Bakı Enerji Həftəsi: Azərbaycanın enerji strategiyasının uğurları və gələcəyə baxış

Qlobal iqtisadiyyatın dayanıqlı inkişafı və dövlətlərin milli təhlükəsizliyi məsələləri müzakirə edilərkən enerji amili hər zaman əsas prioritetlər sırasında yer alır. Müasir dünyada enerji resurslarına çıxış, enerji təchizatının etibarlılığı və enerji bazarlarında sabitliyin qorunması beynəlxalq əməkdaşlığın mühüm istiqamətlərindən birinə çevrilib. Bu baxımdan enerji sahəsində müxtəlif ölkələri, beynəlxalq təşkilatları, investorları və aparıcı şirkətləri bir araya gətirən nüfuzlu platformalar xüsusi əhəmiyyət daşıyır. Belə platformalardan biri olan Bakı Enerji Həftəsi artıq uzun illərdir ki, qlobal enerji gündəliyinin formalaşmasına töhfə verən mötəbər tədbir kimi tanınır.
2026-cı il iyunun 1-də Bakı Enerji Həftəsinin rəsmi açılış mərasimində çıxış edən Prezident İlham Əliyev Azərbaycanın enerji siyasəti, ölkəmizin beynəlxalq enerji təhlükəsizliyində oynadığı rol və gələcək perspektivlərlə bağlı mühüm mesajlar səsləndirdi. Dövlətimizin başçısı qeyd etdi ki, “Bakı Enerji Həftəsi” qlobal enerji səhnəsində həqiqətən aparıcı tədbirlərdən biridir. Bu fikir təsadüfi deyil. Uzun illər ərzində Bakı Enerji Həftəsi dünyanın müxtəlif ölkələrindən dövlət nümayəndələrini, enerji şirkətlərinin rəhbərlərini, investorları və ekspertləri bir araya gətirərək enerji sektorunda aktual məsələlərin müzakirə olunduğu mühüm beynəlxalq platformaya çevrilib.
Bu gün Azərbaycanın enerji sahəsində qazandığı uğurların əsasında uzaqgörən və məqsədyönlü siyasət dayanır. Prezident İlham Əliyev çıxışında vurğuladı ki, Azərbaycanın enerji inkişafının yeni mərhələsi 1994-cü ildə başlanıb. Həmin il Ümummilli Lider Heydər Əliyevin təşəbbüsü ilə imzalanmış və tarixə “Əsrin müqaviləsi” kimi daxil olmuş neft sazişi ölkəmizin müstəqillik tarixində mühüm dönüş nöqtəsi oldu. Bu müqavilə Azərbaycanın zəngin karbohidrogen ehtiyatlarının dünya bazarlarına çıxarılmasına, ölkəyə xarici investisiyaların cəlb edilməsinə və enerji sektorunun sürətli inkişafına şərait yaratdı.
1994-cü ildən etibarən həyata keçirilən enerji strategiyası Azərbaycanın iqtisadi yüksəlişinin əsas hərəkətverici qüvvəsinə çevrildi. Neft və qaz layihələrinin uğurla reallaşdırılması nəticəsində ölkəmiz regionun enerji mərkəzi statusunu qazandı, beynəlxalq enerji bazarlarında etibarlı tərəfdaş kimi tanındı və geniş əməkdaşlıq şəbəkəsi formalaşdırdı. Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Cənub Qaz Dəhlizi kimi nəhəng layihələr Azərbaycanın enerji potensialını qlobal miqyasda nümayiş etdirdi.
Prezident İlham Əliyevin çıxışında xüsusi yer alan məsələlərdən biri də enerji təhlükəsizliyi oldu. Son illərdə dünyada baş verən geosiyasi proseslər enerji təhlükəsizliyinin dövlətlər üçün nə qədər vacib olduğunu bir daha göstərib. Enerji təchizatında yaranan hər hansı problem yalnız iqtisadiyyata deyil, həm də sosial sabitliyə, sənaye istehsalına və beynəlxalq münasibətlərə təsir göstərir. Məhz buna görə də enerji təhlükəsizliyi bu gün beynəlxalq təhlükəsizlik anlayışının ayrılmaz tərkib hissəsinə çevrilib.
Azərbaycan isə enerji təhlükəsizliyinə töhfə verən ölkələr sırasında xüsusi yer tutur. Dövlətimizin başçısının qeyd etdiyi kimi, ölkəmiz uzun illərdir ki, öz tərəfdaşları qarşısında götürdüyü bütün öhdəlikləri uğurla yerinə yetirir və etibarlı enerji təchizatçısı kimi tanınır. Bu gün Azərbaycan qazı geniş coğrafiyanı əhatə edən ölkələrə nəql olunur və milyonlarla insanın enerji təminatında mühüm rol oynayır. Azərbaycanın həyata keçirdiyi layihələr təkcə iqtisadi deyil, həm də strateji əhəmiyyət daşıyır.
Prezident İlham Əliyev çıxışında Azərbaycanın enerji sahəsində gələcək imkanlarına da toxunaraq vurğuladı ki, mövcud qaz ehtiyatlarımız ən azı növbəti yüz il ərzində həm ölkəmizin, həm də tərəfdaşlarımızın tələbatını ödəməyə kifayət edəcəkdir. Bu fikir Azərbaycanın uzunmüddətli enerji strategiyasının nə qədər möhkəm əsaslara söykəndiyini göstərir. Ölkəmizin təsdiq edilmiş qaz ehtiyatları gələcək onilliklər ərzində həm daxili tələbatın qarşılanmasına, həm də ixrac imkanlarının qorunub saxlanılmasına geniş şərait yaradır.
Mövcud ehtiyatların zənginliyi Azərbaycanın beynəlxalq enerji bazarındakı rolunun gələcəkdə də davam edəcəyini göstərir. Eyni zamanda, ölkəmiz yalnız ənənəvi enerji resurslarına arxalanmır. Son illərdə bərpaolunan enerji sahəsində həyata keçirilən layihələr, xarici investorlarla əməkdaşlıq və yaşıl enerji zonalarının yaradılması Azərbaycanın enerji sektorunun daha da şaxələndirilməsinə xidmət edir. Bu yanaşma ölkəmizin həm ənənəvi, həm də alternativ enerji sahələrində etibarlı tərəfdaş statusunu gücləndirir.
Bakı Enerji Həftəsində səsləndirilən fikirlər bir daha göstərir ki, Azərbaycan enerji siyasətini qısa müddətli maraqlar üzərində deyil, uzunmüddətli strateji hədəflər əsasında qurur. 1994-cü ildə təməli qoyulan uğurlu enerji strategiyası bu gün ölkəmizin iqtisadi qüdrətinin, beynəlxalq nüfuzunun və regional liderliyinin əsas dayaqlarından birinə çevrilib. Enerji təhlükəsizliyinə verdiyi töhfələr, zəngin qaz ehtiyatları və etibarlı tərəfdaşlıq prinsipləri sayəsində Azərbaycan gələcək dövrdə də qlobal enerji məkanında mühüm mövqeyini qoruyub saxlayacaq.

Emin Ağayev,
Salyan Rayon İcra hakimiyyətinin Ərazi- təşkilat və ictimai-siyasi məsələlər şöbəsinin ictimai- siyasi və humanitar məsələlər sektorunun baş məsləhətçisi, 
YAP fəalı