Azərbaycan qadını – tərəqqimizin aparıcı qüvvəsi və milli dəyərlərimizin əbədi dayağı

8 Mart – Beynəlxalq Qadınlar Günü Azərbaycan Respublikasında rəsmi bayram günü kimi qeyd olunur. Bu əlamətdar tarix qadınlara göstərilən hörmət və ehtiramın, onların cəmiyyətin inkişafındakı roluna verilən yüksək qiymətin təntənəsidir. 8 Mart yalnız təbrik və xoş sözlər günü deyil, həm də Azərbaycan qadınının tarixi xidmətlərinin, zəhmətinin və fədakarlığının bir daha xatırlandığı gündür.
Azərbaycan qadınının ölkənin tərəqqisində danılmaz payı vardır. Tarixin müxtəlif mərhələlərində xalqımız ağır sınaqlarla üzləşərkən qadınlar həm ailənin, həm də cəmiyyətin mənəvi dayağı olmuşlar. Onlar milli kimliyimizin, dilimizin, mədəniyyətimizin qorunmasında mühüm rol oynamış, gələcək nəsillərin vətənpərvərlik ruhunda formalaşmasına töhfə vermişlər. Azərbaycan qadını hər zaman həm zəhmətkeşliyi, həm də müdrikliyi ilə seçilmişdir.
XX əsrin əvvəllərindən etibarən Azərbaycan qadınlarının maariflənməsi istiqamətində mühüm addımlar atılmış, qadınların təhsil alması üçün geniş imkanlar yaradılmışdır. Qadınlara seçki hüququnun verilməsi Azərbaycanın Şərqdə ilk ölkə kimi tarixə düşməsinə səbəb olmuşdur. Bu fakt qadınlara verilən dəyərin və onların ictimai-siyasi həyatda iştirakına yaradılan şəraitin bariz nümunəsidir.
Sürətlə maariflənən Azərbaycan qadını ötən yüzillik ərzində böyük inkişaf yolu keçmişdir. Bu gün qadınlarımız ali təhsil müəssisələrində uğurla təhsil alır, elmi-tədqiqat fəaliyyətində mühüm nailiyyətlər əldə edir, müxtəlif sahələrdə peşəkar mütəxəssis kimi formalaşırlar. Onların elm, təhsil, səhiyyə, mədəniyyət, sosial xidmət, sahibkarlıq və dövlət idarəçiliyi sahələrində əldə etdiyi uğurlar ölkəmizin ümumi inkişaf göstəricilərində öz əksini tapır.
Azərbaycan qadını ölkənin sosial-iqtisadi tərəqqisində fəal iştirak edir. Müasir dövrdə qadınların əmək bazarında aktivliyi artmış, onların rəhbər vəzifələrdə təmsilçiliyi genişlənmişdir. Qadınların iqtisadi fəallığı ailə rifahının yüksəlməsinə, sosial sabitliyin möhkəmlənməsinə və ümumi inkişaf prosesinin sürətlənməsinə müsbət təsir göstərir. Bu, eyni zamanda dövlət siyasətinin qadınların potensialından səmərəli istifadə olunmasına yönəldilməsinin nəticəsidir.
Lakin Azərbaycan qadınının gücü təkcə ictimai fəaliyyətlə ölçülmür. O, yüz illərdən bəri formalaşmış milli-mənəvi dəyərlərimizin daşıyıcısıdır. Qadın ana dilimizin saflığını qoruyan, milli mədəniyyətimizi yaşadan, adət-ənənələrimizi gələcək nəsillərə ötürən əsas qüvvədir. Ailə institutunun möhkəmliyi məhz qadının müdrikliyi, səbr və qayğıkeşliyi ilə bağlıdır. Azərbaycan ailəsinin dayağı olan qadın eyni zamanda cəmiyyətin mənəvi sağlamlığının təminatçısıdır.
Müasir Azərbaycan qadını sürətlə dəyişən və qloballaşan dünyada öz mövqeyini möhkəmləndirərkən milli köklərinə sadiqliyini qoruyur. O, həm müasir biliklərə yiyələnir, həm də mənəvi irsə bağlı qalır. Bu vəhdət Azərbaycan qadınının gücünü və nüfuzunu daha da artırır. Onun həm ailədə, həm də cəmiyyətdə balanslı mövqeyi sosial harmoniyanın əsas amillərindən biridir.
Vətən müharibəsi dövründə Azərbaycan qadınının mənəvi gücü və iradəsi bir daha özünü göstərdi. Şəhid analarının qüruru, qazilərin həyat yoldaşlarının səbr və dəstəyi, tibb işçisi qadınların fədakarlığı xalqımızın birliyinin və mənəvi bütövlüyünün simvoluna çevrildi. Bu, Azərbaycan qadınının yalnız ailənin deyil, bütövlükdə millətin dayağı olduğunu bir daha sübut etdi.
Bu gün işğaldan azad olunmuş torpaqlarda aparılan genişmiqyaslı quruculuq işlərində də qadınlarımız fəal iştirak edirlər. Onlar təhsil, səhiyyə, sosial xidmət və digər sahələrdə öz bilik və bacarıqları ilə yenidən qurulan bölgələrin inkişafına töhfə verirlər. Azərbaycan qadını həm keçmişin yaddaşını yaşadır, həm də gələcəyin qurucusuna çevrilir.
8 Mart – Beynəlxalq Qadınlar Günü rəsmi bayram günü olmaqla yanaşı, həm də dərin məna daşıyan gündür. Bu tarix qadın əməyinə verilən dəyərin, onların zəhmətinin və fədakarlığının təntənəsidir. Bu gün hər bir qadının – ananın, müəllimin, həkimin, alim və ziyalının, dövlət qulluqçusunun, sahibkarın əməyinə ehtiram ifadə olunur.
Azərbaycan qadını daim tərəqqimizin aparıcı qüvvəsi, milli dəyərlərimizin isə ən möhkəm dayağı olaraq qalacaqdır. Onun zəhməti, əzmi və fədakarlığı ölkəmizin gələcəyinin daha parlaq olmasına xidmət edir.
Bu əlamətdar gün münasibətilə bütün qadınları səmimi qəlbdən təbrik edir, onlara möhkəm cansağlığı, ailə səadəti, firavanlıq və yeni-yeni uğurlar arzulayırıq. Azərbaycan qadınının nuru hər zaman ailələrimizi, cəmiyyətimizi və dövlətimizi işıqlandırsın. 

Sehranə Rzayeva, 
Salyan şəhər 2 saylı tam orta məktəbin tarix müəllimi, Əməkdar müəllim, YAP fəalı