28 May: Milli İradənin və Müstəqil Dövlətçilik Əzminin Təntənəsi

28 May  Müstəqillik Günü Azərbaycan xalqının tarixində  dövlətin yaranması deyil, milli iradənin, azadlıq düşüncəsinin və dövlətçilik əzminin təntənəsidir. 1918-ci il mayın 28-də yaradılan Azərbaycan Xalq Cümhuriyyəti bütün Şərq və müsəlman aləmi üçün yeni siyasi mərhələnin başlanğıcı oldu. Azərbaycan xalqı həmin gün Şərqdə ilk demokratik, hüquqi və dünyəvi espublika quraraq tarix yazdı.

Azərbaycan Xalq Cümhuriyyətinin yaranması xalqımızın əsrlərlə yaşatdığı dövlətçilik ənənələrinin, milli oyanışının və azadlıq diləklərinin məntiqi nəticəsi idi. İstiqlal Bəyannaməsinin qəbul olunması ilə Azərbaycan öz müstəqilliyini dünyaya bəyan etdi və sübut etdi ki, bu xalq öz taleyini özü müəyyən etməyə qadirdir.

Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti çox böyük və tarixi əhəmiyyət daşıyan işlər gördü. İlk parlament yaradıldı, dövlət atributları təsis edildi, milli ordu formalaşdırıldı,  qadınlara seçki hüququ verildi, təhsil və ədliyyə sahəsində mühüm islahatlar həyata keçirildi. Bakı Dövlət Universitetinin yaradılması milli maarifçilik tariximizin ən mühüm hadisələrindən biri oldu. Bütün bunlar göstərirdi ki, Azərbaycan xalqı demokratik dövlət quruculuğuna hazır olan siyasi və intellektual potensiala malik xalqdır. Azərbaycan Xalq Cümhuriyyətinin fəaliyyəti xalqımızın milli kimlik şüurunun formalaşmasına, milli mənlik hissinin güclənməsinə mühüm təsir göstərdi. Həmin dövrdə qəbul edilən qərarlar və həyata keçirilən islahatlar bu gün də müasir Azərbaycan dövlətçiliyinin ideoloji əsaslarını təşkil edir.

Ulu Öndər Heydər Əliyevin dediyi kimi, “Müstəqilliyi qorumaq, saxlamaq onu əldə etməkdən daha çətindir.” XX əsrin sonlarında Azərbaycan yenidən müstəqillik qazandıqdan sonra məhz Ulu Öndər Heydər Əliyevin siyasi uzaqgörənliyi, qətiyyəti və fədakarlığı sayəsində dövlətçiliyimiz qorundu, ölkədə sabitlik təmin edildi və müstəqil Azərbaycanın inkişafının möhkəm təməli yaradıldı. Ulu Öndərin 1990-cı ildə Naxçıvanda üçrəngli bayrağımızı rəsmi dövlət bayrağı kimi qaldırması xalqımızın müstəqillik ruhunun yenidən dirçəldilməsinin rəmzinə çevrildi.

Bu gün Ulu Öndər Heydər Əliyevin əsasını qoyduğu siyasi kurs Möhtərəm Cənab Prezident İlham Əliyev tərəfindən uğurla davam etdirilir, Azərbaycan Xalq Cümhuriyyətinin azadlıq, dövlətçilik və müstəqillik idealları qətiyyətlə yaşadılır. Azərbaycanın ərazi bütövlüyünün və suverenliyinin tam bərpası, üçrəngli bayrağımızın işğaldan azad olunmuş torpaqlarımızda dalğalanması müstəqil dövlətçilik tariximizin ən böyük qürur səhifələrindəndir. Qarabağ və Şərqi Zəngəzurda dalğalanan bayrağımız Azərbaycan Xalq Cümhuriyyətinin qurucularının, Ümummilli Lider Heydər Əliyevin ruhuna verilən ən böyük ehtiramdır.

Müstəqil Azərbaycan regionun ən güclü dövlətlərindəndir. Dövlətimizin həyata keçirdiyi siyasi, iqtisadi və sosial islahatlar, beynəlxalq nüfuzumuzun artması, milli maraqlarımızın qətiyyətlə qorunması Azərbaycan dövlətçiliyinin etibarlı əllərdə olduğunun təcəssümüdür.

28 May Müstəqillik Günü münasibətilə xalqımızı ürəkdən təbrik edir, dövlətimizin daim güclü, müstəqil və qalib olmasını diləyirəm. 

Yaşasın müstəqil və qüdrətli dövlətimiz!

Günay Ağamalı

Milli Məclisin deputatı,
Ana Vətən Partiyasının sədri.

28 May 2026-cı il.