Milli Məclisin deputatı Günay Ağamalı hesab edir ki, Azərbaycanın şəhərsalma modelini, quruculuq fəlsəfəsini və insan mərkəzli inkişaf yanaşmasını dünya diqqətlə izləyir.

"Prezident Administrasiyasının rəhbəri Samir Nuriyevin mayın 10-da AZƏRTAC-da dərc olunmuş məqaləsində vurğulandığı kimi, Ulu Öndər Heydər Əliyevin şəhərsalma siyasəti dövlət quruculuğunun mühüm istiqaməti, milli inkişafın strateji xətti idi.

1969-1982-ci illərdə Azərbaycan Sovet İttifaqının ən geridə qalmış respublikalarından birindən ən sürətlə inkişaf edən məkanlardan birinə çevrildi. Bakının siması dəyişdi, yeni yaşayış massivləri salındı, metronun inkişafı sürətləndirildi, sənaye şəhərcikləri yaradıldı, bölgələrdə iri infrastruktur layihələri həyata keçirildi. Həmin dövrdə tikilən məktəblər, xəstəxanalar, mədəniyyət ocaqları, yollar və yaşayış kompleksləri bu gün də xidmət göstərir. Bütün bunlar uzaqgörən planlaşdırmanın nəticəsi idi. Ulu Öndər Heydər Əliyevin şəhərsalma siyasəti şəhərlərin müasir, funksional və milli ruhu qoruyan məkanlara çevrilməsinə xidmət edirdi.

1982-1987-ci illərdə Ümummilli Lider Heydər Əliyevin SSRİ rəhbərliyində təmsil olunması Azərbaycanın inkişafına imkanlar açdı. O dövrdə Bakı və regionlarla bağlı strateji layihələrə xüsusi diqqət ayrıldı. Azərbaycanın gələcək inkişaf potensialı məhz həmin illərdə formalaşdırılan iqtisadi və urbanistik baza üzərində quruldu.

1993-2003-cü illər müstəqil Azərbaycanın xilası və yenidən qurulması mərhələsi idi. Xaosdan çıxmış, dağılmaq təhlükəsi yaşamış ölkəmizdə dövlət infrastrukturu yenidən formalaşdırıldı. Şəhərsalma siyasəti təhlükəsizlik, sosial rifah və milli dövlətçilik konsepsiyası ilə paralel aparıldı. Ulu Öndər Heydər Əliyev hakimiyyətə gəldikdən sonra Bakı və Azərbaycanın bütün bölgələri yenidən nəfəs almağa başladı, abadlıq və quruculuq işləri genişləndi, Azərbaycanın gələcək inkişaf strategiyasının təməli qoyuldu.

Ulu Öndər Heydər Əliyevin siyasi kursu möhtərəm cənab Prezident İlham Əliyev tərəfindən yeni mərhələyə yüksəlib. Son 20 ildən artıq müddətdə Azərbaycan yeni yüksəkliklərə ucalıb. Azərbaycan son illərdə böyük tərəqqi yolu keçib. Bir zamanlar sovet şəhəri təsiri bağışlayan Bakı bu gün dünyanın ən müasir və estetik paytaxtlarından birinə çevrilib. Heydər Əliyev Mərkəzi, Bakı Bulvarının genişləndirilməsi, Ağ Şəhər layihəsi, Zəfər Parkı, beynəlxalq hava limanları, yeni metro stansiyaları, körpülər, tunellər, yol infrastrukturu, sosial obyektlər ölkəmizin inkişafının nəticəsidir".

Onun sözlərinə görə, sözügedən prosesdə möhtərəm cənab Prezident İlham Əliyevin və Birinci vitse-prezident Mehriban xanım Əliyevanın fəaliyyəti xüsusi qeyd olunmalıdır. Həyata keçirilən mədəni irsin qorunması layihələri, tarixi abidələrin bərpası, sosial və humanitar məzmunlu urbanistik yanaşmalar Azərbaycanın müasir şəhərsalma modelini daha zəngin edib.

"Regionlarda həyata keçirilən quruculuq siyasəti ölkənin balanslı inkişaf modelini ortaya qoyur. Ölkəmizin bütün rayonlarında yeni məktəb, xəstəxana, Olimpiya kompleksi, park, yol, sosial infrastruktur layihələri həyata keçirilir, Azərbaycanın bölgələri inkişafın edir.

Qarabağ və Şərqi Zəngəzurda aparılan quruculuq işləri dünya miqyasında nümunə kimi təqdim olunur. “Ağıllı kənd”, "Ağıllı şəhər" layihələri, Füzuli, Zəngilan və Laçında hava limanları, Laçın, Şuşa, Ağdam və bütövlükdə Qarabağ və Şərqi Zəngəzurda həyata keçirilən genişmiqyaslı bərpa layihələri, “yaşıl enerji” konsepsiyası, müasir şəhərsalma Azərbaycanın gələcəyin şəhərlərini qurduğunun təzahürüdür.

WUF13-ün Azərbaycanda keçirilməsi adıçəkilən reallıqların beynəlxalq təsdiqidir. Forumun Bakıda keçirilməsi Möhtərəm Cənab Prezident İlham Əliyevin quruculuq siyasətinin, strateji baxışının təntənəsidir. Ölkəmiz enerji və geosiyasi gücü, modern şəhərsalma modeli, insan mərkəzli inkişaf konsepsiyası və estetik urbanizasiya nümunəsi ilə seçilir", - deputat qeyd edib.