşıdakı əsas vəzifəmiz bu tarixi nailiyyətləri qorumaq, onları daha da möhkəmləndirmək və gələcək nəsillərə daha güclü Azərbaycan əmanət etməkdir.

Günay Ağamalı

Milli Məclisin deputatı,

Ana Vətən Partiyasının sədri.

02 Oktyabr 2026-cı il.