4 oktyabr Azərbaycan tarixində qürurla xatırlanan, xalqımızın milli yaddaşında Zəfərin mühüm rəmzlərindən birinə çevrilən əlamətdar gündür. 2020-ci ilin məhz bu günündə Azərbaycan Ordusu Cəbrayıl şəhərini və rayonun kəndlərini Ermənistanın uzun illər davam edən işğalından azad etdi.

Bu sözləri Teleqraf-a açıqlamasında Milli Məclisin deputatı, Ana Vətən Partiyasının sədri Günay Ağamalı deyib.

Onun sözlərinə görə, Prezident İlham Əliyevin 31 iyul 2023-cü il tarixli Sərəncamı ilə 4 oktyabrın Cəbrayıl Şəhəri Günü kimi təsis edilməsi bu tarixi Zərfərin dövlət səviyyəsində əbədiləşdirilməsinin ifadəsidir.

"Cəbrayıl 1993-cü il avqustun 23-də Ermənistan Silahlı Qüvvələri tərəfindən işğal edilmişdi. 27 il davam edən işğal dövründə rayonun yaşayış məntəqələri, məktəbləri, səhiyyə və mədəniyyət müəssisələri, tarixi-mədəni abidələri məqsədli şəkildə dağıdıldı, təbii sərvətləri talan edildi. Xudafərin körpüsündən qədim türbə və məqbərələrə qədər xalqımızın çoxəsrlik tarixini özündə yaşadan zəngin irs vandalizmə məruz qaldı. On minlərlə cəbrayıllı doğma yurdlarından didərgin salınaraq uzun illər məcburi köçkün həyatı yaşamağa məcbur oldu.

Bütün amansızlıqlara baxmayaraq Cəbrayıl heç zaman unudulmadı. Doğma torpağa qayıdış arzusu xalqımızın qəlbində yaşadı, dövlətimizin siyasi iradəsində öz əksini tapdı. 1994-cü ilin Horadiz əməliyyatı zamanı Cocuq Mərcanlının azad edilməsi, 2016-cı ilin Aprel döyüşlərində Lələtəpə yüksəkliyinin nəzarətimizə qaytarılması gələcək Böyük Zəfərin mühüm hərbi-siyasi mərhələləri idi. Cocuq Mərcanlıya həyatın qaytarılması sonrakı illərdə gerçəkləşəcək Böyük Qayıdışın ilk müjdəsi oldu.

2020-ci il sentyabrın 27-də Müzəffər Ali Baş Komandan, Cənab Prezident İlham Əliyevin rəhbərliyi ilə Azərbaycan Ordusunun başladığı əks-hücum əməliyyatları tarixi ədalətin bərpasına yol açdı", - deyə qeyd edib.

Deputat vurğulayıb ki, oktyabrın 4-də Cəbrayıl şəhərinin azad olunması Vətən müharibəsinin gedişində mühüm strateji dönüş nöqtələrindən idi.

G.Ağamalı qeyd edib ki, düşmənin illərlə qurduğu çoxpilləli müdafiə və istehkam xətlərinin yarılması Azərbaycan əsgərinin peşəkarlığının, şücaətinin və Vətən sevgisinin parlaq təcəssümünə çevrildi: "Cəbrayılın azad edilməsi sonrakı hərbi əməliyyatlar üçün geniş imkanlar yaratdı. Ordumuzun irəliləyişi Hadrut, Zəngilan, Qubadlı və digər istiqamətlərdə uğurla davam etdi. Azərbaycan əsgərinin Arazboyu torpaqlarımızda irəliləməsi, üçrəngli əzəmərli bayrağımızın qədim Xudafərin körpüsü üzərində dalğalanması xalqımızın yaddaşına həkk olunan tarixi anlardan oldu. Ölkə başçımız Cənab İlham Əliyevin Xudafərində bayrağımızı ucaltması dövlətimizin öz tarixi torpaqlarına qayıdışının siyasi və mənəvi rəmzinə çevrildi.

Sözügedən Qələbənin arxasında dövlət başçımızın qətiyyəti, şəhidlərimizin müqəddəs xatirəsi, qazilərimizin qəhrəmanlığı dayanır. Cəbrayıl uğrunda döyüşlərdə göstərilən igidlik dövlətimiz tərəfindən yüksək qiymətləndirilib, minlərlə hərbi qulluqçu “Cəbrayılın azad olunmasına görə” medalı ilə təltif edilib. Biz azad Cəbrayıldan danışarkən həmin Zəfərin Müzəffər Ali Baş Komandan, Möhtərəm Cənab Prezident İlham Əliyevin müdrik rəhbərliyi, qəhrəman Ordumuzun şücaəti və şəhidlərimizin canı, qanı bahasına qazanıldığını heç zaman unutmayacağıq.

Cəbrayılın taleyində tamamilə yeni dövr başlayıb. Bir zamanlar xarabalığa çevrilmiş ərazilərdə indi genişmiqyaslı quruculuq işləri aparılır, yaşayış kompleksləri, məktəblər, xəstəxanalar, yollar, enerji infrastrukturu, istehsal və sahibkarlıq obyektləri yaradılır. Cəbrayıl müasir şəhərsalma prinsipləri əsasında yenidən qurulur.

“Araz Vadisi İqtisadi Zonası” Sənaye Parkının yaradılması Cəbrayılın gələcək iqtisadi potensialının formalaşdırılması baxımından xüsusi əhəmiyyət daşıyır. Yeni müəssisələrin fəaliyyətə başlaması, iş yerlərinin yaradılması, nəqliyyat-logistika imkanlarının genişləndirilməsi Cəbrayılın regionun mühüm iqtisadi mərkəzlərindən birinə çevrilməsi üçün möhkəm zəmin yaradır. Horadiz–Cəbrayıl–Zəngilan–Ağbənd, Şükürbəyli–Cəbrayıl–Hadrut və digər yol layihələri rayonun Qarabağ və Şərqi Zəngəzurun vahid nəqliyyat sisteminə inteqrasiyasını təmin edir.

Enerji sahəsində həyata keçirilən layihələr Cəbrayılın gələcəyinə hesablanmış strateji addımlardır. “Cəbrayıl” yarımstansiyasının, Soltanlı kəndində 330 kV-luq “Şəfəq” yarımstansiyasının istifadəyə verilməsi, günəş elektrik stansiyalarının yaradılması bu torpaqların yaşıl enerji məkanına çevrilməsi istiqamətində dövlətimizin ardıcıl siyasətinin göstəricisidir.

Ən mühüm hadisə insanların öz ata-baba yurdlarına qayıtmasıdır. 2024-cü ilin sentyabrında Cəbrayıl şəhərinə ilk köç karvanının yola salınması ilə uzun illərin həsrəti qayıdışla əvəz olundu. Günümüzdə Cəbrayıl şəhərində, Horovlu və Şükürbəyli kəndlərində minlərlə keçmiş məcburi köçkün artıq öz doğma torpağında yaşayır. Yeni evlərin işıqları yanır, məktəblərdə uşaqların səsi eşidilir, kəndlərdə həyat yenidən canlanır. Böyük Qayıdışın əsl mənası da məhz budur.

Möhtərəm Cənab Prezident İlham Əliyevin Cəbrayıla çoxsaylı səfərləri, burada mühüm infrastruktur və sosial layihələrin təməlini qoyması, yeni obyektlərin açılışlarında iştirakı göstərir ki, azad edilmiş ərazilərin dirçəldilməsi dövlət siyasətinin əsas prioritetlərindəndir. Sözügedən siyasətin mərkəzində doğma yurduna qayıdan, təhlükəsiz, ləyaqətli və firavan gələcəyini quran Azərbaycan vətəndaşı dayanır.

Cəbrayılın bugünkü mənzərəsi həm də iki dövr arasındakı böyük fərqin ifadəsidir. Ermənistanın 27 il ərzində qoyub getdiyi dağıntıların yerində dövlətimiz qurur, yaradır və həyata qaytarır. Dünən xarabalıq olan ərazilərdə bu gün evlər tikilir, yollar çəkilir, enerji və istehsal infrastrukturu yaradılır, sabahın şəhərləri və kəndləri salınır. Bütün bunlar Azərbaycan dövlətinin gücünün, iqtisadi imkanlarının və öz torpaqlarına sahib çıxmaq iradəsinin ən aydın göstəricisidir.

Bu gün 4 Oktyabr – Cəbrayıl Şəhəri Gününü qeyd edərkən böyük qürurla deyə bilirik ki, Cəbrayıl azaddır, Cəbrayıl dirçəlir, Cəbrayıl öz sakinlərinə qovuşur. Cəbrayıl daxil olmaqla azad edilmiş bütün torpaqlarımız bundan sonra Azərbaycanın gücünün, inkişafının və milli iradəsinin əbədi ünvanı olacaq".