Azərbaycan gəncliyi: tarixi məsuliyyətdən müasir çağırışlara

Bu gün cəmiyyətimizin ən fəal və dinamik təbəqəsini təşkil edən gənclər Azərbaycan dövlətinin ictimai, siyasi, iqtisadi və mədəni həyatında mühüm rol oynayır. Gənclik təkcə gələcəyin ümidi deyil, eyni zamanda bu günün aparıcı qüvvəsidir. Məhz gənclərin enerjisi, təşəbbüskarlığı və yenilikçi düşüncəsi ölkənin davamlı inkişafına təkan verir, dövlətin qarşısında duran strateji hədəflərin reallaşmasında mühüm əhəmiyyət daşıyır.

Azərbaycan gəncliyi tariximizin ən mürəkkəb və məsuliyyətli dövrlərində öz sözünü demişdir. Xüsusilə torpaqlarımızın işğaldan azad olunması uğrunda aparılan 44 günlük Vətən müharibəsi zamanı gənclər misilsiz qəhrəmanlıq və fədakarlıq nümunəsi göstərmişlər. Ordumuzun əsas heyətini təşkil edən gənc zabit və əsgərlər Vətənə sədaqət, yüksək döyüş ruhu və sarsılmaz iradə nümayiş etdirərək Azərbaycan tarixində yeni bir şanlı səhifə yazmışlar. Bu tarixi Zəfər gəncliyin vətənpərvərlik ruhunun, milli şüurunun və dövlətinə olan bağlılığının bariz təzahürü olmuşdur.

Müharibədən sonra həyata keçirilən antiterror tədbirləri zamanı da Azərbaycan gəncliyi dövlətin və xalqın təhlükəsizliyinin təmin olunmasında yüksək məsuliyyət nümayiş etdirmişdir. Bu proseslər bir daha sübut etdi ki, gənclər yalnız sülh və quruculuq dövrünün deyil, eyni zamanda milli təhlükəsizlik məsələlərinin də əsas dayağıdır. Dövlətinə güvənən, dövlətin də güvəndiyi gənclik müstəqil Azərbaycanın ən böyük güc mənbəyidir.

Azərbaycan gəncliyi yalnız hərbi və təhlükəsizlik sahəsində deyil, eyni zamanda informasiya müharibəsinin ön cəbhəsində də fəal mövqe nümayiş etdirmişdir. Müasir dövrdə informasiya məkanı dövlətlər arasında mübarizənin əsas istiqamətlərindən birinə çevrilmiş, dezinformasiya və təbliğat vasitələri geniş şəkildə istifadə olunmağa başlanmışdır. Bu mürəkkəb şəraitdə Azərbaycan gəncləri sosial şəbəkələrdə, beynəlxalq platformalarda və müxtəlif informasiya resurslarında ölkəmizin haqq səsinin dünyaya çatdırılmasında mühüm rol oynamışdır.

Gənclər faktlara əsaslanan mövqeləri, operativ reaksiyaları və müasir kommunikasiya bacarıqları ilə düşmən təbliğatının qarşısının alınmasına töhfə vermiş, Azərbaycanın ədalətli mövqeyini qlobal auditoriyaya çatdırmışlar. Onlar Vətən müharibəsi və postmüharibə dövründə baş verən hadisələrə dair obyektiv məlumatların yayılmasında fəallıq göstərmiş, milli maraqların qorunması naminə informasiya məkanında məsuliyyətli və məqsədyönlü fəaliyyət aparmışlar. Bu proses bir daha sübut etmişdir ki, müasir dövrdə gənclik yalnız fiziki gücün deyil, eyni zamanda intellektual və informasiya üstünlüyünün də əsas daşıyıcısıdır.

Azərbaycan gənclərinin formalaşmasında və inkişafında Heydər Əliyev Fondunun xüsusi yeri vardır. Fondun həyata keçirdiyi layihələr gənclərin təhsil səviyyəsinin yüksəldilməsinə, intellektual potensialının artırılmasına və milli-mənəvi dəyərlər əsasında tərbiyəsinə xidmət edir. Təhsil, elm, mədəniyyət və sosial sahələri əhatə edən bu layihələr gənclərin hərtərəfli inkişafına real töhfə verir. Heydər Əliyev Fondunun fəaliyyəti gənclərə göstərilən diqqət və qayğının sistemli və ardıcıl xarakter daşıdığını aydın şəkildə ortaya qoyur.

Fondun təşəbbüsləri nəticəsində gənclər arasında savadlılıq səviyyəsinin yüksəldilməsi, müasir biliklərin mənimsənilməsi və beynəlxalq təcrübənin əldə edilməsi üçün geniş imkanlar yaradılmışdır. Bu isə gənclərin qlobal rəqabət mühitində öz yerini tutmasına, eyni zamanda milli maraqları qoruyaraq beynəlxalq arenada ölkəmizi layiqincə təmsil etməsinə şərait yaradır.

Müasir dövrdə Azərbaycan gəncliyi Dördüncü Sənaye İnqilabının yaratdığı yeni reallıqlarla üz-üzədir. Rəqəmsallaşma, süni intellekt, innovasiya və texnoloji inkişaf gənclərdən daha çevik düşüncə, yüksək texnoloji biliklər və daimi özünüinkişaf tələb edir. Bu mərhələdə gənclər yalnız ənənəvi biliklərlə kifayətlənməməli, müasir texnologiyalara yiyələnməli, innovativ ideyalarla çıxış etməlidirlər.

Azərbaycan dövləti bu çağırışları nəzərə alaraq gənclərin rəqəmsal bacarıqlarının artırılmasına, startap mühitinin formalaşdırılmasına və innovasiya yönümlü təşəbbüslərin dəstəklənməsinə xüsusi önəm verir. Bu siyasət gənclərin iqtisadi inkişafda, yeni dəyər zəncirlərinin yaradılmasında və ölkənin rəqabət qabiliyyətinin artırılmasında fəal iştirakını təmin edir.

Dördüncü Sənaye İnqilabı dövründə gənclər qarşısında duran əsas vəzifələrdən biri də milli kimliyi qorumaqla qlobal düşüncə tərzinə sahib olmaqdır. Texnologiya və innovasiya yalnız maddi tərəqqiyə deyil, eyni zamanda cəmiyyətin intellektual və mənəvi inkişafına xidmət etməlidir. Bu baxımdan, milli dəyərlərə söykənən, lakin müasir dünyaya açıq olan gənclik modeli Azərbaycanın strateji maraqlarına tam cavab verir.

Bir sözlə, Azərbaycan gəncliyi bu gün tarixi məsuliyyətlə müasir çağırışların kəsişməsində formalaşır. Onlar həm torpaqlarımızın azadlığı uğrunda göstərdikləri qəhrəmanlıqla, həm də sülh dövründə bilik, innovasiya və yaradıcı təşəbbüslərlə ölkənin inkişafına töhfə verirlər. Heydər Əliyev Fondunun dəstəyi və dövlətin həyata keçirdiyi məqsədyönlü gənclər siyasəti sayəsində bu potensial daha da güclənir. Güclü, savadlı və vətənpərvər gənclik isə Azərbaycanın sabit, təhlükəsiz və uğurlu gələcəyinin əsas təminatıdır.

Cavid Səmədli,

Salyan Su Meliorasiya Sistemlərinin İstismarı İdarəsinin mühəndis-operatoru, YAP fəalı