Arzudan reallığa: Ulu Öndərin görmək istədiyi Azərbaycan

Bu gün Azərbaycan dünyanın siyasi xəritəsində öz milli maraqlarını qətiyyətlə müdafiə edən, müstəqil siyasət yürüdən, ərazi bütövlüyünü və suverenliyini tam təmin etmiş güclü dövlət kimi tanınır. Ölkəmizin əldə etdiyi uğurlar, qazandığı tarixi zəfərlər və beynəlxalq nüfuzu uzun illər ərzində həyata keçirilən məqsədyönlü dövlətçilik siyasətinin nəticəsidir. Bu uğurların təməlində isə Ümummilli Lider Heydər Əliyevin müəyyən etdiyi inkişaf strategiyası, onun gələcəyə hesablanmış baxışları və güclü Azərbaycan ideyası dayanır.
Ulu Öndər Heydər Əliyev Azərbaycanın gələcəyini yalnız öz dövrünün reallıqları çərçivəsində deyil, uzunmüddətli perspektivdə qiymətləndirən uzaqgörən dövlət xadimi idi. O, yaxşı bilirdi ki, dövlətin qüdrəti təkcə siyasi müstəqilliklə deyil, həm də güclü iqtisadiyyat, milli birlik, sabitlik, beynəlxalq nüfuz və etibarlı müdafiə potensialı ilə ölçülür. Buna görə də Ulu Öndər müstəqil Azərbaycanın möhkəm təməllər üzərində qurulması üçün bütün sahələri əhatə edən inkişaf strategiyası formalaşdırdı və ölkəmizin gələcək uğurlarının əsasını qoydu.
Ümumilli Lider Heydər Əliyevin ən böyük arzusu güclü, azad, müstəqil və ərazi bütövlüyü tam təmin olunmuş Azərbaycan görmək idi. O, hər zaman xalqının rifahını, dövlətinin qüdrətini və müstəqilliyinin əbədiliyini düşünürdü. Məhz buna görə də ölkədə siyasi sabitliyin möhkəmləndirilməsi, iqtisadi inkişafın təmin olunması, hüquqi dövlət quruculuğu, milli həmrəyliyin gücləndirilməsi və müasir ordunun formalaşdırılması istiqamətində mühüm addımlar atdı. Onun müəyyən etdiyi inkişaf kursu Azərbaycanın gələcəyinə hesablanmış strateji yol xəritəsi idi.
Bu gün Azərbaycanın əldə etdiyi nailiyyətlərə nəzər saldıqda Ulu Öndərin uzaqgörən siyasətinin nə qədər düzgün və məqsədyönlü olduğu aydın görünür. Azərbaycan regionun aparıcı dövlətinə çevrilmiş, beynəlxalq münasibətlər sistemində etibarlı tərəfdaş kimi tanınmış, qlobal enerji və nəqliyyat layihələrinin təşəbbüskarı olmuşdur. Ölkəmizin iqtisadi gücü, həyata keçirilən genişmiqyaslı sosial layihələr və vətəndaş rifahının yüksəldilməsi müasir Azərbaycan dövlətinin uğurlu inkişaf modelini formalaşdırmışdır.
Müasir Azərbaycanın ən böyük nailiyyətlərindən biri isə dövlətimizin ərazi bütövlüyünün və suverenliyinin tam təmin olunmasıdır. Uzun illər ərzində xalqımızın qarşısında duran ən mühüm milli məqsəd öz həllini tapmış, tarixi ədalət bərpa olunmuşdur. Azərbaycanın bütün ərazisində dövlət suverenliyinin təmin edilməsi xalqımızın iradəsinin, dövlətimizin gücünün və illər boyu həyata keçirilən məqsədyönlü siyasətin nəticəsidir. Bu mühüm tarixi nailiyyət eyni zamanda Ulu Öndərin dövlətçilik ideyalarının təntənəsi kimi qiymətləndirilir.
Prezident İlham Əliyev bu barədə demişdir: “Danılmaz həqiqətdir ki, Azərbaycanın müasir və müstəqil dövlət kimi mövcudluğu, inkişafı XX əsrdə ikinci dəfə qazandığımız müstəqilliyin ilk illərinə təsadüf edən Milli Qurtuluş Günü ilə əlaqədardır. Qurtuluş Günü Azərbaycan tarixində dönüş nöqtəsi idi”.
Bu fikir bir daha təsdiq edir ki, müasir Azərbaycanın uğurlarının təməlində Milli Qurtuluşdan sonra müəyyənləşdirilmiş inkişaf strategiyası dayanır. Dövlətçiliyimizin möhkəmləndirilməsi, iqtisadi potensialın artırılması, beynəlxalq əlaqələrin genişləndirilməsi və milli maraqlara əsaslanan siyasətin həyata keçirilməsi nəticəsində Azərbaycan dünyanın nüfuzlu dövlətləri sırasında öz layiqli yerini tutmuşdur.
Bu gün Azərbaycan xalqı haqlı olaraq qürur hissi keçirir. Çünki müasir Azərbaycan Ulu Öndər Heydər Əliyevin görmək istədiyi Azərbaycandır – müstəqil, güclü, qalib, ərazi bütövlüyü və suverenliyi tam təmin olunmuş Azərbaycan. Bu reallıq Heydər Əliyevin həyatını həsr etdiyi dövlətçilik ideyalarının, onun uzaqgörən siyasətinin və xalqına olan sonsuz sevgisinin ən parlaq təcəssümüdür.
15 İyun – Milli Qurtuluş Günü təkcə dövlətçiliyimizin xilası deyil, həm də bugünkü güclü Azərbaycanın təməlinin qoyulduğu tarixi gündür. Azərbaycanın keçdiyi inkişaf yolu göstərir ki, Ulu Öndərin ən böyük arzusu artıq reallığa çevrilmiş, onun müəyyən etdiyi strateji kurs ölkəmizi yeni uğurlara və daha böyük zirvələrə aparmaqdadır.

Səidə Əliyeva,
Salyan rayon Mərkəzləşdirilmiş Kitabxana Sisteminin direktoru, YAP fəalı