Dilini Qoruyan Xalq Öz Tarixini və Mədəniyyətini Qoruyur: Ömər Hüseynli.

Hər bir xalqın milli kimliyini, tarixini və mədəniyyətini yaşadan ən böyük mənəvi sərvəti onun ana dilidir. Azərbaycan dili əsrlər boyu xalqımızın düşüncə tərzini, milli-mənəvi dəyərlərini və zəngin ədəbi irsini qoruyaraq bu günümüzə qədər gəlib çatmışdır. Məhz bu dəyərin əhəmiyyətini vurğulamaq məqsədilə hər il 1 Avqust Azərbaycan Əlifbası və Azərbaycan Dili Günü ölkəmizdə böyük ehtiramla qeyd olunur. Azərbaycan dili zəngin söz ehtiyatına, ahəngdar fonetik quruluşa və geniş ifadə imkanlarına malik olan qədim dillərdən biridir. Nizami Gəncəvi, İmadəddin Nəsimi, Məhəmməd Füzuli, Mirzə Fətəli Axundzadə, Cəlil Məmmədquluzadə və digər söz ustalarının yaratdıqları ölməz əsərlər ana dilimizin qüdrətini və gözəlliyini bütün dünyaya nümayiş etdirmişdir. Azərbaycan dilinin dövlət dili kimi qorunması və inkişaf etdirilməsi istiqamətində Ulu Öndər Heydər Əliyevin müstəsna xidmətləri vardır. O, ana dilini milli varlığımızın əsas dayaqlarından biri kimi qiymətləndirir, onun saflığının qorunmasını və gələcək nəsillərə çatdırılmasını dövlət siyasətinin mühüm istiqamətlərindən biri hesab edirdi. Ulu Öndərin təşəbbüsü ilə Azərbaycan dilinin dövlət dili statusu daha da möhkəmləndirilmiş, latın qrafikalı Azərbaycan əlifbasına keçid uğurla həyata keçirilmişdir. Onun 2001-ci il 9 avqust tarixli Sərəncamı ilə hər il 1 Avqustun Azərbaycan Əlifbası və Azərbaycan Dili Günü kimi qeyd edilməsi qərara alınmışdır. Bu qərar ana dilimizin inkişafı və təbliği istiqamətində atılmış mühüm tarixi addımlardan biri olmuşdur. Bu gün də Azərbaycan Respublikasının Prezidenti cənab İlham Əliyev tərəfindən Azərbaycan dilinin qorunması, inkişafı və zənginləşdirilməsi istiqamətində ardıcıl tədbirlər həyata keçirilir. Dövlət dilinin nüfuzunun artırılması, dil normalarının qorunması və gənc nəslin ana dilinə sevgi ruhunda tərbiyə olunması dövlət siyasətinin mühüm istiqamətlərindən biridir. Qloballaşma dövründə ana dilimizi qorumaq hər bir vətəndaşın mənəvi borcudur. Gündəlik həyatda, təhsildə, mediada və rəqəmsal platformalarda Azərbaycan dilindən düzgün istifadə etmək milli kimliyimizə və dövlətçiliyimizə hörmətin ifadəsidir. Dilini qoruyan xalq öz tarixini, mədəniyyətini və milli varlığını da qoruyur.  1 Avqust Azərbaycan Əlifbası və Azərbaycan Dili Günü münasibətilə xalqımızı ürəkdən təbrik edir, ana dilimizin daim uca tutulmasını, zənginliyinin qorunmasını və gələcək nəsillərə saf şəkildə ötürülməsini arzulayıram.

Ömər Hüseynli
Ana Vətən Partiyasının sədr müavini