Azərbaycan qadını: tarixdən gələn güc və dövlətçilik nümunəsi

Tariximizin və mədəniyyətimizin neçə-neçə şanlı, parlaq səhifəsi Azərbaycan qadınının adı ilə bağlıdır. O, yalnız evin, ailənin dayağı deyil, eyni zamanda xalqımızın mənəvi və intellektual həyatının mühüm sütunlarından biridir. Azərbaycan qadını dünyaya bəşəriyyətin mədəni fikir xəzinəsinin incilərini yaradan ədəbi şəxsiyyətlər, görkəmli elm və sənət adamları, tanınmış siyasi xadimlər bəxş etmişdir.
Xalqımızın təfəkküründə ana məfhumu doğma yurdun, Vətən torpağının təcəssümüdür. Ötən əsrdə qadın hüquqlarının qazanılması və qorunması yolunda misilsiz uğurlar əldə etmiş Azərbaycan qadını bu gün artıq ölkəmizin ictimai-siyasi, iqtisadi və mədəni həyatının fəal iştirakçısıdır. O, taleyüklü milli məsələlərin həllinə sanballı töhfələr verir. Dövlət quruculuğunda onun yüksək ehtirama layiq mövqeyi bu gün qeyd edilən bayramı müstəqillik ideyası ətrafında sıx birləşən xalqımızın və cəmiyyətimizin bayramına çevirmişdir.
Elm, təhsil, mədəniyyət, səhiyyə və digər sahələrdə qazandığı nailiyyətlər Azərbaycan qadınının çox böyük potensiala malik olduğunu zaman-zaman təsdiq etmişdir. Azərbaycan qadını zəkası, müdrikliyi, sədaqəti, qəhrəmanlığı və yüksək analıq keyfiyyəti ilə hər zaman xalqımızın adını uca tutmuşdur. Xalqımızın mənəvi dəyərlərinin formalaşmasında və inkişafında qadınlarımızın rolu danılmazdır.
Tariximizin bütün dövrlərində Azərbaycan qadını xalqımızın taleyüklü məsələlərinin həllinə öz sanballı töhfəsini verib. Bu gün müstəqil Azərbaycanda qadınların cəmiyyətdəki yeri və rolu həm xalqımızın mental ənənələrinə bəslədiyi hörmət, həm də dövlətimizin yeritdiyi siyasət sayəsində yüksək qiymətləndirilir. Müasir Azərbaycan qadını ana olmaqla yanaşı, həm də bacarıqlı siyasətçi, iş adamı və dövlət məmurudur.
Ölkəmizdə qadın siyasətinin əsasını qoyan Ümummilli Lider Heydər Əliyev qadın şəxsiyyətinə böyük hörmətlə yanaşır, onların cəmiyyət həyatının bütün sahələrində fəal iştirakı üçün geniş imkanlar yaratmışdır. Ulu Öndər qadınların hərtərəfli fəaliyyətinə dəstək vermiş, lider qadınlar yetişdirmiş və onların ölkənin inkişafında rolunu ön plana çıxarmışdır.
Ümummilli Lider Heydər Əliyev 8 Mart – Beynəlxalq Qadınlar günü ilə bağlı demişdir: “Bu bayram, doğrudan da bizim bütün bayramlarımız içərisində ən gözəl bayramdır. Zaman keçdikcə, bütün dünyada olduğu kimi, Azərbaycan cəmiyyətində də qadının rolu artır, o, ictimai-siyasi, iqtisadi, mədəni həyatın fəal iştirakçısına çevrilir. Taleyüklü məsələlərin həlli yönündə qərar vermək səlahiyyəti əldə etməklə bu günün lideri rolunu oynayır.”
Respublikamızda dövlət qadın siyasəti, bu istiqamətdə ulu öndər Heydər Əliyevin əsasını qoyduğu ənənələr bu gün Prezidenti İlham Əliyev tərəfindən layiqincə davam etdirilir. Qadınların cəmiyyətdəki roluna və yerinə, onların dövlət idarəçiliyində təmsil olunmalarına, irəli çəkilmələrinə diqqətlə yanaşılır. Ölkə başçısının rəhbərliyi ilə yeni siyasi və iqtisadi sistemlə sürətlə inkişaf edərək bölgənin lider dövlətinə çevrilmiş Azərbaycan gender siyasətinin reallaşdırılması məsələsində də yeniliklərə imza atmışdır. Qadın hüquqlarının müdafiəsi, onlar üçün yaradılan bütün imkanların genişləndirilməsi Prezident İlham Əliyevin dövlət siyasətində müəyyən etdiyi prioritet istiqamətlərdəndir. Dövlət qadın siyasətinin davam etdirilməsi sayəsində Azərbaycan qadınının cəmiyyətdə yeri və nüfuzu daha da artıb. Ölkəmizdə gender siyasətinin gücləndirilməsi, qadınların cəmiyyətdə rolunun yüksəldilməsi üçün ardıcıl tədbirlər həyata keçirilir. Azərbaycan qadınları mühüm dövlət qurumlarında, parlament və bələdiyyələrdə uğurla təmsil olunur, ictimai-siyasi, sosial-iqtisadi, elmi-mədəni proseslərdə fəal iştirak edir, ölkə idmanının inkişafına böyük töhfələr verirlər.
Məhz həmin siyasətin nəticəsidir ki, bu gün Azərbaycanın Birinci vitse-prezidenti də, parlamentin sədri də də məhz zərif cinsin nümayəndələridir. Onu da vurğulamaq lazımdır ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyeva hərtərəfli fəaliyyəti ilə həm ölkədə, həm də beynəlxalq aləmdə Azərbaycan qadının nüfuzunu daha da yüksəklərə qaldırır. Müasir dövrdə Respublikanın Birinci vitse-prezidenti, Heydər Əliyev Fondunun Prezidenti Mehriban xanım Əliyeva özünün həm ictimai- siyasi fəaliyyəti, həm də elmi yaradıcılığı ilə Azərbaycan qadınlarına nümunədir. O, müasir Azərbaycan qadın hərəkatının lideri kimi dövlətimizin tərəqqisi naminə geniş fəaliyyət göstərir. 
Prezident İlham Əliyev qadınların rolunu xüsusi vurğulayaraq demişdir: “Qadınlarımız ölkəmizin inkişafında mühüm qüvvədir. Onlar həm ailədə, həm cəmiyyətdə, həm də iş həyatında uğurlar əldə edərək dövlətimizin tərəqqisinə əvəzsiz töhfələr verirlər. Qadınların ictimai fəallığı və təşəbbüskarlığı ölkəmizin dayanıqlı inkişafının vacib göstəricisidir.”
Bir sözlə, Azərbaycan qadını bu gün həm ailənin dayağı, həm də dövlətin tərəqqisinə aktiv töhfə verən, cəmiyyətin hər sahəsində nümunəvi rol oynayan bir şəxsiyyət kimi tanınır. Dövlətin qadın siyasəti və tarixdən gələn ənənələr birləşərək qadınlarımızın ictimai həyatda mövqeyini möhkəmləndirir, onların inkişafı üçün imkanlar yaradır və ölkənin davamlı tərəqqisinə təkan verir.

Arzu Xəlilova,
Salyan rayon Xıdırlı kənd tam orta ümumtəhsil məktəbin direktor əvəzi, YAP fəalı