Azərbaycan və Özbəkistan arasında münasibətlər son illərdə yalnız siyasi dialoqla məhdudlaşmayan, ortaq tarix, mədəniyyət və milli-mənəvi dəyərlər üzərində möhkəmlənən strateji tərəfdaşlıq modelinə çevrilib. İki ölkə liderləri arasında formalaşmış yüksək siyasi etimad və qarşılıqlı hörmət bu əlaqələrin yeni məzmun qazanmasına, əməkdaşlığın iqtisadiyyatdan nəqliyyata, humanitar sahədən şəhərlərarası əlaqələrə qədər genişlənməsinə imkan yaradıb. Möhtərəm Cənab Prezident İlham Əliyevin Özbəkistana dövlət səfəri də məhz bu baxımdan Azərbaycan-Özbəkistan münasibətlərinin gələcək istiqamətlərini müəyyən edən mühüm siyasi hadisə kimi diqqət çəkir.

Sözügedən görüş ilə bağlı Milli Məclisin deputatı Günay Ağamalı Patrul.az-a açıqlama verib. O qeyd edib ki, möhtərəm Cənab Prezident İlham Əliyevin Özbəkistana dövlət səfəri Azərbaycan-Özbəkistan münasibətlərinin müasir tarixində mühüm siyasi hadisə olmaqla yanaşı, iki qardaş ölkə arasında müttəfiqlik əlaqələrinin daha da möhkəmləndirilməsinin bariz ifadəsidir:

‘’Səfər çərçivəsində keçirilən yüksək səviyyəli görüşlər, Azərbaycan və Özbəkistan Ali Dövlətlərarası Şurasının üçüncü iclası, imzalanan sənədlər və əldə olunan razılaşmalar münasibətlərimizin artıq konkret hədəflərə və uzunmüddətli strateji perspektivlərə əsaslandığını göstərir.

Azərbaycan və Özbəkistanı birləşdirən bağların təməlində ortaq tarix, dil, mədəniyyət, milli-mənəvi dəyərlər və xalqlarımızın əsrlər boyu qoruyub saxladığı qardaşlıq münasibətləri dayanır. Möhtərəm Cənab Prezident İlham Əliyevin Özbəkistanın Milli İnformasiya Agentliyinə müsahibəsində vurğuladığı kimi, bu möhkəm bünövrə üzərində qurulan dövlətlərarası münasibətlər son illərdə misli görünməmiş inkişaf mərhələsinə qədəm qoyaraq ən yüksək pilləyə – müttəfiqlik səviyyəsinə yüksəlib. Dövlət başçımızla Özbəkistan Prezidenti Şavkat Mirziyoyev arasında formalaşmış səmimi dostluq, qarşılıqlı hörmət və yüksək siyasi etimad bu münasibətlərin dinamik inkişafında xüsusi rol oynayır. Səfərin ən mühüm nəticələrindən biri Cənab Prezident İlham Əliyev və Prezident Şavkat Mirziyoyev tərəfindən “Azərbaycan Respublikası ilə Özbəkistan Respublikası arasında əbədi dostluq haqqında Müqavilə”nin imzalanmasıdır. Sözügedən sənəd iki qardaş xalq arasında tarixi bağların dövlətlərarası münasibətlər müstəvisində daha möhkəm hüquqi-siyasi əsaslarla təsbit olunması baxımından xüsusi əhəmiyyət daşıyır’’.

Deputat bildirib ki, eyni zamanda, Ali Dövlətlərarası Şuranın üçüncü iclasının Qərarının imzalanması münasibətlərin institusional mexanizmlər əsasında ardıcıl inkişaf etdirildiyini nümayiş etdirir:

‘’İmzalanan və mübadilə olunan sənədlərin əhatə dairəsi əməkdaşlığın çoxşaxəli olduğunu ortaya qoyur. Turizm və mədəniyyət sahələrində əməkdaşlıq sazişləri, pensiya təminatı, xarici siyasət qurumları arasında əməkdaşlıq proqramı, dövlət xidmətləri sahəsində qarşılıqlı fəaliyyət, eləcə də şəhərlərimiz arasında qardaşlaşma münasibətlərinin yaradılması haqqında protokollar iki ölkənin əlaqələrinin siyasi müstəvidən iqtisadi, sosial və humanitar sahələrə qədər genişləndiyini göstərir.

Xüsusilə Azərbaycan ilə Özbəkistan arasında ticarət dövriyyəsinin 2030-cu ilədək 1 milyard ABŞ dollarına çatdırılması üzrə Proqramın, həmçinin investisiyalar və ticarət sahəsində layihələrin həyata keçirilməsi üzrə Yol Xəritəsinin qəbul edilməsi xüsusi əhəmiyyət daşıyır.  Adıçəkilən sənədlər qarşılıqlı iqtisadi münasibətlər üçün hədəflər müəyyənləşdirir, birgə investisiya təşəbbüslərinin genişləndirilməsinə və yeni layihələrin həyata keçirilməsinə zəmin yaradır. Xankəndi ilə Ürgənc, Naxçıvanla Ürgənc, Laçınla Buxara arasında qardaşlaşma münasibətlərinin qurulması xüsusi məna daşıyır. Bu addımlar Azərbaycan və Özbəkistan arasında münasibətlərin həm də regionlar və şəhərlər arasında da genişlənməsinə xidmət edir. Eyni zamanda, Özbəkistanın Azərbaycanın işğaldan azad edilmiş ərazilərinin bərpasına və dirçəlişinə verdiyi mənəvi dəstəyin davamı kimi mühüm əhəmiyyət kəsb edir’’.

Həmsöhbətimizin sözlərinə görə, günümüzdə Azərbaycan-Özbəkistan münasibətləri Türk dünyasının birliyinə və regional inteqrasiyaya töhfə verir:

‘’Bakı ilə Daşkənd arasında siyasi dialoqun yüksək səviyyəsi, iqtisadi və investisiya layihələrinin genişlənməsi, nəqliyyat-logistika imkanlarının birləşdirilməsi, o cümlədən, elm, təhsil, mədəniyyət və humanitar sahələrdə əməkdaşlığın dərinləşdirilməsi bütövlükdə Türk Dövlətləri Təşkilatının güclənməsinə xidmət edir. Möhtərəm Cənab Prezident İlham Əliyevin Özbəkistana dövlət səfəri Azərbaycan-Özbəkistan qardaşlığının və müttəfiqliyinin inkişafında yeni tarixi mərhələnin əsasını qoydu. Əldə olunan razılaşmalar və imzalanan sənədlər iki ölkə arasında münasibətlərin gələcək inkişaf istiqamətlərini müəyyənləşdirir. Azərbaycan və Özbəkistanın siyasi iradəsi, qarşılıqlı etimadı və qardaşlıq münasibətləri bundan sonra da xalqlarımızın rifahına, Türk dünyasının birliyinin möhkəmlənməsinə, regionda sabitliyin və davamlı inkişafın təmin olunmasına mühüm töhfələr verəcəkdir’’.