Azərbaycan gələcəyin enerji arxitekturasında öz yerini indidən müəyyənləşdirir.

İyunun 1-də Bakı Ekspo Mərkəzində Bakı Enerji Həftəsi çərçivəsində 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un rəsmi açılış mərasimi keçirilib və Azərbaycan Respublikasının Prezidenti cənab İlham Əliyev mərasimdə iştirak edib. Cənab Prezident İlham Əliyevin Bakı Enerji Həftəsi çərçivəsində səsləndirdiyi fikirlər Azərbaycanın qlobal enerji təhlükəsizliyinin təminində artan rolunu və bu istiqamətdə həyata keçirilən ardıcıl, məqsədyönlü dövlət siyasətini bir daha təsdiq edir. Bu çıxış həm ölkənin enerji diplomatiyasının əsas prioritetlərini, həm də Azərbaycanın beynəlxalq enerji sistemində etibarlı və məsuliyyətli tərəfdaş kimi mövqeyinin daha da gücləndiyini nümayiş etdirir. 
Dünyada geosiyasi münasibətlərin mürəkkəbləşdiyi, enerji təhlükəsizliyinin dövlətlərin milli təhlükəsizlik konsepsiyasının ayrılmaz hissəsinə çevrildiyi bir dövrdə enerji resurslarına malik olmaq artıq təkbaşına üstünlük hesab edilmir. Əsas məsələ həmin resurslardan necə istifadə etmək, onları milli inkişafın, regional əməkdaşlığın və beynəlxalq nüfuzun mühüm alətinə çevirməkdir. Məhz bu baxımdan Azərbaycan son otuz ildə keçdiyi inkişaf yolu ilə fərqli bir model formalaşdırıb. Bu model enerji ehtiyatlarının sadəcə iqtisadi gəlir mənbəyi deyil, dövlətin siyasi çəkisinin, diplomatik imkanlarının və strateji mövqeyinin gücləndirilməsi vasitəsi olduğunu nümayiş etdirir. Müasir dünyada enerji təhlükəsizliyi dövlətlərin inkişaf strategiyalarının əsas istiqamətlərindən birinə çevrilib. Bu reallıq fonunda Azərbaycan məqsədyönlü enerji siyasəti ilə qlobal sistemdə etibarlı və strateji tərəfdaş kimi mövqeyini daha da möhkəmləndirir. Ölkəmiz uzun illərdir ki, enerji ehtiyatlarının səmərəli idarə olunması, ixrac marşrutlarının şaxələndirilməsi və beynəlxalq əməkdaşlığın genişləndirilməsi istiqamətində ardıcıl addımlar atır. Ölkədə həyata keçirilən enerji strategiyası ənənəvi enerji resurslarının səmərəli istifadəsi ilə yanaşı, bərpa olunan enerji mənbələrinin inkişafını da prioritet istiqamət kimi müəyyənləşdirir. Bu yanaşma Azərbaycanın uzunmüddətli enerji təhlükəsizliyi məqsədlərinə xidmət etməklə yanaşı, qlobal iqlim dəyişiklikləri ilə mübarizəyə də mühüm töhfə verir.
Bakı Enerji Həftəsinin qlobal enerji səhnəsində aparıcı tədbirlərdən birinə çevrilməsi ölkəmizin enerji sektorunda qurulmuş etibarlı əməkdaşlıq modeli və yeni enerji təşəbbüslərinin uğurla həyata keçirilməsinin nəticəsidir. Qlobal miqyasda enerji bazarlarında müşahidə olunan dəyişikliklər, iqlim gündəliyi ətrafında gedən müzakirələr və beynəlxalq nəqliyyat marşrutlarının yenidən formalaşması fonunda Azərbaycanın enerji sektorunda rolu getdikcə daha da artır.
 Bakı Enerji Həftəsi çərçivəsində keçirilən tədbirlərin açılış mərasimində cənab Prezident İlham Əliyevin səsləndirdiyi fikirlər ölkənin gələcək inkişaf strategiyasının əsas istiqamətlərini aydın şəkildə ortaya qoydu. Dövlət başçısının vurğuladığı kimi, müasir dünyada enerji siyasətinə yalnız ideoloji və ya emosional yanaşma ilə deyil, ilk növbədə realizm və praqmatizm prizmasından baxmaq lazımdır. Son illərin təcrübəsi göstərir ki, dünya iqtisadiyyatının dayanıqlı fəaliyyəti üçün enerji təhlükəsizliyi hələ də əsas prioritetlərdən biridir. Bərpaolunan enerji mənbələrinin inkişafı mühüm əhəmiyyət daşısa da, mövcud şəraitdə qazıntı yanacaqları qlobal enerji balansının ayrılmaz hissəsi olaraq qalır. Cənab Prezident İlham Əliyevin çıxışında səsləndirilən fikirlərdən aydın görünür ki, Azərbaycan gələcəyin enerji arxitekturasında öz yerini indidən müəyyənləşdirir. Bu siyasətin əsas məqsədi yalnız mövcud enerji ehtiyatlarının ixracı deyil, həm də yeni texnologiyalara, yaşıl iqtisadiyyata və regional inteqrasiyaya əsaslanan inkişaf modelinin qurulmasıdır. Bu gün Bakı Enerji Həftəsi çərçivəsində müzakirə olunan məsələlər əslində Azərbaycanın gələcək onilliklər üçün müəyyən etdiyi strateji xəttin mühüm istiqamətlərini əks etdirir. Enerji təhlükəsizliyi, yaşıl transformasiya, nəqliyyat əlaqələrinin genişləndirilməsi və beynəlxalq əməkdaşlığın dərinləşdirilməsi bu siyasətin əsas sütunları kimi çıxış edir. Azərbaycanın son otuz ildə qazandığı uğurlar göstərir ki, uzaqgörən liderlik, milli maraqlara söykənən siyasət və strateji planlaşdırma istənilən təbii sərvəti inkişaf amilinə çevirə bilir.Bu gün ölkəmiz yalnız enerji ixrac edən dövlət deyil, həm də regionun iqtisadi, siyasi və nəqliyyat mərkəzlərindən biri kimi çıxış edir. 
Bakı Enerji Həftəsində səslənən mesajlar isə bir həqiqəti bir daha təsdiqlədi: Azərbaycan enerji resurslarını sadəcə bugünkü ehtiyaclar üçün deyil, gələcək nəsillərin rifahı, regional sabitlik və qlobal əməkdaşlıq naminə dəyərləndirən dövlət kimi öz mövqeyini getdikcə daha da möhkəmləndirir. Bu mövqe isə ölkənin qarşıdakı illərdə də beynəlxalq enerji gündəliyinin əsas iştirakçılarından biri olacağını göstərir. Bakı Enerji Həftəsi Azərbaycanın enerji təhlükəsizliyi, beynəlxalq əməkdaşlıq və dayanıqlı inkişaf istiqamətlərində formalaşdırdığı strateji xəttin ardıcıl şəkildə davam etdirildiyini bir daha nümayiş etdirir. Bu yanaşma ölkənin qlobal enerji təhlükəsizliyində uzunmüddətli və etibarlı tərəfdaş kimi mövqeyini daha da möhkəmləndirir və enerji sektorunun gələcək inkişaf prioritetlərinin müəyyənləşdirilməsində mühüm rol oynayır. 
Bu gün ölkənin təşəbbüsü və iştirakı ilə həyata keçirilən enerji layihələri Avrasiya məkanının enerji təhlükəsizliyinin əsas dayaqlarından hesab olunur. Bakı-Tbilisi-Ceyhan neft kəməri, Bakı-Supsa marşrutu, Cənubi Qafqaz Boru Kəməri, TANAP və TAP layihələri artıq təkcə iqtisadi layihələr deyil, eyni zamanda regional sabitlik və əməkdaşlığın mühüm platformalarıdır. Bu layihələr vasitəsilə Azərbaycan Xəzər hövzəsini dünya bazarları ilə birləşdirən əsas enerji körpülərindən birinə çevrilib.
Dövlət başçısının enerji sahəsində həyata keçirdiyi düşünülmüş siyasəti və uzaqgörən strategiyası Azərbaycanın etibarlı tərəfdaş kimi beynəlxalq nüfuzunu artırmaqla yanaşı,onu qlobal enerji siyasətinin əsas aktorlarından birinə çevirib.

Ruslan Əliyev,
Salyan Elektrik şəbəkəsinin rəisi