Siyasi mühacir” adı məsuliyyətdən xilas etmir - radikallara sərt xəbərdarlıq

Son illər sosial şəbəkələr üzərindən fəaliyyət göstərən və özlərini "müxalifət" kimi təqdim edən bəzi dairələrin söyüşü, təhqiri, böhtanı və dezinformasiyanı siyasi fəaliyyət üsuluna çevirməsi təkcə Azərbaycanda deyil, sığındıqları ölkələrdə də hüquqi qiymətlə qarşılaşmağa başlayıb. Uzun müddət cəzasız qalacaqlarını düşünən bu çevrələrin nümayəndələri barədə xarici məhkəmələrin çıxardığı qərarlar göstərir ki, ifadə azadlığı heç bir halda şərəf və ləyaqətin tapdalanmasına, yalan və böhtanın hüquqi məsuliyyətdən kənarda qalmasına haqq qazandırmır.

Milli Məclisin deputatı, Ana Vətən Partiyasının sədri Günay Ağamalı Musavat.com-a bildirdi ki, Azərbaycanın müasir siyasi tarixində sağlam dialoq mühitinin və milli-mənəvi dəyərlərin qorunması hər bir siyasətçinin və vətəndaşın ali borcudur: “ Təəssüflər olsun ki, son illərdə özünü “müxalifət” kimi təqdim edən bəzi radikallar siyasi polemikanı fikir yarışından çıxararaq açıq-aydın təhqir, böhtan, şantaj və şəxsi ləkələmə müstəvisinə daşıyblar. Cəmiyyətdə haqlı olaraq “söyüş müxalifəti” kimi tanınan bu ünsürlərin fəaliyyəti sosial şəbəkələrdə aqressiya, nifrət dili və mənəvi deqradasiya mühiti yaratmağa xidmət edir. Siyasi mübarizənin əsas təməli arqumentə, fakta, konstruktiv təkliflərə və dövlətçilik maraqlarına söykənən fikir mübadiləsidir. Söyüşü siyasi alətə çevirənlər üçün hüququn, etik normaların və siyasi mədəniyyətin heç bir əhəmiyyəti yoxdur. Onların fəaliyyətinin mərkəzində izləyici toplamaq, qalmaqal yaratmaq və ucuz populyarlıq qazanmaq, heç bir sübut ortaya qoymadan dövlət əməkdaşlarını, millət vəkillərini, ictimai-siyasi xadimləri hədəfə almaq, hətta ailə institutuna toxunmaq, gənc nəsil üçün son dərəcə mənfi nümunə formalaşdırmaq, küçə leksikonunu təşviq etməkdir. Sözügedən destruktiv davranışlar xarici havadarlarının sifarişi ilə “söz azadlığı” pərdəsi altında təqdim olunmağa çalışılır. Halbuki dünyanın heç bir sivil, demokratik ölkəsində böhtan, təhqir və ləyaqətin alçaldılması söz azadlığı kimi qəbul edilə bilməz. Söyüş siyasi acizliyin və mədəniyyətsizliyin açıq sübutudur”.

Parlamentari diqqətə çatdırdı ki, xaricdə yaşamaq, sosial şəbəkə arxasında gizlənmək heç kəsə qanun qarşısında məsuliyyətdən yayınmaq hüququ vermir: “Böhtan və təhqiri peşəyə çevirənlər hüquqi müstəvidə cavab verəcəklər. Əslində, söyüş müxalifətinin ən böyük məğlubiyyəti məhkəmə qərarlarından əvvəl məhz Azərbaycan cəmiyyəti tərəfindən verilib. Xalqımız siyasi tənqidlə söyüşü, fikir plüralizmi ilə böhtanı, sağlam müxalifətlə qeyri-etik qarşıdurmanı ayırmağı bacarır. Konstruktiv tənqidi hər zaman dəyərləndirən cəmiyyətimiz şəxsi təhqiri, ailə dəyərlərinin hədəfə alınmasını və yalan kampaniyalarını heç vaxt qəbul etmir və etməyəcək. Tarix göstərir ki, nifrət dili üzərində qurulan ritorika heç vaxt uzunömürlü olmur. İdeyasız, proqramsız və ölkənin gələcəyi ilə bağlı heç bir real baxışı olmayan bu cür qruplar müəyyən müddət süni səs-küy yaratsalar da, sonda öz auditoriyalarını da itirərək silinməyə məhkumdurlar. Qanun qarşısında hər kəs bərabərdir. Xaricdə məskunlaşıb özünü “siyasi mühacir” adlandıranlar heç bir halda vətəndaşlarımızın şərəf və ləyaqətini alçalda bilməz. Hüquqi mexanizmlərin sərt şəkildə işləməsi və böhtana qarşı mübarizə sağlam ictimai münasibətlərin qorunmasının təminatçısıdır.

Azərbaycan hüquq dövlətidir və hüququn aliliyi heç kim üçün istisna tanımır. Özünü "siyasi fəal", “müxalifətçi2 və ya “siyasi mühacir” adlandırmaq heç kəsə böhtan atmaq, insanları təhqir etmək, ailələri hədəfə almaq və cəmiyyətdə nifrət toxumu səpmək hüququ vermir. Kimliyindən və harada yaşamasından asılı olmayaraq, qanunu pozan öz əməlinə görə hüquq qarşında cavab verəcəkdir”.

G.Ağamalı Azərbaycan cəmiyyətinin söyüşü siyasət hesab etmədiyini də xüsusi vurğuladı: “Dövlətçilik əleyhinə yönəlmiş, milli-mənəvi dəyərləri hədəfə alan, təhqir və böhtanı fəaliyyət üsuluna çevirən radikal çevrələrin gələcəyi yoxdur. Onların yaratdığı süni səs-küy nə həqiqəti dəyişə, nə də dövlətin iradəsini sarsıda bilər. Hüquq öz sözünü deyəcək, cəmiyyət isə söyüşü seçənləri qətiyyətlə rədd etməyə davam edəcəkdir. Azərbaycanın gələcəyi milli birlik, qanunun aliliyi və məsuliyyətli siyasi mədəniyyət üzərində qurulur”.