Uşaqlar dövlətimizin ən qiymətli sərvətidir” – Günay Ağamalı

“Ölkəmizdə uşaqların hüquqlarının qorunması, onların sağlam, təhlükəsiz və hərtərəfli inkişafı dövlət siyasətinin prioritet istiqamətlərindəndir”. Bunu İqtisadiyyat.az-a açıqlamasında Milli Məclisin deputatı Günay Ağamalı deyib.
Deputat vurğulayıb ki, Prezident İlham Əliyevin rəhbərliyi ilə həyata keçirilən sosial siyasətin əsas məqsədlərindən biri də uşaqların rifahının yüksəldilməsi, onların keyfiyyətli təhsil, səhiyyə və sosial xidmətlərlə təmin olunmasıdır.
O bildirib ki, ölkəmizdə uşaq hüquqlarının müdafiəsi sahəsində mühüm qanunvericilik və institusional addımlar atılmaqdadır: “Xüsusilə aztəminatlı ailələrin sosial müdafiəsinin gücləndirilməsi, xüsusi qayğıya ehtiyacı olan uşaqlara dəstəyin artırılması, yeni məktəbəqədər təhsil müəssisələrinin yaradılması və uşaqların sağlamlığının qorunmasına yönəlmiş proqramlar dövlət siyasətinin mühüm tərkib hissəsidir”.
G.Ağamalının sözlərinə görə, uşaqların hüquqlarının qorunması, onların sağlam, təhlükəsiz və xoşbəxt mühitdə böyüməsi dövlət siyasətinin ən mühüm istiqamətlərindəndir:
“Prezident İlham Əliyev və Birinci vitse-prezident Mehriban xanım Əliyeva uşaqların rifahı, təhsili, sağlamlığı və sosial müdafiəsi məsələlərini daim diqqət mərkəzində saxlayırlar. Məhz bu diqqət və qayğının nəticəsidir ki, ölkəmizdə uşaq hüquqlarının müdafiəsi sahəsində mühüm proqramlar həyata keçirilir, yeni təhsil və səhiyyə müəssisələri yaradılır, sosial müdafiə mexanizmləri daha da gücləndirilir. Hər bir uşağın təhlükəsiz mühitdə böyüməsi, keyfiyyətli təhsil alması, sağlamlığının qorunması və sosial müdafiə ilə əhatə olunması əsas prioritetlər sırasındadır. Eyni zamanda uşaqlara qarşı zorakılığın, istismarın və ayrı-seçkiliyin qarşısının alınması istiqamətində həyata keçirilən tədbirlər xüsusi əhəmiyyət daşıyır. Müasir dövrdə uşaqların rəqəmsal təhlükəsizliyi də mühüm məsələlərdəndir. İnformasiya texnologiyalarının sürətlə inkişaf etdiyi dövrdə uşaqların zərərli informasiyadan qorunması, onların internetdən təhlükəsiz istifadəsinin təmin olunması, sağlam mənəvi dəyərlər əsasında formalaşması dövlət siyasətində xüsusi yer tutur. Uşaqların hərtərəfli inkişafı və hüquqlarının qorunması ölkəmizin gələcəyə qoyduğu ən qiymətli sərmayədir”.
Deputat qeyd edib ki, dövlətimiz bu istiqamətdə siyasəti ardıcıl şəkildə davam etdirir: “Məqsəd gələcək nəsillər üçün daha əlverişli imkanların yaradılmasıdır. Məktəbəqədər təhsilin əhatə dairəsinin genişləndirilməsi, inklüziv təhsil imkanlarının artırılması, uşaqların sağlam inkişafına xidmət edən proqramların gücləndirilməsi, sosial xidmətlərin daha da təkmilləşdirilməsi və ailə institutunun möhkəmləndirilməsi istiqamətində işlər davam etdirilir. Eyni zamanda xüsusi qayğıya ehtiyacı olan uşaqların cəmiyyətə inteqrasiyası, onların təhsil və məşğulluq imkanlarının genişləndirilməsi, regionlarda uşaq xidmətlərinin əlçatanlığının daha da artırılması qarşıdakı dövr üçün mühüm hədəflərdəndir. Bu əlamətdar gün münasibətilə bütün uşaqları səmimi qəlbdən təbrik edir, sağlam, xoşbəxt və qayğısız həyat diləyirəm. Hər bir uşağın gülüşü, sevinci və uğuru dövlətimizin və cəmiyyətimizin uğurudur. Əminəm ki, Azərbaycan uşaqları sağlam, vətənpərvər, savadlı və məsuliyyətli vətəndaşlar kimi formalaşaraq ölkəmizin gələcək inkişafına mühüm töhfələr verəcəklər”.