İmzalanan sənədlər Azərbaycan-Latviya əlaqələrinin gələcək inkişafının aydın mənzərəsini yaradır.

Xarici siyasətimizin  prioritet istiqamətlərindən biri  müxtəlif dövlətlərlə  ikitərəfli əlaqələrimiz  uğurla inkişaf etməsidir.  Azərbaycan ikitərəfli əməkdaşlıqda Baltikyanı ölkələrlə əlaqələrə də xüsusi önəm verir. Bu dövlətlərlə əlaqələr müasir dövrdə yeni məzmun kəsb edərək xüsusilə mədəniyyət, parlamentlərarası dialoq və iqtisadi sahələrdə genişlənir.  Bakıda keçirilən yüksək səviyyəli görüşlər və biznes-forum bir daha göstərdi ki, Azərbaycan–Latviya münasibətlərinin inkişafı üçün yaxşı perspektivlər mövcuddur. Prezident İlham Əliyev və Latviya dövlət başçısı Edqars Rinkeviç tərəfindən səsləndirilən fikirlər bu əməkdaşlığın gələcək istiqamətlərini aydın şəkildə ortaya qoydu.
Azərbaycanın Avropa ilə münasibətləri  strateji tərəfdaşlıq, enerji təhlükəsizliyi və qarşılıqlı iqtisadi maraqlar üzərində qurulmuş dinamik bir modeldir. Rəsmi Bakı Avropa İttifaqı  və ona üzv ölkələrlə əlaqələrini Avrasiyanın logistik xəritəsini formalaşdıran mühüm geosiyasi aktor statusunda inkişaf etdirir. Prezident İlham Əliyev Azərbaycan-Latviya biznes-forumunda çıxışı zamanı qeyd etdi ki, bu gün Avropa İttifaqının 10 üzvü Azərbaycandan təbii qaz alır. Ölkələrin ümumi sayı 16-dır və bu göstərici üzrə biz dünyada birinci yerdəyik. Əməkdaşlığın coğrafiyasının genişləndirilməsində maraqlı olan Azərbaycanın iştirakçısı və təşəbbüsçüsü olduğu enerji layihələri ölkələri, xalqları birləşdirir. Bu layihələr Azərbaycanı regional inkişafın aparıcı qüvvəsinə, dünyanın enerji təhlükəsizliyinin təminatçısına çevirib. Ölkəmiz Avropa İttifaqının əksər üzv dövlətləri ilə strateji tərəfdaşlıq haqqında sənədlər imzalayıb. Bu münasibətlər suverenlik, ərazi bütövlüyü və beynəlxalq hüququn prinsiplərinə qarşılıqlı hörmət əsasında qurularaq, regionda sabitliyin qorunmasına xidmət edir.
Azərbaycan və Latviya Prezidentlərinin təkbətək və geniş tərkibdə görüşləri, mətbuata birgə bəyanatları, həmçinin  əlaqələrin inkişafında hüquqi baza rolunu oynayan sənədlərin imzalanması  bütün bu məqamlara bir daha işıq saldı.  Qeyd etdiyimiz kimi, dövlətlərarası əlaqələrin inkişafında imzalanan sənədlər əhəmiyyətli rol oynayır.  Azərbaycan ilə Latviya arasında bugünədək 50-yə yaxın sənəd imzalanıb.  Sözügedən səfər çərçivəsində  Prezident İlham Əliyevin və Latviya Respublikasının Prezidenti Edqars Rinkeviçsin iştirakı ilə Azərbaycanla Latviya arasında imzalanmış bir sıra sənədlərin  mübadiləsi mərasimi oldu. Prezident İlham Əliyev və Latviya Prezidenti Edqars Rinkeviçs “Azərbaycan Respublikası Prezidentinin və Latviya Respublikası Prezidentinin Birgə Bəyanatı”nı qəbul etdilər.
Kənd təsərrüfatı və meşəçilik sahəsində əməkdaşlıq da xüsusi əhəmiyyət kəsb edir. Latviyanın bu sahədəki zəngin təcrübəsi Azərbaycanın regionlarında həyata keçirilən inkişaf layihələri ilə uyğunlaşır. Xüsusilə işğaldan azad edilmiş ərazilərdə aparılan bərpa və yenidənqurma işləri çərçivəsində bu əməkdaşlıq real iqtisadi nəticələr verə bilər.
Bundan əlavə, müdafiə sənayesi və yüksək texnologiyalar sahəsində əməkdaşlıq perspektivləri də diqqət çəkir. Hər iki ölkənin bu sahədə artan potensialı birgə istehsal və texnoloji mübadilə üçün zəmin yaradır. Süni intellekt, dron texnologiyaları və innovativ həllər yaxın gələcəkdə əməkdaşlığın yeni istiqamətlərini əhatə edəcək.
Bütün bunların fonunda qarşılıqlı investisiyaların təşviqi əsas prioritet olaraq qalır. Azərbaycanın yaratdığı sabit maliyyə mühiti və Latviyanın Avropa bazarlarına inteqrasiyası bu prosesin daha da sürətlənməsinə imkan yaradır. Eyni zamanda, tərəflərin qarşılıqlı investisiya layihələri üzərində işləməsi münasibətlərin davamlılığını təmin edəcək əsas amillərdən biridir.
 Bu səfər iki ölkə arasında münasibətlərin yüksək səviyyədə olduğunu bir daha təsdiqləyir. İkitərəfli əməkdaşlıq üçün də geniş potensial mövcuddur. Bu əməkdaşlıq ticarət, siyasət və təhsil sahələrini əhatə edir. Hazırda Latviyada yüzlərlə azərbaycanlı tələbə təhsil alır və bu da humanitar əlaqələrin inkişafına töhfə verir. 
Latviya Prezidenti Edqars Rinkeviçsin Azərbaycana səfəri əməkdaşlığın genişlənəcəyini nümayiş etdirir. Prezident İlham Əliyevin bəyanatı isə bir gerçəkliyi təsdiqləyir: Azərbaycan nüfuzlu dövlətdir və onun siyasi kursu bəşəri dəyərlərə sadiq ölkələr tərəfindən səmimiyyətlə dəstəklənir. 
Ümumilikdə hər bir səfər münasibətlərdə yeni səhifənin başlanğıcıdır. İmzalanan sənədlər Azərbaycan-Latviya əlaqələrinin gələcək inkişafının aydın mənzərəsini yaradır. Tərəflər əməkdaşlığın bütün sahələrdə uğurlu inkişafında maraqlıdır.

Ləman Abasova, 
Salyan Peşə liseyinin müəllimi